ބޭރު ބޯޓްތައް ރާއްޖޭގައި މަސްވެރިކަން ކުރުން މަނާކުރަން މަޖިލީހަށް ގަރާރެއް

ރާއްޖޭން ބޭރުގެ މަސްބޯޓްތަކުން ރާއްޖޭގެ ސަރަހައްދުގައި މަސްވެރިކަންކުރުން މަނާކުރަން ގޮވާލާ ގަރާރެއް ރައްޔިތުންގެ މަޖިލީހަށް އިއްޔެ ހުށަހަޅައިފި އެވެ.

ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު މުހައްމަދު ޝިފާއު އިއްޔެ ހުށަހެޅުއްވި އެ ގަރާރު ރިޔާސަތުން މިއަދު އިއްވި އެވެ.

ރާއްޖޭގެ މަސްވެރިން އާއްމުގޮތެއްގައި ކޮށް ނޫޅޭ މަސްވެރިކަމެއް ކަމަށްވާ ލޯބޮޑު ކަންނެލީގެ މަސްވެރިކަން ކުރުމަށް އޮޕަރޭޓްކުރާ ބޭރުގެ ބޯޓްތަކަށް ދޫކޮށްފައިވާ ހުއްދަތައް ބާތިލުކުރުމަށް ގަރާރުގައި ގޮވާލާފައިވެ އެވެ. އޭގެ އިތުރުން އެބާވަތުގެ މަސްވެރިކަން ކުރަން ހުއްދަ ދީފައިވާ ރާއްޖޭގެ ބޯޓްތަކަށް ވެސް ވަކި އުސޫލުތަކެއް ކަނޑައަޅަން ވަނީ ގޮވާލައިފަ އެވެ.

ރާއްޖޭގައި ހަރަކާތްތެރިވާ ލޭނު ބޯޓްތަކުން އާއްމުގޮތެއްގައި ބާނަނީ ލޯބޮޑު ކަންނެއްޔެވެ. އެއީ އާއްމުކޮށް ދިވެހިން ބާނާ އުޅޭ ރީނދޫ އުރަހަ ކަންނެއްޔަށް ވުރެ މާ ފުނުގައި އުޅޭ ބާވަތެކެވެ.

ޝިފާއުގެ ގަރާރުގައި ތުހުމަތު ކުރައްވާފައިވާ ގޮތުގައި ފަސް ކުންފުންޏަކުން އޮޕަރޭޓްކުރާ ބޭރުގެ 28 ބޯޓަކަށް ލައިސަންސް ދޫކޮށްފައިވެ އެވެ. އެ ބޯޓްތައް ހަރަކާތްތެރިވަނީ ހުއްދަކޮށްފައިވާ ސަރަަހައްދުގައިތޯ ފިޝަރީޒް މިނިސްޓްރީން ބެލި ނަމަވެސް އެ ބޯޓްތަކުން ބާނާ މަހުގެ ބާވަތާއި ފެންވަރު ނުބެލޭ ކަމަށް ވެސް ގަރާރުގައި ބުނެފައިވެ އެވެ. އެހެންވެ މައިގަނޑު ތިން ކަމެއް ކުރަން ގަރާރުގައި ހުށަހަޅާފައިވެ އެވެ.

އެކަންތައްތަކަކީ:

1- ރާއްޖޭގެ ސަރަހައްދުގައި މަސްވެރިކަން ކުރަން ބޭރުގެ ފަރާތްތަކަށް ދީފައިވާ ހުއްދަތައް ބާތިލުކުރުން.

2- ރާއްޖޭގައި މަސްވެރިކަން ކުރާ އުޅަނދުފަހަރުގައި ހުންނަން ޖެހޭނެ ފެންވަރާއި ފަޅުވެރިންގެ ހުންނަން ޖެހޭ ފެންވަރު ކަނޑައެޅުން

3- މަސްވެރިކަމުގެ ބާވަތްތަކުގެ ތެރެއިން ރާއްޖޭގައި ކުރުން މަނާވާނީ ކޮން ބާވަތްތަކެއް ކަނޑައެޅުން

ގަރާރުގައި ގޮވާލާފައި ވަނީ އެ ފިޔަވަޅުތައް އަޅަން ފިޝަރީޒް މިނިސްޓްރީއަށާއި ރައީސުލް ޖުމްހޫރިއްޔާއަށް އިލްތިމާސް ކުރުމަށް

އެ ބޯޓްތަކާ ބެހޭ ގޮތުން ކުރީ ސަރުކާރުގެ ދުވަސްވަރު ނޫސްވެރިން ސުވާލުކުރުމުން އޭރުގެ ފިޝަރީޒް މިނިސްޓަރު ޑރ. މުހައްމަދު ޝައިނީ ވިދާޅުވެފައިވަނީ އެއީ ބޭރު ބޯޓްތަކެއް ނޫން ކަމަށާއި އެއީ ދިވެހި ކުންފުނިތަކުން އޮޕަރޭޓްކުރާ ބޯޓްތަކެއް ކަމަށެވެ. އަދި އެ ބޯޓުތައް ހަރަކާތްތެރިވާނީ ރާއްޖޭގެ މަސްވެރިން އާއްމުކޮށް މަސްވެރިކަން ކޮށް އުޅޭ ވަރަށް ވުރެެ ބޭރުން ކަމަށް ވެސް އޭނާ އޭރު ވިދާޅުވި އެވެ.