މިއަހަރު ރާއްޖޭން މީހުން ހައްޖަށް ގެންދިއުމުގެ ހުއްދަ ފަސް ކުންފުންޏަކަށް ސަރުކާރުން މިއަދު ދީފި އެވެ.
އިސްލާމިކް މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޑެޕިއުޓީ މިނިސްޓަރު ޝާފިއު އަލީ ވިދާޅުވީ، ހައްޖަށް މީހުން ގެންދިއުމުގެ ޕްރޮޕޯޒަލަށް ހުޅުވާލުމުން 18 ކުންފުންޏަކުން ކުރިމަތިލި ކަމަށެވެ. އޭގެ ތެރެއިން އިޖުރާއަތްތައް ފުރިހަމަކޮށްފައިނުވާތީ ހަ ޕްރޮފޯޒަލެއް ބަލައިނުގަންނަ ކަމަށް ވިދާޅުވި އެވެ.
ހައްޖަށް މީހުން ގެންދިއުމުގެ ހުއްދަ ދީފައިވާ ކުންފުނިތަކަކީ؛
1) އެކްރޯ ހައްޖު ގްރޫޕު: 59،965ރ.
2) ހައްޖު ކޯޕަރޭޝަން: 69،965ރ.
3) މިނާ ހައްޖު ގްރޫޕު: 69،965ރ.
4) އަލްހަރަމައިން ހައްޖު ގްރޫޕު: 69،965ރ.
5) ޒައި ހައްޖު ގްރޫޕު: 70،000ރ.
6) ތަޒްކިޔާ ހައްޖު ގްރޫޕު: 72،250ރ.
ރާއްޖެއަށް ލިބިފައިވާ 1000 ކޯޓާގެ ތެރެއިން އަމިއްލަ ކުންފުނިތަކަށް ދީފައިވަނީ ޖުމްލަ 450 ޖާގަ އެވެ. އެ ކޯޓާ ކުންފުނިތަކުގެ މެދުގައި ބަހާލުމުން، ކޮންމެ ކުންފުންޏަކަށް ލިބެނީ 90 ޖާގަ އެވެ. ބާކީހުރި 550 ކޯޓާ ދީފައިވަނީ ހައްޖު ކޯޕަރޭޝަނަށެވެ.
އިތުރު 1000 ކޯޓާ ވަރަށް އަވަހަށް ލިބޭނެ ކަމަށް ސައުދީގެ މިނިސްޓްރީން ޔަގީންކަން ދީފައިވާ ކަމަށް ވިދާޅުވި އެވެ. އެ ކޯޓާ ލިބުމުން ވެސް، އުސޫލުގެ ތެރެއިން ކުންފުނިތަކުގެ މެދުގައި ބަހާލާނެ ކަމަށް ވިދާޅުވި އެވެ.
ޝާފިއު ވިދާޅުވީ ހައްޖުގެ ކަންކަމަކީ ޒަމާނުއްސުރެ ޝައްކުގެ ނަޒަރުން ބަލާ ކަންކަން ކަމަށެވެ. އެހެންވެ އެކަންތައް ބަދަލުކޮށް، ރައްޔިތުންގެ އިތުބާރު ހޯދުމަކީ އަމާޒެއް ކަމަށް ވިދާޅުވި އެވެ. އެ މަސައްކަތުގެ ތެރެއިން، އެންމެ މުހިއްމު ކަމެއްގެ ގޮތުގައި އޭނާ ފާހަގަކުރެއްވީ ހައްޖު އިވެލުއޭޝަން ކޮމެޓީ އެވެ.
މީގެ ކުރިން ހައްޖަށް މީހުން ގެންދިއުމަށް ހުށަހަޅާ ޕްރޮޕޯޒަލްތައް އިވެލުއޭޓުކުރާނީ އެ ވަގުތަކު ހުންނެވި އިސްލާމިކް މިނިސްޓަރު ކަނޑައަޅުއްވާ ކޮމެޓީއަކުންނެވެ. ނަމަވެސް އެކަން ބަދަލުކޮށް، ފަސް މެމްބަރުން ހިމެނޭ ހައްޖު އިވެލުއޭޝަން ކޮމެޓީގެ މެޖޯރިޓީ އޮންނަނީ އެހެން އިދާރާތަކުގަ އެވެ. އޭގެ ތެރޭގައި އިކޮނޮމިކް މިނިސްޓްރީ އާއި ފިނޭންސް މިނިސްޓްރީ އަދި އެޓާނީ ޖެނެރަލް (އޭޖީ) އޮފީސް އަދި އިސްލާމިކް މިނިސްޓްރީގެ ދެ ބޭފުޅުން ހިމެނެ އެވެ.
އޭނާ ވިދާޅުވީ ވަކިވަކި ކުންފުނިތަކަށް ލިބިފައިވާ މާކްސްތަކާއި ތަފްސީލުތައް މިނިސްޓްރީގެ ވެބްސައިޓުގައި އާއްމުކުރާނެ ކަމަށެވެ. އަދި ހައްޖަށް މީހުން ގެންދާ ކުންފުނިތަކުން ހުށަހަޅާފައިވާ ޕްރޮޕޯސަލާ އެއްގޮތަށް ކަންތައްތައް ކުރޭތޯ ހައްޖު މިޝަނުން ވަރަށް ރަނގަޅަށް ބަލާނެ ކަމަށް ވިދާޅުވި އެވެ.
"ކުރީ އަހަރުތަކާ ހިލާފަށް ވަރަށް ވަރުގަދަ ފިޔަވަޅުތަކެއް މިފަހަރު އަޅާފައިވާނެ، ހައްޖަށް މީހުން ގެންދާ ކުންފުނިތަކުން ކުރަން އެއްބަސްވާ ކަންތައްތަކާ ހިލާފުވާ ކަމުގައިވާ ނަމަ. މިސާލަކަށް ފައިސާ ނެގުމުގެ ކަންކަމުގައި، އިތުރަށް ފައިސާ ނަގައި އެކަން ސާބިތުވެއްޖެނަމަ، އެ ހިނގާ އަހަރުގައި ހައްޖަށް ގެންދިއުމަށް ދީފައިވާ ކޯޓާ ބާތިލްކުރެވޭ ވަރަށް އުސޫލު ބަދަލުކޮށް ފުރިހަމަކޮށްފައި ވާނީ،" ޝާފިއު ވިދާޅުވި އެވެ.
ސްޓޭޓް މިނިސްޓަރު އިލްޔާސް ޖަމާލް ވިދާޅުވީ އެހެން އަހަރުތަކަށް ވުރެ މި އަހަރު ހައްޖަށް މީހުން ގެންދިއުމުގެ ހުއްދަ ކުންފުނިތަކަށް ދިނުން ލަސްވެފައިވާ ކަމަށެވެ. އެގޮތަށް ލަސްވީ، އޭނާ ވިދާޅުވި ގޮތުގައި އުސޫލަށް ބަޮޑެތި ބަދަލުތަކެއް ގެނެސް އިތުރަށް ހަރުދަނާކުރުމަށް ކަމަށެވެ. ނަމަވެސް ކުރިއަށް އޮތް ތަނުގައި، ޑިސެމްބަރު ނުވަތަ ޖެނުއަރީ ހިސާބުގައި ކުންފުނިތަކަށް ހުއްދަދޭނެ ކަމަށް ވިދާޅުވި އެވެ.
އިލްޔާސް ވިދާޅުވީ ކުރީގެ އުސޫލު ހަދާފައިވަނީ، ހަމައެކަނި ވަކި ގްރޫޕުތަކަށް ކުރިމަތިލެވޭގޮތަށް ކަމަށެވެ. ނަމަވެސް ހައްޖަށް މީހުން ގެންދިއުމަށް ޝައުގުވެރިވާ އަދި ޝަރުތު ހަމަވާ ކޮންމެ ބަޔަކަށް ވެސް ކުރިމަތިލެވޭ ގޮތަށް އުސޫލު ބަދަލުކޮށްފައިވާ ކަމަށް ވިދާޅުވި އެވެ. ހައްޖާ ގުޅޭ ކަންކަން ރަނގަޅުވާނީ ގިނަ ބަޔަކަށް ފުރުސަތުދީގެންކަން އޭނާ ފާހަގަކުރެއްވި އެވެ.
ހައްޖަށް މީހުން ގެންދިއުމުގެ އަގު ކަނޑައަޅަނީ އެބަޔަކު ހައްޖަށް ގެންދާ ކުންފުންޏަކުންނެވެ. އިލްޔާސް ވިދާޅުވ އަންނަ އަހަރަށް ހައްޖަށް ގެންދިއުމުގެ ހުއްދައަށް ހުޅުވާލުމުގެ ކުރިން، ހައްޖު މިޝަނުން އަގާ ގުޅޭ ގޮތުން ދިރާސާކުރާނެ ކަމަށެވެ.