ރާއްޖޭގެ ހާލަތު ބޮއްސުންލައިގެން ގޮސް މިހާރު އޮތީ ގައުމު ގެއްލޭ ހިސާބަށް އޮޔާ ގޮސްފައިވާ ކަމަށް، އިދިކޮޅު ކޯލިޝަންގެ ރަނިންމޭޓް ފައިސަލް ނަސީމް މިއަދު، ށ. ގޮއިދޫގައި ވިދާޅުވެއްޖެ އެވެ.
ރިޔާސީ އިންތިޚާބުގެ ކެމްޕެއިނުގައި އެ ރަށުގައި ވާހަކަދައްކަވަމުން ފައިސަލް ވިދާޅުވީ މުޅި ގައުމު ނުރުހިގެން އުޅެނީ އިންސާފާއި ހަމަހަމަކަން ނެތިގެން ކަމަށެވެ. އެހެންވެ އިދިކޮޅު ޕާޓީތަކުން ގުޅިގެން އުފައްދާ ކޯލިޝަން ސަރުކާރުން، ގެއްލިފައިވާ އެ ހައްގުތައް ރައްޔިތުންނަށް ހޯދައިދޭނެ ކަމަށް ވިދާޅުވި އެވެ.
ފައިސަލް ވިދާޅުވީ މި ސަރުކާރުގެ އަނިޔާ ނުލިބޭ މީހަކު ރާއްޖޭގައި މަދުވާނެ ކަމަށެވެ. އެގޮތުން އެތައް ބަޔަކަށް ވަޒީފާގެ ބިރު ދެއްކުމަކީ ވެސް އަނިޔާއެއް ކަމަށް ކާށިދޫ ދާއިރާގެ މެމްބަރު ވިދާޅުވި އެވެ.
"އިދިކޮޅު ހަތަރު ލީޑަރުން އެއްގަލަކަށް އަރައި އެއް ކުލައެއްގައި މަސައްކަތް ކުރާނީ ކަމެއް ވެގެން ނޫންތޯ. ރާއްޖޭގެ ތާރީހުގައި ގައުމު އޮޔާ ނުދާ މިންވަރަށް އޮޔާ ގޮސް ގައުމު ގެއްލޭ ހިސާބަށް ގޮސްފައިވޭ. އިޖުތިމާއީ އަދާލަތު އެއްކޮށް ގެއްލި ދަރިންގެ މުސްތަގުބަލު ވަނީ ގެއްލިފައި،" ފައިސަލް ވިދާޅުވި އެވެ.
އޭނާ ވިދާޅުވީ ކޯލިޝަން ސަރުކާރެއް އަންނަނީ ވައުދުތަކާ އެކު ކަމަށެވެ. އެއީ ފުއްދޭނެ ވައުދުތަކެއް ކަމަށް ވެސް ވިދާޅުވި އެވެ.
ދަނޑުވެރިކަން ކޮށްގެން އާމްދަނީ ހޯދަމުން އަންނަ ގޮއިދުއަށް އިޝާރާތްކުރައްވައި ފައިސަލް ވިދާޅުވީ ކޯލިޝަން ސަރުކާރުން ދަނޑުވެރިންނަށާއި މަސްވެރިންނަށް ހައްގު އާމްދަނީ ހޯދައިދޭނެ ކަމަށެވެ. އޭގެ އިތުރުން ޒުވާނުން ކުރާ މަސައްކަތަށް ފުރިހަމަ އުޖޫރައެއް ހޯދައިދޭނެ ކަމަށް ވެސް ވިދާޅުވި އެވެ.
ފައިސަލް ވިދާޅުވީ މަހެއްގެ ތެރޭގައި ރާއްޖޭގެ 56 ރަށަކަށް ދަތުރުކުރެއްވުނު އިރު ރައްޔިތުން ދިރިއުޅެމުން އަންނަ ހާލަތު އެނގިވަޑައިގަންނަވާ ކަމަށެވެ. އެގޮތުން ރަށްރަށުގެ ސިއްހީ ހާލަތަށް ސަރުކާރުން ވަރަށް ބޮޑަށް އިހުމާލުވެފައިވާކަމަށް ވިދާޅުވި އެވެ.
އޭނާ ވިދާޅުވީ ރާއްޖޭގައި މިހާތަނަށް ހިންގި އެންމެ ބޮޑު ކޮރަޕްޝަން، އެމްއެމްޕީއާރުސީގެ ފައިސާ، ދެ ފުށް ފެންނަ ގޮތަށް ބޭނުންކުރި ނަމަ ރައްޔިތުން މާޔޫސްވެފައި ނުތިބޭނެ ކަމަށެވެ. އަދި އެ ފައިސާ އިން ގިނަ ރަށްތަކެއްގައި ސިއްހީ ހިދުމަތް ރަނގަޅު ކުރެވޭނެ ކަމަށް ވެސް ވިދާޅުވި އެވެ.