ރިޔާސީ އިންތިހާބުގައި ވާދަކުރަން ޖުމްހޫރީ ޕާޓީން ނިންމައިފި

ކުރިއަށް އޮތް ރިޔާސީ އިންތިހާބުގައި ވާދަކުރަން ޖުމްހޫރީ ޕާޓީ (ޖޭޕީ)ގެ ކައުންސިލުން މީގެ އިރުކޮޅެއް ކުރިން ފާސްކޮށްފި އެވެ.

ޖުމްހޫރީ ޕާޓީގެ އޮފީހުގައި ބޭއްވި ކައުންސިލް ބައްދަލުވުމުގައި އެގޮތަށް ފާސްކުރީ، އެ ބައްދަލުވުމަށް ވަޑައިގެންނެވި 18 މެމްބަރުންގެ އަޣުލަބިއްޔަތުންނެވެ. އެކަމަކު އިންތިހާބަށް ޖޭޕީން ނެރޭނެ ކެންޑިޑޭޓެއް އަދި އެކަމާ ގުޅޭ ކަންކަން ނިންމި ގޮތެއް އަދި ސާފެއް ނުވެ އެވެ.

ޖޭޕީގެ އަސާސީ ގަވައިދުގައިވާ ގޮތުން އެ ޕާޓީގެ ފަރާތުން ރިޔާސީ އިންތިހާބަށް ނުކުންނަވާނީ ޕާޓީގެ ލީޑަރެވެ. އެކަމަކު އުމުރުން 65 އަހަރުން މަތީގެ މީހުންނަށް ރިޔާސީ އިންތިހާބަށް ވާދަނުކުރެވޭ ގޮތަށް، ގާނޫނުއަސާސީއަށް ރައްޔިތުންގެ މަޖިލިހުން ޖޫން 25، 2015 ގައި ގެނައި އިސްލާހުގެ ސަބަބުން، ޖޭޕީގެ ލީޑަރު ގާސިމް އިބްރާހީމަށް ވަނީ އެ ފުރުސަތު ގެއްލިފަ އެވެ. ގާސިމްގެ މިހާރުގެ އުމުރަކީ 65 އަހަރެވެ.

ރިޔާސީ އިންތިހާބަށް ކުރިމަތިލައްވާނެކަން މިހާތަނަށް އިއުލާން ކުރައްވާފައި ވަނީ ރައީސް އަބްދުﷲ ޔާމީނާއި ކުރީގެ ހޯމް މިނިސްޓަރު އުމަރު ނަސީރެވެ.

ޖޭޕީގެ ކައުންސިލްގެ މިއަދުގެ ބައްދަލުވުމުގައި ވަނީ، ސިޔާސީ ޕާޓީތަކުގެ މަޝްވަރާގައި އެ ޕާޓީ ތަމްސީލް ކުރައްވާނެ ބޭފުޅުން ވެސް ފާސްކޮށްފަ އެވެ. އެއީ ކިނބިދޫ ދާއިރާގެ މެމްބަރު އަދި ޖުމްހޫރީ ޕާޓީގެ ޕާލަމެންޓްރީ ގުރޫޕުގެ ޑެޕިއުޓީ ލީޑަރު އަބްދުﷲ ރިޔާޒާއި ކެންދޫ ދާއިރާގެ އަލީ ހުސެއިން އަދި މަތިވެރި ދާއިރާގެ ހުސެއިން މުހައްމަދެވެ. މީގެ ތެރެއިން ހުސެއިން މުހައްމަދު މަޝްވަރާތަކަށް ވަޑައިގަންނަވާނީ، ރިޔާޒާއި އަލީ ހުސެއިންގެ ތެރެއިން ބޭފުޅަކަށް ވަޑައިނުގެންނެވޭ ހާލަތްތަކުގައި ކަމަށް ވެސް ވަނީ ފާސްކޮށްފަ އެވެ.

ރިޔާޒް "މިހާރު" އަށް ވިދާޅުވީ ސިޔާސީ ޕާޓީތަކުގެ މަޝްވަރާތަކުގައި، ޑިމޮކްރެޓިކް އުސޫލުތަކުގެ ބޭރުން ގާނޫނުއަސާސީ އާއި ގާނޫނުތަކަށް ގެނެސްފައިވާ ބަދަލުތައް އިސްލާހު ކުރަން ޖޭޕީން ހުށަހަޅާނެ ކަމަށެވެ. އޭގެ ތެރޭގައި އުމުރުން 65 އަހަރުން މަތީގެ މީހުންނަށް ވެރިކަމަށް ކުރިމަތިނުލެވޭ ގޮތަށް ގާނޫނުއަސާސީއަށް ގެނައި އިސްލާހު އުވައިލުން ވެސް ހިމެނޭނެ ކަމަށް އޭނާ ވިދާޅުވި އެވެ.

ރައްޔިތުންގެ މަޖިލިހުގެ ޖަލްސާއެއްގައި ރިޔާޒް ވާހަކަ ދައްކަވަނީ: ރިޔާސީ އިންތިހާބަށް ގާސިމަށް ކުރިމަތިލުމުގެ ފުރުސަތު ގެއްލޭ ގޮތަށް ގާނޫނުއަސާސީއަށް ރައްޔިތުންގެ މަޖިލިހުން ގެނައި އިސްލާހު ބަދަލުކުރަން، މަޝްވަރާގައި ޖޭޕީން ހުށަހަޅާނެ ކަަމަށް ރިޔާޒް ވިދާޅުވި.---ފޮޓޯ: މަޖިލިސް

"އަޅުގަނޑުމެން މިހާރު މިވަނީ ރިޔާސީ އިންތިހާބުގައި ވާދަކުރާނެ ކަމަށް އިއުލާން ކޮށްފައި. އެކަން ނިންމާފައި. އެހެންވީމާ މި ޕާޓީ ތެރޭގައި ހުންނެވި އެންމެ މަގުބޫލު ބޭފުޅަކަށް [ރިޔާސީ އިންތިހާބުން] ފުރުސަތު ލިބެން ޖެހޭނެ. އެއީ ޑިމޮކްރެޓިކް ހަމައަކީ،" ރިޔާސީ އިންތިހާބުގައި ޖޭޕީގެ ކެންޑިޑޭޓަކަށް ވާނީ ގާސިމްކަން ދޭހަވާ ގޮތަށް ރިޔާޒް ވިދާޅުވި އެވެ.

ރިޔާސީ އިންތިހާބުގައި ޖޭޕީ ވާދަކުރަން ނިންމައި، އަދި އެ ޕާޓީގެ ކެންޑިޑޭޓަކީ ގާސިމް ކަމަށް ހަމަޖެއްސުމުގެ ވިސްނުން ކައުންސިލްގެ މެމްބަރުން ގެންގުޅޭއިރު، ސަރުކާރުން އައި އެކި ކަހަލަ ފިއްތުންތަކާ އެކު، އޭނާ ފަހަކަށް އައިސް ފެނިފައި ވަނީ ސަރުކާރަށް ސިޔާސީ ގޮތުން އެހީތެރިވާ ބޭފުޅެއްގެ ގޮތުގަ އެވެ. އެގޮތުން ބައެއް ހާލަތްތަކުގައި ރައްޔިތުންގެ މަޖިލިހުގައި ސަރުކާރުން ބޭނުންވާ ގޮތަށް، ޖޭޕީގެ މަޖިލިސް މެމްބަރުން ވޯޓު ދެއްވަ އެވެ. އޭގެ ތެރޭގައި ގާސިމް ވެސް ހިމެނިވަޑައިގަންނަވަ އެވެ.

ސިޔާސީ ޕާޓީތަކުގެ މަޝްވަރާތައް ކުރިއަށް ގެންދަން ބޭނުންވަނީ އދ. ގެ މަންދޫބާއެކު ކަމަށް އިދިކޮޅު އެމްޑީޕީ އާއި އަދާލަތު ޕާޓީން ޝަރުތު ކުރުމުން ސަރުކާރުން މިހާރު ވަނީ އެކަމަށް އެއްބަސްވެފަ އެވެ.

ފިޝަރީޒް މިނިސްޓަރު އަދި ސިޔާސީ ޕާޓީތަކުގެ މަޝްވަރާގައި ސަރުކާރު ތަމްސީލް ކުރައްވާ އިސް މަންދޫބު ޑރ. މުހައްމަދު ޝައިނީ މިއަދު ވިދާޅުވީ އދ.ގެ މަންދޫބު ތަމްރަތު ސެމިއުލް މިހާރު ހުންނެވީ ކުރު ޗުއްޓީއެއްގައި ކަމަށެވެ. އޭނާ އެނބުރިވަޑައިގަތުމާ އެކު މަޝްވަރާ ފަށާނެ ކަމަށް ޝައިނީ ވިދާޅުވި އެވެ.

"އަންނަ މަހުގެ މެދެއްހާ ހިސާބުގައި އެމަނިކުފާނު ވަޑައިގަންނަވާނެ ކަމަށް މިބަލަނީ. އެހެންވީމަ އޭނާ ވަޑައިގަތުމާއެކު ސަރުކާރުން މަޝްވަރާ ފަށާނެ،" އޭނާ ވިދާޅުވި އެވެ.