ޑައިރެކްޓަރު ރާޖްކުމާރު ހިރާނީގެ މައްޗަށް ޖިންސީ ގޯނާގެ ތުހުމަތު ކުރުމާ ގުޅިގެން "މުންނާ ބާއީ" ސީރީޒްގެ ތިން ވަނަ ފިލްމުގެ މަސައްކަތް ސުވާލެއްގެ ތެރޭގައި ވަނިކޮށް، އެ ފިލްމު އެހެން މީހަކު ލައްވައި ޑައިރެކްޓް ކުރުވައިފާނެ ކަމަށް ބެލެވެން ފަށައިފި އެވެ.
"މުންނާ ބާއީ" ގެ ފިލްމުތަކުގައި ސަރްކެޓްގެ ރޯލް ކުޅޭ އަރުޝަދު ވަރްސީ ދާދި ފަހުން ބުނި ގޮތުގައި ތިން ވަނަ ފިލްމުގެ ސްކްރިޕްޓް ގާތްގަނޑަކަށް ނިމިފައިވާ އިރު، ފިލްމުގެ ޝޫޓިން މި އަހަރުގެ ތެރޭގައި ހިރާނީ ފަށާނެ އެވެ.
ހިރާނީގެ އެންމެ ފަހުގެ ފިލްމު "ސަންޖޫ" ގައި ޕްރޮޑަކްޝަން ޓީމުގައި ހިމެނުނު އަންހެނަކު އޭނާގެ މައްޗަށް ޖިންސީ ގޯނާގެ ތުހުމަތު ކުރީ "މުންނާ ބާއީ 3" ގެ ވާހަކަ މީޑިއާތަކުގައި ދެކެވެން ފެށިތަނާ އެވެ.
އެހެންވެ އެ ފިލްމަށް ދެން ވާނެ ގޮތަކާ ދޭތެރޭ އޮތީ ސުވާލު އުފެދިފަ އެވެ. ހިރާނީގެ މައްޗަށް ކުރި ތުހުމަތުތަކާ ގުޅިގެން އޭނާ މިހާރު ވަނީ "ނިޒާމުން ގެއްލިފަ" އެވެ. ހިރާނީގެ އެއްވެސް އަޑެއްބަޑެއް މިދުވަސްކޮޅަކު ނީވެ އެވެ. އަނެއްކޮޅުން އޭނާގެ މައްޗަށް ކުރި ތުހުމަތާ ގުޅިގެން ދިފާއުގައި ވެސް އެއްވެސް ވާހަކައެއް ނުދައްކަ އެވެ.
އެކަމަކު އޭނާގެ މިޒާޖު ދަންނަ ބޮލީވުޑްގެ ގިނަ ބަޔަކު ބުނާ ގޮތުގައި ހިރާނީއަކީ މީހަކަށް ޖިންސީ ގޯނާ ފަދަ ހުތުރު އަމަލެއް ހިންގާނެ ކަހަލަ މީހެއް ނޫނެވެ. އަދި އެއީ ބޮލީވުޑްގެ އެންމެ އަހުލާގު ރަނގަޅު އެއް ޑައިރެކްޓަރުގެ ގޮތުގައި ސިފަކޮށްފައިވެ އެވެ.
ޕްރޮޑިއުސަރު ވިދޫ ވިނޯދް ޗޯޕްޅާ ބުނި ގޮތުގައި މި އަހަރުގެ ފަހުކޮޅު "މުންނާ ބާއީ 3" ގެ މަސައްކަތް ފަށާނެ އެވެ. އެކަމަކު އަދިވެސް ސްކްރިޕްޓް އެއްކޮށް ފައިނަލް ނުވާ ކަމަށް ބުންޏެވެ.
އޭނާގެ އެ ވާހަކަތައް މީޑިއާތަކުން ތަރުޖަމާ ކުރީ ހިރާނީއާ ނުލައި ފިލްމު ހަދަން ނިންމުމުގެ ގޮތުގަ އެވެ. ނަމަވެސް ވިދޫގެ އިންޓަވިއުގައި ހިރާނީގެ އެއްވެސް ވާހަކައެއް ނުދައްކަ އެވެ.
ރިޕޯޓްތައް ބުނާ ގޮތުން ހިރާނީއާ އެކު އަލުން، ވިދޫ މަސައްކަތް ކުރާނީގެ އޭނާގެ މައްޗަށް ކުރެވުނު ތުހުމަތު ބަރީއަވެ، ސާފުވުމުންނެވެ. މިކަމާ ގުޅިގެން ވިދޫ އާއި ހިރާނީ ހިއްސާވެގެން، ފޮކްސް ސްޓާ ސްޓޫޑިއޯއާ ގުޅިގެން ވިދޫ ޑައިރެކްޓް ކުރަން ޕްލޭންކޮށްފައި އޮތް ފިލްމު ވެސް ފަސްކޮށްފައިވާ ކަމަށްވެ އެވެ.
ބޮލީވުޑްގެ ހަބަރުތައް ގެނެސްދޭ ނޫސްތަކުން ބުނާ ގޮތުގައި "މުންނާ ބާއީ 3" އަށް ބެލުންތެރިން ވަރަށް ބޮޑަށް އިންތިޒާރު ކުރާތީ މި އަހަރު ފިލްމުގެ މަސައްކަތް ފަށަން ވިދޫ ބޭނުންވެ އެވެ. އެހެންވެ އެހެން ޑައިރެކްޓަރަކު ލައްވައި ފިލްމު ޑައިރެކްޓް ކުރުވުމުގެ ފުރުސަތު ވަރަށް ބޮޑު ކަމަށްވެ އެވެ.
މި ސީރީޒްގެ ފިލްމުތަކުގެ ސްކްރީންޕްލޭގައި ހިއްސާ ވަނީ ހިރާނީ އާއި އަބިޖާތު ޖޯޝީގެ އިތުރުން ވިދޫ އެވެ.
ސަންޖޭ ދަތާއި އަރުޝަދު މުހިއްމު ރޯލްތަކުން ފެނިގެންދާ "މުންނާ ބާއީ" ގެ ފުރަތަމަ ފިލްމު "މުންނާ ބާއީ އެމްބީބީއެސް" 2003 ގައި ގެނެސް ދިނުމަށް ފަހު، "ލަގޭ ރަހޯ މުމްނާ ބާއީ" ރިލީޒް ކުރީ 2006 ގަ އެވެ.
ތިން ވަނަ ފިލްމުގެ މަސައްކަތް މި އަހަރު ފަށާނެ ކަމަށް ވިދޫ ބުނެފައިވާ އިރު، މި ފަހަރު ފިލްމުގެ ބަތަލާގެ ރޯލް ސޯނަމް ކަޕޫރަށް ދީފައިވާ ކަމަށްވެ އެވެ. ވިދޫ ޕްރޮޑިއުސްކޮށް، އޭނާގެ ކޮއްކޮ ޝެލީ ޗޯޅާ ޑައިރެކްޓް ކުރި ފިލްމު "އޭކް ލަޅްކީ ކޮ ދޭކާ ތޮ އޭސާ ލަގާ" މިހާރު ސިނަމާތަކުގައި ދައްކަމުން އަންނަ އިރު އެ ފިލްމުގެ ބަތަލާއަކީ ވެސް ސޯނަމެވެ.
މިދިޔަ އަހަރު ރިލީޒް ކުރި "ސަންޖޫ" ގައި ވެސް އޭނާ ކުރު ރޯލެއް ކުޅުނެވެ.