ޕީއެންސީ އުފެއްދުމަށް އާ ގަވައިދުން ގޮންޖެހުންތަކެއް

ސިޔާސީ ޕާޓީތަކުގެ ގަވާއިދު އިސްލާހުކޮށް އިލެކްޝަންސް ކޮމިޝަނުން މިދިޔަ ބުރާސްފަތި ދުވަހު ގެޒެޓު ކުރުމާއެކު، ޕީޕަލްސް ނެޝަނަލް ކޮންގްރެސް (ޕީއެންސީ) އުފެއްދުމަށް ގާނޫނީ ގޮތުން ގޮންޖެހުންތަކެއް ކުރިމަތިވެއްޖެ އެވެ.

ކުރީގެ ރައީސް އަބްދުﷲ ޔާމީން އާއި ޕީޕީއެމްގެ ލީޑާޝިޕް އިސްކޮށް ތިއްބަވައިގެން އުފެއްދުމަށް މަސައްކަތްކުރާ ޕީއެންސީ އުފެއްދުމުގެ ޖަލްސާ މިރޭ ބާއްވަން އަންނަނީ ތައްޔާރުވަމުންނެވެ. ނަމަވެސް ޕީއެންސީ އުފެއްދުމުގެ މަސައްކަތް ފެށި ގޮތާއި ކަން ހިނގާފައިވާ ގޮތަށް ބަލާއިރު އާ ގަވައިދަކީ ޕީއެންސީ އަށް ބޮޑު ހުރަހަކަށް ވެދާނެ އެވެ.

އެގޮތުން، ޕީއެންސީ އުފައްދަނީ ޕީޕީއެމްގެ ދަރަނި ބޮޑުވެ ސަލާމަތްނުވާ ވަރު ވުުމުން އެކަމުން ރެކެން ކަމަށް ބުނާއިރު ގަވައިދު މިހާރު ހަދާފައިވަނީ ޕާޓީތަކުން ދަރަންޏަށް ޒިންމާވާންޖެހޭ ގޮތަށެވެ. އަދި މިހާރު ހިންގާ ޕާޓީތަކުން ވެސް ދަރަންޏަށް ޒިންމާވާ މީހަކު ކަނޑައަޅައި އެކަން އިލެކްޝަންސް ކޮމިޝަން (އީސީ) އަށް އަންގަން ޖެހެ އެވެ. އަދި ޕާޓީއެއް އުވާލާ ނަމަ ދަރަންޏެއް އޮތްތޯ ބަލައި އެ ދަަރަނި އަދާކުރުމަށް، އެ ޕާޓީއެއްގެ ދަރަންޏަށް ޒިންމާވާ މީހަކަށް ނުވަތަ ޕާޓީގެ އެންމެ އިސް މީހަކަށް އެންގުމުގެ ބާރު އީސީ އަށް، އާ ގަވައިދުގައި އޮވެ އެވެ.

ސިޔާސީ ޕާޓީތަކުގެ ގަވައިދަށް ގެނައި އިސްލާހުގައިވާ ގޮތުން، އަލަށް ޕާޓީއެއް އުފައްދަނީ ހިންގަމުން އަންނަ ޕާޓީއެއްގެ ލީޑަޝިޕުގެ މީހުންނަށްވެފައި އެ ޕާޓީން އަދާކުރަންޖެހޭ ޒިންމާއެއް އަދާކޮށްފައިނުވާ ނަމަ، އާ ޕާޓީއެއް އުފައްދަން ދިން ހުއްދަ ބާތިލް ކުރެވިދާނެ އެވެ. މިއީ މިހާރު ވެސް ޕީއެންސީ އަށް އޮތް ތުހުމަތެކެވެ.

އަލަށް ޕާޓީއެއް އުފައްދަނީ، ހިނގަމުންދާ ޕާޓީއެއްގެ ވަސީލަތްތަކާއި މުވައްޒަފުން ބޭނުންކޮށްގެން ކަމަށް ވިޔަސް އެ ޕާޓީއެއް އުފެއްދުމަށް ދީފައިވާ ހުއްދަ، އާ ގަވައިދުގެ ދަށުން ބާތިލްކުރެވިދާނެ އެވެ. އަދި ހިނގަމުންދާ ޕާޓީގެ ލީޑަޝިޕް ގެއްލި ޕާޓީގެ ހިންގުން ހުއްޓޭ ނަމަ ވެސް އާ ޕާޓީ އުފެއްދުމުގެ ހުއްދަ ބާތިލް ކުރެވޭ ގޮތަށް ގަވާއިދު ވަނީ އިސްލާހު ކޮށްފަ އެވެ.

ޕާޓީ ރަޖިސްޓްރީ ކުރުމަށް ވަގު ފޯމު ހުށަހަޅާފައިވާ ކަމުގެ ޝަކުވާ ލިބިއްޖެ ނަމަ އެކަމެއް ބަލައި ނިމެންދެން، ޕާޓީ އުފެއްދުމުގެ މަސައްކަތް ހުއްޓުވިދާނެ ކަމަށް ގަވައިދުގައި ވާއިރު، މިފަދަ ޝަކުވާތަކެއް ލިިބިފައިވާ ކަމަށް އިލެކްޝަންސުން ކުރިން ބުނެފައިވެ އެވެ.

ސިޔާސީ ޕާޓީތަކުގެ ގަވާއިދަށް މި އިސްލާހުތައް ގެނެސްފައި ވަނީ ޕީއެންސީ އުފެއްދުމުގެ މަސައްކަތް ކުރަން ފެށުމުން، އެކަމާ އިލެކްޝަންސް ކޮމިޝަނުގެ މެންބަރުން ކަންބޮޑުވުން ފާޅުކޮށް އެ މައްސަލަތަކަށް ގާނޫނީ ހައްލެއް ގެންނަން ބޭނުންވާ ކަމަށް ބުނެފައި ވަނިކޮށެވެ.

ބައެއް ފަރާތްތަކުން ބުނަމުންދަނީ ސިޔާސީ ޕާޓީތަކުގެ ގަވާއިދު އިސްލާހުކޮށްފައި ވަނީ ޕީއެންސީ އަށް އަމާޒުކޮށްގެން ކަމަށެވެ. ނަމަވެސް އިލެކްޝަންސްގެ ރައީސް އަހުމަދު ޝަރީފް ވަނީ އެކަން ދޮގު ކުރައްވައިފަ އެވެ.

"އީސީން ޕީޕީއެމްއާ މެދު ވަކި ގޮތަކަށް އަމަލެއް ނުކުރަން،" ޝަރީފް ޓުވިޓާގައި ލިޔުއްވާފައިވެ އެވެ.

ޕީއެންސީ އުފެއްދުމަށް އިލެކްޝަންސް ކޮމިޝަނުން ދަތި ނުކުރުމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ވަނީ ގޮވާލައްވައިފަ އެވެ. ޕީއެންސީ އުފެއްދުމުގެ ހުއްދަ ދީފައި ވަނީ އެހެން ޕާޓީތަކާ އެއްގޮތަށް ޕީޕީއެމް އާއި ޕީއެންސީއާމެދު އަމަލު ކުރުމަށް ގާސިމް ގޮވައިލެއްވި ފަހުންނެވެ.