އަންނަ އަހަރަށް ލަފާކުރާ ދައުލަތުގެ ބަޖެޓަށް 366 މިލިއަން ރުފިޔާ އިތުރުކޮށް، 37.8 ބިލިއަން ރުފިޔާގެ ބަޖެޓެއް ކަނޑައެޅުމަށް މަޖިލީހުގެ ބަޖެޓު ކޮމިޓީން ނިންމައިފި އެވެ.
މިރޭ ރައްޔިތުންގެ މަޖިލީހުގައި ބޭއްވި ބަޖެޓު ކޮމިޓީގައި މިގޮތަށް ފާސްކުރީ ކޮމިޓީގައި ބައިވެރިވެ ވަޑައިގެންނެވި މެންބަރުންގެ އަގުލަބިއްޔަތުންނެވެ. މި މަހުގެ ފަސް ވަނަ ދުވަހު ފިނޭންސް މިނިސްޓްރީން ރައްޔިތުންގެ މަޖިލީހަށް ފޮނުވާފައިވަނީ 37.5 ބިލިއަން ރުފިޔާގެ ބަޖެޓެކެވެ. ބަޖެޓަށް އިތުރު ކުރި 366 މިލިއަން ރުފިޔާ އާ އެކު ސަރުކާރުގެ ހަރަދުތަކާއި ޕީއެސްއައިޕީ މަޝްރޫތަކަށް ބަޖެޓު އިތުރު ވެގެންދާނެ އެވެ.
ބަޖެޓަށް އިތުރުވި އަދަދަށް ފައިނޭންސް ހޯދުމަށް ހަމަޖެހިފައިވަނީ ޓީބިލް ވިއްކައިގެންނެވެ. އެއާ އެކު 929 މިލިއަން ރުފިޔާގެ ޓީބިލް ވިއްކަން ޖެހޭނެ އެވެ. މިއަހަރުގެ މިހާތަނަށް ސަރުކާރުން ވަނީ 3 ބިލިއަންގެ ޓީބިލް ވިއްކާފަ އެވެ. ޓީބިލްގެ އިތުރުން ޖަޕާނު މާކެޓަށް 300 މިލިއަން ޑޮލަރުގެ ސަމުރާއީ ބޮންޑެއް ވިއްކުމަށް ވެސް ސަރުކާރުން ވަނީ ނިންމާފަ އެވެ.
ބަޖެޓުގެ އަދަދު އިތުރުވުމާ އެކު ބަޖެޓް ޑެފިސިޓް ވެސް އިތުރުވެގެންދާނެ އެވެ. މިގެނައި ބަދަލާ އެކު ކައުންސިލްގެ ބަޖެޓަށް ކަނޑައަޅާފައިވާ ޖުމްލަ އަދަދަށް ބަދަލު ނަމަވެސް ވަކި ވަކި ކައުންސިލްތަކަށް ކަނޑައަޅާފައިވާ ބަޖެޓު ވަނީ އިތުރުވެފަ އެވެ.