ލާމަރުކަޒީ ގާނޫނަށް ސަރުކާރުން ހުށަހެޅި އިސްލާހުތަކަކީ ދިވެހިން އެދޭ ތަރައްގީގެ ބިންގާ ކަމަށް ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެ އެވެ.
ރައީސް ކުރެއްވި ޓުވީޓެއްގައި ވިދާޅުވީ މި ސަރުކާރުގެ ތަރައްގީގެ ތަސައްވަރަކީ ރާއްޖެ ލާމަރުކަޒުކޮށް ޖަޒީރާވަންތަ ދިރިއުޅުމެއް ހޯދައިދިނުން ކަމަށެވެ. ލާރުކަޒީ ގާނޫނަށް އިސްލާހު ހުށަހެޅީ އެކަން ހާސިލްކުރަން ކަމަށް ވިދާޅުވި އެވެ.
"މިއީ، [ލާމަރުކަޒީ ގާނޫނަށް ގެންނަ އިސްލާހުތަކަކީ] އަޅުގަނޑުމެން އެދޭ ތަރައްގީގެ ބިންގާ،" ރައީސް ވިދާޅުވި އެވެ.
ލާމަރުކަޒީ ގާނޫނަށް ސަރުކާރުން އިސްލާހު ހުށަހެޅީ ކައުންސިލްތަކުގެ ދައުރު ފަސް އަހަރަށް ބަދަލުކުރުމާ އެކު ބޮޑެތި ބާރުތަކެއް ދިނުމަށެވެ.
ކައުންސިލްތައް މާލީ ގޮތުން ބާރުވެރިކުރުވުމުގެ ގޮތުން ދައުލަތުގެ އާމްދަނީގެ ފަސް ޕަސެންޓަށްވާ ފައިސާ ދޭން ބިލްގައި ވަނީ ހިމަނައިފަ އެވެ. މީގެ އިތުރުން ކައުންސިލްތަކުގެ އިހްތިސާސްގައި ނުހިމެނޭ ބިމާއި ފަޅާއި ފަރުގެ ސަރަހައްދުތަކުގެ ކުލީގެ 40 ޕަސެންޓަށް ވާ އަދަދު ފައިސާ، ފިސްކަލް ފޯމިއުލާއެއްގެ ދަށުން ހުރިހާ ކައުންސިލްތަކަށް ބެހިގެންދާ ގޮތަށް ހަމަޖައްސަން ވެސް ވަނީ ހުށަހަޅައިފަ އެވެ.
ބިލުގައިވާ ގޮތުން ކައުންސިލްތަކުން ދޭ ޚިދުމަތްތަކަށް ބޭނުންވާ ފައިސާ ހޯދުމަށް ފީ ނުވަތަ ކުލި ނެގުމުގެ ބާރު ކައުންސިލްތަކަށް ދޭނެ އެވެ. ރަށެއް ނުވަތަ ސިޓީއެއްގައި ހިންގާ ޕީއެސްއައިޕީ މަޝްރޫއުތަކުގެ ތެރެއިން، އެ މަޝްރޫއެއްގެ އަގު 5 މިލިއަނަށް ވުރެން ކުޑަ މަޝްރޫއުތައް ކައުންސިލްތަކުން ހިންގާ ގޮތަށް ހަމަޖައްސަން ވެސް ބިލުގައި ހުށަހަޅާފައިވެ އެވެ.
ލާމަރުކަޒީ ގާނޫނަށް އިސްލާހުތައް މި ގެންނަނީ، ގާނޫނުން ކައުންސިލްތަަކަށް ދީފައިވާ ބާރުތައް ނިގުޅައިގަނެ، ކައުންސިލްތައް ޕެރެލައިޒްކޮށްފައިވާ ކަމުގެ ޝަކުވާކުރަމުންދާ އަހަރުތަކެއް ފަހުންނެވެ.
