ސައިކަލް ޓެކްސީގެ ހިދުމަތަށް ބޭނުންކުރާނީ މާލޭގައި އާންމުކޮށް ބޭނުންކުރާ ކަހަކަ ސައިކަލް ކަމަށާއި ހިދުމަތް ދޭނީ ޖީބަށް ލުއި އަގެއްގައި ކަމަށް އިކޮނޮމިކް މިނިސްޓްރީން މިއަދު ބުނެފި އެވެ.
އިކޮނޮމިކް މިނިސްޓްރީގައި ބޭއްވި ނޫސްވެރިންގެ ބައްދަލުވުމެއްގައި ސްޓޭޓް އިކޮނޮމިކް މިނިސްޓަރު އަބްދުއްލަތީފް މުހައްމަދު ވިދާޅުވީ ސައިކަލް ޓެކްސީގެ ހިދުމަތް ދިނުމުގެ ކުރިން، ހަރުދަނާ އުސޫލެއް އެކުލަވާލާނެ ކަމަށެވެ. އޭނާ ވިދާޅުވީ އެ އުސޫލުތައް ވާނީ ބޭރު ދުނިޔޭގެ ގައުމުތަކުގައި ވެސް ސައިކަލް ޓެކްސީގެ ހިދުމަތް ދިނުމުގައި ގެންގުޅޭ ފަދަ އުސޫލަކަށް ކަމަށެވެ.
"އަޅުގަނޑުމެން ވިސްނަނީ މިހާރު މާކެޓްގައި ހުރި ސައިކަލްތަކަށް. ގައިޑްލައިންގެ ތެރެއިން އެކަމަށް އެންމެ އެކަށީގެންވާ ސައިކަލްތައް އަޅުގަނޑުމެން ގަބޫލުކުރާނީ،" އަބްދުއްލަތީފް ވިދާޅުވި އެވެ.
އޭނާ ވިދާޅުވި ގޮތުގައި އެންމެ ބޮޑު އިސްކަމެއް ދޭނީ ދަތުރުކުރާ މީހާގެ ސަލާމަތާއި ރައްކާތެރި ކަމަށެވެ. އަދި ސައިކަލް ޓެކްސީ ކުރުމުގެ ހުއްދަ ދޭނީ ކިތައް ސައިކަލަށްތޯ އާއި ކިތަން ޑްރައިވަރުންނަށްތޯ ކަނޑައަޅާނެ ކަމަށް ވެސް ވިދާޅުވި އެވެ.
ސައިކަލް ޓެކްސީ ހިދުމަތްދޭ މީހުންނަށް ވަކި ހާއްސަ ޔުނިފޯމެއް ބޭނުން ކުރުމާ މެދު ވިސްނަމުން އަންނަ ކަމަށާއި ސައިކަލްތަކުގައި ވަކި ކަހަލަ ސްޓިކާއެއް ޖެހުމުގެ ހިޔާލު ގެންގުޅޭ ކަމަށް އަބްދުއްލަތީފް ވިދާޅުވި އެވެ.
"ޓެކްސީ ކުރާ ސައިކަލްތަކުގައި ވަކި ކަހަލަ ސްޓިކާއެއް ޖެހުމުގެ ވިސްނުން ގެންގުޅެން. އެއީ ބޯޑެއް ހުރުމަކީ ކޮންމެހެން މުހިންމުކަމެއް ނޫން. ބޭނުން ކުރެވޭނީ ކިހާ އަދަދެއްގެ ސައިކަލްތަކެއްކަން ކަނޑައަޅާނަން،" އަބްދުއްލަތީފް ވިދާޅުވި އެވެ.
އިކޮނޮމިކް މިނިސްޓްރީން ބުނި ގޮތުގައި ސައިކަލް ޓެކްސީގެ ސަބަބުން، މާލޭގައި ދިރިއުޅޭ މީހުން އެއްތަނުން އަނެއް ތަނަށް ދަތުރުކުރުމުގައި ދިމާވާ ދަތިތަކަށް ހައްލެއް އަންނާނެ އެވެ. އަދި ސައިކަލް ޓެކްސީތަކާ އެކު ވަޒީފާތަކެއް އުފެދޭނެ ކަމަށް މިނިސްޓްރީން ބުންޏެވެ.
ސައިކަލް ޓެކްސީގެ ހިދުމަތް ދިނުމަށް ކުރިމަތިލި ހަ ކުންފުނީގެ ތެރެއިން ދެ ކުންފުންޏަކަށް ހުއްދަ ދިނުމަށް ވަނީ ނިންމައިފަ އެވެ. އެއީ ރައިޑް މޯލްޑިވްސް ޕްރައިވެޓް ލިމިޓެޑާއި ވީލް އެމްވީ ޕްރައިވެޓް ލިމިޓެޑަށެވެ. މިނިސްޓްރީން ބުނީ އުސޫލުތައް ހަމަޖެހުނުހާ އަވަހަކަށް ހިދުމަތް ފަށައިގަނެވޭނެ ކަމަށެވެ.