ގދ. ތިނަދޫން މަސްތުވާތަކެއްޗާ އެކު ރޭ ހައްޔަރުކުރި، އެ ރަށު ކޯޓުގެ މެޖިސްޓްރޭޓެއް ކަމަށްވާ އިބްރާހިމް ރަޝީދު ދޫކޮށްލަން ހައި ކޯޓުން ދެންމެ އަމުރުކޮށްފި އެވެ.
އިބްރާހިމް ރަޝީދު 38، ގެ ބަންދާ މެދު ގޮތެއް ނިންމުމަށްޓަކައި އޭނާ މާލެ ގެނައީ މިރޭގަ އެވެ.
ހައި ކޯޓުން އިބްރާހިމް ރަޝީދު ދޫކޮށްލީ، އޭނާ ހައްޔަރުކުރުމުގައި އަމަލުކުރި އިޖުރާއަތުގައި މައްސަލަތަކެއް ހުރުމުން ކަމަށް "މިހާރަ"ށް އެނގިފައިވެ އެވެ. ޝަރީއަތް ކުރިއަށް ގެންދިޔައީ ސިއްރުން ކަމަށް ވާތީ، ޝަރީއަތުގައި ދެ ފަރާތުން ދެއްކި ވާހަކަތަކުގެ ތަފުސީލެއް ނޭނގެ އެވެ.
އެކިއެކި މައްސަލަތަކުގައި ހައްޔަރުކުރާ މީހުންގެ ބަންދާ މެދު ކޯޓުތަކުން ގޮތެއް ނިންމަނީ އެ ޝަރީއަތުގެ މަޖިލިސް ސިއްރު ކޮށްގެންނެވެ.
މަސްތުވާތަކެއްޗާ އެކު ތިނަދޫން ރޭ ހައްޔަރުކުރީ އެ ރަށު ކޯޓުގެ މެޖިސްޓްރޭޓް ކަމެއް ހާމަނުކޮށް، މިއަދު ފުލުހުންގެ ވެބްސައިޓްގައި ބުނެފައި ވަނީ، އޭނާ ހައްޔަރުކުރިއިރު ވެސް ހުރީ މަސްތުގެ ހާލަތުގައި ކަމަށެވެ.
"ފުލުހުންގެ ބެލުމުގެ ދަށަށް ގެނެސް ހަށިގަނޑާއި އޭނާ ހުރި ސަރަހައްދު ބަލައި ފާސްކުރިއިރު އޭނާ ހުރި ދިމާ ބިންމަތިން، މަސްތުވާ ތަކެތި ކަމަށް ބެލެވޭ އެއްޗެއްހުރި ރަބަރު ޕެކެޓެއް ވަނީ ފެނިފަ އެވެ،" ފުލުހުން ބުނެފައިވެ އެވެ.
ތިނަދޫ ކޯޓުގެ ގާޒީ ދޫކޮށްލަން ހައި ކޯޓުން އަމުރު ނެރުނުއިރު، އޭނާ ހައްޔަރުކުރުމާ ގުޅިގެން ހޯމް މިނިސްޓަރު އުމަރު ނަސީރު ވަނީ ފުލުހުންނަށް ތައުރީފު ކުރައްވައިފަ އެވެ. ފުލުހުންގެ ކަންކަމާ ހަވާލުވެ ހުންނެވި މިނިސްޓަރު އުމަރު ވިދާޅުވެފައި ވަނީ ފުލުހުންގެ މަސައްކަތަށް ސެލިއުޓް ކުރައްވާ ކަމަށާއި ގާނޫނަށް ވުރެ މަތީގައި އެއްވެސް މީހަކަށް ނުހުރެވޭނެ ކަމަށެވެ.