ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު ފާރިސް މައުމޫންގެ މައްޗަށް އިއްވާފައިވާ ހަތަރު މަހުގެ ޖަލު ހުކުމް ބާތިލްކޮށް، ހައި ކޯޓުން މިއަދު އޭނާ މިނިވަންކޮށްފި އެވެ.
ފާރިސް ހަތަރު މަހާއި 24 ދުވަހަށް ޖަލަށްލާން ކްރިމިނަލް ކޯޓުން ހުކުމްކުރީ ޕީޕީއެމްގެ ދިދަ އާއި ލޯގޯ ގަވާއިދާ ޚިލާފަށް ބޭނުން ކުރި ކަމަށް ބުނެ އޭނާގެ މައްޗަށް އުފުލި ޝަހްސު އޮޅުވާލުމުގެ ދައުވާ ސާބިތުވުމުންނެވެ.
އެ މައްސަލަ ފާރިސްގެ ފަރާތުން އިސްތިއުނާފް ކުރުމުން އެ މައްސަލައިގެ ހުކުމް އިއްވަން މިއަދު ހެެނދުނު ބޭއްވި އަޑުއެހުމުގައި އެ މައްސަލަ ބެއްލެވި ފަނޑިޔާރުންގެ ބެންޗުގެ ރިޔާސަތު ބެލެހެއްޓެވި ފަނޑިޔާރު މުހައްމަދު ފައިސަލް ވިދާޅުވީ ދަށު ކޯޓުގެ ހުކުމް ބާތިލްކުރަން ޖެހޭ ކަމަށް އެ މައްސަލަ ބެއްލެވި ތިން ފަނޑިޔާރުންނަށް އިއްތިފާގު ވެވިފައިވާ ކަމަށެވެ.
ސިއްރުން ހެކިބަސް ނެގީ ގާނޫނާ ޚިލާފަށް
ފަނޑިޔާރު ފައިސަލް ވިދާޅުވި ގޮތުގައި އެ މައްސަލައިގެ ޝަރީއަތް ދަށު ކޯޓުގައި ކުރިއަށް ދިޔައިރު ދައުލަތުން ފާރިސްއާ ދެކޮޅަށް ހުށަހެޅި ހެކިންގެ ބަޔާންތައް ސިއްރުކޮށް، ހެކިބަސް ސިއްރުން ނަގާފައިވަނީ ޖިނާއީ އިޖުރާއާތުގެ ގާނޫނާ ޚިލާފަށެވެ. ސަބަބެއްގެ ގޮތުގައި ފަނޑިޔާރު ވިދާޅުވީ ހެކި ސިއްރު ކުރުމަށް ދައުލަތުން އެއްވެސް ހުށަހެޅުމެއް ދަށު ކޯޓަށް ހުށަހަޅާފައި ނެތުމެވެ.
ހެކި ސިއްރު ކުރުމަށް ނުވަތަ ހެކި ރައްކާތެރި ކުރުމުގެ އަމުރަކަށް ދައުލަތުން އެދޭ ނަމަ، ޝަރީއަތުގެ ކުރީގެ ހުށަހެޅުމެއްގެ ގޮތުގައި ދައުލަތުން އެކަން ހުށަހަޅަން ޖެހޭނެ ކަމަށާއި އެފަދަ އެއްވެސް ހުށަހެޅުމެއް ދައުލަތުން ދަށު ކޯޓަށް ހުށަހަޅާފައި ނެތުމުން އެ ފުރުސަތު ދައުލަތުން ދޫކޮށްލީ ކަމަށް ބަލަން ޖެހޭ ކަމަށް ފަނޑިޔާރު ވިދާޅުވި އެވެ.
ޝަރީއަތް ކުރިއަށް ދިޔައީ ހައްގުތަކުން މަހްރޫމްވާ ގޮތަށް
ފަނޑިޔާރު ފައިސަލް ވިދާޅުވީ އެ މައްސަލާގެ ޝަރީއަތް ދަށު ކޯޓުން ކުރިއަށް ދިޔައިރު ޖިނާއީ އިޖްރާއާތުގެ ގާނޫނުގައި ބުނާ ފަދައިން އެ މައްސަލައިގެ އަޑުއެހުންތައް ދުރާލާ ތާވަލްކޮށްފައި ނުވާ ކަމަށެވެ. އަދި އަޑުއެހުންތައް ކުރިއަށް ގެންދިޔައީ އަވަސް އަރުވާލައިގެންކަން ދައުލަތުން ވެސް ހައި ކޯޓުގައި އެއްބަސްވެފައިވާ ކަމަށް ވިދާޅުވި އެވެ.
ފަނޑިޔާރު ފައިސަލް ފާހަގަކުރެއްވި ގޮތުގައި ކުށުން ބަރީއަވުމަށްޓަކައި އެކަށީގެންވާ ވަގުތާއި ފުރުސަތު ލިބުމަކީ ހައްގެކެވެ. އެކަމަކު ދަށު ކޯޓުން އަމަލުކުރި ގޮތުން ފާރިސްގެ އެ ހައްގުތައް ހަނިވެފައިވާ ކަމަށް ވިދާޅުވި އެވެ.
"ގާނޫނީ ވަކީލަކާ މަޝްވަރާކޮށް، ގާނޫނީ ވަކީލެއްގެ އެހީގައި ކުށުން ބަރީއަވުމަށް މަސައްކަތް ކުރުމުގެ ހައްގު އަހުމަދު ފާރިސް މައުމޫނަށް ލިބިދިނުމުގައި ކްރިމިނަލް ކޯޓުން އެ ހައްގުތައް ހަނިކޮށްފައިވާ ކަން ސާފުކޮށް އެނގެން" އޮތް ކަމަށް ފަނޑިޔާރު ވިދާޅުވި އެވެ.
ބާތިލް ކަމެއްގެ މައްޗަށް ތަރުތީބުވާ ކޮންމެ ކަމެއް ވެސް ބާތިލްވާނެ ކަން ފާހަގަކުރައްވައި، ފަނޑިޔާރު ފައިސަލް ވިދާޅުވި ގޮތުގައި އިޖްރާއާތުތަކާ ޚިލާފަށް ކަމެއް ކޮށްފި ނަމަ، އޭގެ ފަހަށް ކުރާ ހުރިހާ ކަމެއް ވެސް ބާތިލް ކަމަށް ބަލަން ޖެހޭނެ އެވެ. އެ މައްސަލައިގެ ޝަރީއަތް ކުރިއަށް ދިޔައީ ގާނޫނުއަސާސީ އާއި ޖިނާއީ އިޖްރާއާތުގެ ގާނޫނުން ލިބިދޭ ހައްގުތަކުން މަހްރޫމްކޮށްގެން ކަމަށާއި އެހެންވެ، އެ ހުކުމް ބާތިލް ކުރަން ޖެހޭ ކަމަށް ފަނޑިޔާރު ވިދާޅުވި އެވެ.
އެ މައްސަލައިގެ އިސްތިއުނާފް ނިމެންދެން ފާރިސް ހުންނެވީ ކަފާލާތުގެ ދަށުން މިނިވަންކޮށްފަ އެވެ. އޭނާ މިނިވަންކުރީ ޑިޕޮސިޓްގެ ގޮތުގައި 40،000ރ. ކޯޓުގައި ބެހެއްޓުމުންނެވެ. ޖަލު ހުކުމް ބާތިލް ކުރުމާ އެކު، މަޖިލީހަށް ހާޒިރުވުމުގެ ފުރުސަތު ވެސް ފާރިސަށް އަލުން ލިބިވަޑައިގަންނަވާނެ އެވެ.
އެ މައްސަލަ ބެއްލެވީ ފަނޑިޔާރު ފައިސަލްގެ އިތުރުން އިސް ފަނޑިޔާރު ޝުޖާއު އުސްމާން އަދި ފަނޑިޔާރު ހަސަން އަލީ އެވެ.
ފާރިސްގެ މައްޗަށް ރިޝްވަތުގެ ދައުވާ އާއި ޓެރަރިޒަމްގެ ދައުވާއެއް ވެސް ދައުލަތުން ކުރެ އެވެ. އެކަމަކު އެ މައްސަލަތައް ދަށު ކޯޓުގައި އަދި ނުނިމެ އެވެ.