އިންތިޚާބުު ބާތިލްކުރަން ރައީސް ޔާމީންގެ ފަރާތްޕުޅުން ސުޕްރީމް ކޯޓަށް ހުށަހެޅި މައްސަލާގައި މުޅިން އޮތީ ޚިޔާލީ ވާހަކަތަކެއް ކަމަށާއި އެ މައްސަލާގައި މަދުވަނީ އުދުހޭ މުސައްލައެއްގެ ވާހަކަ އެކަނި ކަމަށް އިދިކޮޅު ކޯލިޝަންގެ ވަކީލް ހިސާން ހުސައިން ސުޕްރީމް ކޯޓުގައި މިއަދު ވިދާޅުވެއްޖެ އެވެ.
މިދިޔަ މަހުގެ 23 ވަނަ ދުވަހު ބޭއްވި ރިޔާސީ އިންތިޚާބު ބާތިލްކުރަން ހުށަހެޅި ދުސްތޫރީ މައްސަލާގެ ތެރެއަށް އިދިކޮޅު ކޯލިޝަނުން ވަނީ ތަދައްޚުލްވެފަ އެވެ.
އެ މައްސަލާގައި މިއަދު މެންދުރު ބޭއްވި އަޑުއެހުމުގައި ހިސާން ވިދާޅުވީ އެއީ އިންތިޚާބުން ބަލިވުމުން ލިބުނު އުދާސްތަކެއްގެ ސަބަބުން ހުށަހަޅާފައި އޮތް މައްސަލައެއް ކަމަށާއި އޭގައި ފާހަގަކުރި އެއްވެސް ކަމެއްގައި ހަގީގަތެއް ނެތް ކަމަށެވެ. މުޅި އެ މައްސަލާގައި ފާހަގަކޮށްފައި އޮތީ ފާހަގަ ޖެހޭ އަނގޮޓިއަކާއި ދެލި ފޮހެވޭ ގަލަމުގެ ވާހަކައިގެ އިތުރުން ފާހަގަ ފޮހެވޭ ކަރުދާސްތަކެއްގެ ވާހަކަ ކަމަށާއި އެއީ ޚިޔާލީ ވާހަކަތަކެއް ކަމަށް ވެސް ހިސާން ވިދާޅުވި އެވެ. އަދި އެ މައްސަލާގައި ހަމައެކަނި މަދުވަނީ "އުދުހޭ މުސައްލައެއް" ކަމަށް ވިދާޅުވެ، އެ މައްސަލައަށް ހިސާން ފާޑު ވިދާޅުވި އެވެ.
އެއީ ބަލި ގަބޫލު ނުކުރުމަށް ހުށަހަޅާފައިވާ މައްސަލައެއް ކަމަށް ވިދާޅުވެ، ހިސާން ވިދާޅުވީ އެ މައްސަލާގައި ފާހަގަކުރި އެއްވެސް ކަމަކީ އިންތިޚާބު ބާތިލްކުރަން ޖެހޭ ސަބަބެއް ނޫން ކަމަށެވެ.
އުދުހޭ މުސައްލައެއްގެ ވާހަކަ ވިދާޅުވެ ހިސާން ވާހަކަ ދެއްކެވުމުން، ރައީސްގެ ވަކީލުންގެ ޓީމުގައި ހިމެނިވަޑައިގަންނަވާ ވަކީލް އައްބާސް ޝަރީފް ވަނީ ދެލި ފޮހެވޭ ގަލަމުގެ ވާހަކަ ފުލޯކު ވާހަކައަކަށް ވަނީ ރައީސް ޔާމީންގެ ފަރާތްޕުޅުން އެކަން ހުށަހެޅުއްވުމުންތޯ ވިދާޅުވެ، ރައްދު ދެއްވައިފަ އެވެ. ދެލި ފޮހެވޭ ގަލަންތަކެއްގެ ވާހަކަ އިންތިޚާބުގެ ކުރިން އެންމެ ގަދައަށް ދެއްކީ އިދިކޮޅު ފަރާތްތަކުން ކަމަށާއި އެކަމާ ގުޅިގެން އިލެކްޝަންސް ކޮމިޝަނުން އޭރު ބަޔާނެއް ވެސް ނެރުނު ކަމަށް އައްބާސް ވިދާޅުވި އެވެ.
މިއަދު ހެނދުނާއި މެންދުރު ކުރިއަށް ގެންދިޔަ އެ އަޑުއެހުމުގައި ދެ ފަރާތުން ގިނަ ބަހުސްތަކެއް ކުރުމަށް ފަހު މިއަދުގެ އަޑުއެހުން ނިންމާލީ ރައީސް ޔާމީންގެ ފަރާތްޕުޅުން ހުށަހެޅި ސިއްރު ހެކިވެރިންނާ ގުޅޭ ގޮތުން މާދަމާ ގޮތެއް ނިންމުމާ އެކު އެ މައްސަލާގެ ފަހު އަޑުއެހުން ވެސް މާދަމާ ބާއްވާނެ ކަން އިއުލާން ކުރެއްވުމަށް ފަހު އެވެ.
އެ މައްސަލަ ބައްލަވަނީ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ހިމެނިވަޑަައިގަންނަވާ ގޮތަށް ސުޕްރީމް ކޯޓުގެ ފަސް ފަނޑިޔާރުންގެ ފުލް ބެންޗުންނެވެ.