ސިނަމާލޭ ބްރިޖް ހައިވޭގައި ރޭ މެންދަމު، ބާރު ސްޕީޑުގައި ދުއްވި ކާރެއް އެކްސިޑެންޓުންވެއް ފުނޑުފުނޑު ވެއްޖެ އެވެ.
ފުލުހުން ބުނީ އެކްސިޑެންޓު ހިނގި އިރު ކާރުގައި ތިބި ދެ މީހުންކުރެ އެކަކަށް ވެސް ބޮޑު އަނިޔާއެއް ނުވާ ކަމަށެވެ.
މި އެކްސިޑެންޓު ހިނގީ މެންދަމުން އަލިވެ 3:00 ހާއިރު ކަމަށާއި ކާރުގައި ތިބީ 24 އަހަރުގެ ފިރިހެނަކާއި 20 އަހަރުގެ ފިރިހެނެއް ކަމަށް ފުލުހުން ބުންޏެވެ. އަދި ކާރު ދުއްވަން އިނީ 24 އަހަރުގެ މީހާ ކަމަށާއި އެއީ ކާރު ދުއްވުމުގެ ލައިސަންސް އޮންނަ މީހެއް ކަމަށް ބުންޏެވެ.
ކާރު ދުއްވީ ޔޫތު މިނިސްޓަރުގެ ޕީއޭ އަހްމަދު އަޒްމޫން ކަމަށް ވަނީ އެނގިފަ އެވެ.
ޕްރައިވެޓް މި ކާރު އެކްސިޑެންޓުވެފައި އޮތީ ހައިވޭގެ އިރުމަތީ ފަރާތުގަ އެވެ. ކާރު ކޮންޓްރޯލް ނުވެ ގޮސް ޖެހުނު ބާރު މިނުގައި، މަގުމަތީގައި ޖަހާފައި ހުރި ހޮޅިދަނޑި ވެސް ވެއްޓި، ހައިވޭގެ ދަގަނޑު ފެންސް ވެސް އޮތީ ބިނދިފަ އެވެ. ކާރު އޮތީ ފެންސުގެ އެތެރެއިން ޕޭވްމަންޓްމައްޗަށްވާ ގޮތަށެވެ.
ހުޅުމާލެއިން މާލެއަށް ދަނިކޮށް އެކްސިޑެންޓުވި ކާރު ގޮސް ބޭރު ތޮށިގަނޑުގައި ޖެހި، ހުއްޓިފައި އޮތީ ޕޭވްމަންޓްމައްޗަށްވާ ގޮތަށެވެ.
ބްރިޖް ހައިވޭގައި މި ފަހަކަށް އައިސް ނުރައްކާތެރި ގިނަ އެކްސިޑެންޓުތަކެއް ހިނގާފައިވެ އެވެ.