ސައިކަލް ޓެކްސީގެ ހިދުމަތްދޭ ކުންފުނިތަކާއި ޓެކްސީ ޑްރައިވަރުން އަމަލު ކުރަން ޖެހޭނެ ހަރުކަށި އުސޫލުތަކާއެކު ސައިކަލް ޓެކްސީގެ ގަވާއިދު އިކޮނޮމިކް މިނިސްޓްރީން އިއްޔެ އާންމުކޮށްފި އެވެ.
ސަރުކާރުގެ ގެޒެޓްގައި ޝާއިއުކުރި ގަވާއިދުގައި ބުނި ގޮތުގައި ރާއްޖޭގައި އަމަލުކުރާ ގާނޫނުތަކާއި ގަވާއިދުތަކުން ލާޒިމްކުރާ ހާލަތުގައި މަގުމަތީގައި ސައިކަލް ދުއްވަން ވާނީ ހެލްމެޓާއި އެހެނިހެން ސަލާމަތީ ސާމާނުތައް ހިފައިގެންނެވެ. އަދި ހިދުމަތް ދޭ ވަގުތުތަކުގައި ހުންނަންވާނީ ވެސްޓެއް ލައިގެންނެވެ.
މީގެ އިތުރުން ސައިކަލު ޓެކްސީ ކުރާ ސެންޓަރަކީ ވިޔަފާރި ރަޖިސްޓްރީ ކުރުމުގެ ގާނޫނާ އެއްގޮތަށް ރަޖިސްޓްރީ ކޮށްގެން ހިންގާ ސެންޓަރަކަށް ވާން ޖެހޭނެ އެވެ. އަދި ކޮންމެ ސެންޓަރަކަށް ވެސް ޓެކްސީ ކުރުމަށް ބޭނުން ކުރެވޭނީ 20 ސައިކަލު ކަމަށް ގަވާއިދުގައިވެ އެވެ.
މި ގަވާއިދު ގެޒެޓްކުރި އިރު، ސައިކަލް ޓެކްސީގެ ހިދުމަތް ދިނުމަށް ސަރުކާރުން ހުއްދަ ދިނީ ރައިޑް މޯލްޑިވްސް ޕްރައިވެޓް ލިމިޓެޑާއި ވީލް އެމްވީ ޕްރައިވެޓް ލިމިޓެޑަށެވެ. ގަވާއިދު މިހާރު އޮތް ގޮތުން ސައިކަލް ޓެކްސީގެ ގޮތުގައި ބޭނުން ކުރެވޭނީ 40 ސައިކަލެވެ.
ގަވާއިދުގައި ހިމެނޭ ބައެއް މުހިންމު ކަންކަން:
- ކޮންމެ ދުވަހަކު 24 ގަޑިއިރު ހިދުމަތް ދޭން ވާނެ
- ކޮންމެ ދަތުރަކަށް ނެގޭނީ 10ރ.، އެއަށްވުރެ ދަށްކޮށް
- ޑްރައިވަރުން ކުރާ މަސައްކަތުގެ މައުލޫމާތު މިނިސްޓްރީއާ ހިއްސާކުރަން ޖެހޭ
ގަވާއިދުގައި ބުނާ ގޮތުން ސައިކަލު ޓެކްސީ ކުރާ ޑްރައިވަރަކީ ޓެކްސީ ސެންޓަރެއްގައި ރަޖިސްޓްރީވެގެން ޓެކްސީ ކުރާ މީހަކަށް ވާން ޖެހޭނެ އެވެ. ޑްރައިވަރުންގެ ގޮތުގައި ތިބެވޭނީ ދިވެހިންނަށް ކަން ފާހަގަކޮށް އެ ގަވާއިދުގައިވަނީ ޓެކްސީ އަކީ އެއްގަމު ދަތުރުފަތުރު ކުރުމުގެ ގާނޫނުގެ ދަށުން ރެޖިސްޓްރީ ކޮށްފައިވާ އުޅަނދަކަށް ވާން ޖެހޭނެ ކަމަށެވެ.
ޓެކްސީ ޑްރައިވަރަކާ ބެހޭ ގޮތުން ހުށަހެޅިފައިވާ ޝަކުވާ އެ ޑްރައިވަރެއްގެ މައްޗަށް ސާބިތުވެއްޖެ ނަމަ، އެ ޑްރައިވަރު ކުރި އަމަލުގެ ކުޑަބޮޑުމިނަށް ބަލާފައި ފިޔަވަޅު އެޅުމުގެ އިހްތިޔާރު މިނިސްޓްރީ އަށް ލިބިގެންވެ އެވެ. އަދި ޑްރައިވަރާ ޓެކްސީ ސެންޓަރާ މެދު އަޅާނެ ފިޔަވަޅުތައް ގަވާއިދުގައި ވަނީ ހިމަނައިފަ އެވެ.
- ޑްރައިވަރުގެ ލައިސެންސް ވަކި މުއްދަތަކަށް ސަސްޕެންޑް ކުރުން
- ޑްރައިވަރުގެ ލައިސެންސް ބާތިލް ކުރުން، ލައިސެންސް ދޫކުރެވޭނީ ފަސް އަހަރު ފަހުން
- ސެންޓަރާ މެދު ޝަކުވާ ހުށަހެޅިއްޖެ ނަމަ، 500ރ. އާއި 1000ރ. ދެމެދުގެ އަދަދަކުން ޖޫރިމަނާ
ގަވާއިދުގައިވާ ގޮތުން ޓެކްސީގެ ޑްރައިވަރުން ފަސިންޖަރުންނާ މުއާމަލާތުކުރަންވާނީ އިހުތިރާމާ އެކު އެވެ. ޓެކްސީ ކުރެވޭނީ ރެޖިސްޓްރީކޮށްފައިވާ ޓެކްސީ ސެންޓަރަކާ ގުޅިގެންނެވެ. އަދި އެއްވެސް ދަތުރަކާ ހަވާލުވާނީ ޓެކްސީ ސެންޓަރަށް އެންގުމަށް ފަހު ކަމަށް ވެސް ގަވާއިދުގައިވެ އެވެ.
އިކޮނޮމިކް މިނިސްޓްރީން މީގެ ކުރިން ބުނީ ގަވާއިދު އާންމުކުރާތާ ދެ ހަފުތާ ތެރޭގައި ސައިކަލް ޓެކްސީގެ ހިދުމަތް ފެށުމަށް ދެ ކުންފުންޏަށް އަންގާފައިވާނެ ކަމަށެވެ.
އިކޮނޮމިކް މިނިސްޓްރީން ބުނި ގޮތުގައި ސައިކަލް ޓެކްސީގެ ސަބަބުން، މާލޭގައި ދިރިއުޅޭ މީހުން އެއްތަނުން އަނެއް ތަނަށް ދަތުރުކުރުމުގައި ދިމާވާ ދަތިތަކަށް ހައްލެއް އަންނާނެ އެވެ. އަދި ސައިކަލް ޓެކްސީތަކާ އެކު ވަޒީފާތަކެއް އުފެދޭނެ ކަމަށް ވެސް މިނިސްޓްރީން ބުންޏެވެ.