ހުޅުމާލޭގައި، ބޭންކް އޮފް މޯލްޑިވްސް (ބީއެމްއެލް) ގެ އޮފީސް އިމާރާތެއް އެޅުމަށް ބޭނުންވާ ބިން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އެ ބޭންކާ އިއްޔެ ހަވާލުކޮށްފި އެވެ.
އެޗްޑީސީން ބުނީ ގައުމީ ބޭންކް، ބީއެމްއެލުން ހުޅުމާލޭގައި ދެމުން އަންނަ ހިދުމަތްތައް އިތުރަށް ފުޅާ ކުުރުމުގެ ގޮތުން، އެ ބޭންކުގެ އޮފީސް އިމާރާތެއް ހެދުމަށް ހާއްސަ ބިމެއް ހަވާލުކޮށް އެއްބަސްވުމުގައި ސޮއިކޮށްފައިވާ ކަމަށެވެ.
އެއްބަސްވުމުގައި އެޗްޑީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ސުހައިލް އަހުމަދެވެ. ބީއެމްއެލުން ސޮއިކުރެއްވީ ސީއީއޯ ޓިމޮތީ ސޯޔާ އެވެ.
އެޗްޑީސީން ބުނިގޮތުގައި، އެއްބަސްވުމުގެ ދަށުން ކުރިއަށް އޮތް ފަސް އަހަރުގެ ތެރޭގައި ބީއެމްއެލްގެ އޮފީސް އިމާރާތެއް ހުޅުމާލޭގައި އަޅައި ނިންމާނެ އެވެ.
ބީއެމްއެލަށް ބިން ދޫކުރީ ހުޅުމާލޭ ފުރަތަމަ ފިޔަވަހިން ސެންޓްރަލް ޕާކުގެ ދެކުނު ސަރަހައްދުން އަމީން އެވެނިއުއާ އިންވެގެން އޮތް ސަރަހައްދެވެ.
އެކަމަކު އެއީ ކިހާވަރެއްގެ ބިމެއް ކަމެއް އެޗްޑީސީ އަކުން ނުބުނެ އެވެ.