ސަރުކާރުގެ އިސް ބޭފުޅުން ރަށްރަށަށް ވަޑައިގަންނަވާއިރު މަރުހަބާ ދެންނެވުމަށް ދަރިވަރުން ނުނެރުމަށް އެޑިއުކޭޝަން މިނިސްޓްރީން ސްކޫލްތަކަށް މިއަދު އަންގައިފި އެވެ.
އެޑިއުކޭޝަން މިނިސްޓަރު ޑރ. އައިޝަތު އަލީ ސޮއި ކުރައްވައި، ނެރުއްވި ސާކިއުލާއެއްގައިވަނީ ސަރުކާރުގެ އިސްވެރިން ރަށްރަށަށް ކުރައްވާ ދަތުރުތަކުގައި މަރުހަބާ ދެންނެވުމަށް ދަރިވަރުން ގިނަ ވަގުތު ކޮޅަށް ބެއިތިއްބުމާއި އަވީގައި ބޭތިއްބުމަކީ ދަރިވަރުންގެ ސިއްހަތަށް ނޭދެވޭ އަސަރު ކުރާ ކަމެއް ކަމަށެވެ. އަދި އެކަމުގެ ސަބަބުން ދަރިވަރުންނާއި ބެލެނިވެރިންގެ ވެސް ގިނަ ވަގުތުތަކެއް ގެއްލިގެންދާ ކަމަށް ވެސް އެ ސާކިއުލާގައިވެ އެވެ.
އެގޮތަށް ދަރިވަރުން ނެރުމަކީ ކޮންމެހެން ބޭނުންތެރި ކަމަކަށް ނުވާތީ، އެކަން އެގޮތަށް ނުކުރުމަށް އެ ސާކިއުލާގައި މިނިސްޓަރު އައިޝަތު ސްކޫލްތަކަށް އަންގަވާފައިވެ އެވެ.
ސަރުކާރުގެ އިސް ބޭފުޅުން ރަށްރަށަށް ވަޑައިގަންނަވާއިރު، މަރުހަބާ ދެންނެވުމަށް ދަރިވަރުން ނެރުމަކީ ރާއްޖޭގައި ކުރީއްސުރެން ފެށިގެން ބައެއް ސްކޫލްތަކުން ކުރާ ކަމެކެވެ. އެގޮތަށް އެކަން ކުރަން ޖެހުމަކީ ބައެއް ދަރިވަރުންނާއި ބެލެނިވެރިންގެ ޝަކުވާ އެކެވެ.