ޖަޕާނުން ރާއްޖެއަށް 4 މިިލިއަން ޑޮލަރު (70.9 މިލިއަން ރުފިޔާ) ގެ ތަކެތި މިއަދު ރާއްޖެއަށް ހަދިޔާކޮށްފި އެވެ.
މިއީ މިދިޔަ އޮކްޓޫބަރު މަަހު ރައީސް އިބްރާހިމް މުހައްމަދު ސޯލިހު ޖަޕާނަށް ކުރެއްވި ދަތުރުފުޅާ ގުޅިގެން ރާއްޖެއަށް ދޭން ނިންމި އެހީއެކެވެ.
ތަފާތު އެކި ދާއިރާތަކުގައި ބޭނުންކުރެވޭ ސާމާނު ހަދިޔާކުރެއްވީ، ޖަޕާނުން ރާއްޖެ ކަނޑައަޅާފައި ހުންނަވާ ސަފީރު ކެއިކޯ ޔަނާއި އެވެ. ރާއްޖޭގެ ފަރާތުން އެހީއާ ހަވާލުވެވަޑައިގެންނެވީ ފޮރިން މިނިސްޓަރު އަބްދުﷲ ޝާހިދެވެ.
އެ އެހީތައް މައިގަނޑު ގޮތެއްގައި އަމާޒުކޮށްފައިވަނީ ޓެރަރިޒަމް ހުއްޓުވުމަށާއި ރާއްޖޭގެ އިޖުތިމާއީ އިގުތިސޯދީ ތަރައްގީއާ ގުޅޭ ކަންކަމަށެވެ.
ޔަނާއި ވިދާޅުވީ އެ ގައުމުން ހަދިޔާކުރި ތަކެތީގެ ތެރޭގައި ލިކުއިޑް ސްކޭނާއި މޮބައިލް އެކްސްރޭ ކެމެރާ އާއި ހޭންޑީ މެޓަލް ޑިޓެކްޓަރާއި ހޭންޑް ރޭޑިއޯ އާއި ތަފާތު އެކި ވައްތަރުގެ ކެމެރާގެ އިތުރުން 44 ވެހިކަލެއް ހިމެނެ އެވެ.
މިއީ ޓެރަރިޒަމާ ދެކޮޅަށް ކުރަމުން އަންނަ މަސައްކަތަށް ލިބޭނެ އިތުރު އެހީއަކަށް ވާނެ ކަމަށް އުއްމީދުކުރައްވާ ކަމަށް ވެސް އޭނާ ވިދާޅުވި އެވެ.
ރާއްޖެއިން ޖަޕާނަށް ކަނޑައަޅާފައި ހުންނަވާ ސަފީރު އިބްރާހިމް އުވެއިސް ވިދާޅުވީ ރާއްޖޭގެ ތަރައްގީ އާއި ކުރިއެރުމަށް އެ ގައުމުން މިހާތަނަށް ވެސް ބޮޑު އެހީއެއް ދީފައިވާ ކަމަށެވެ. އޭގެ ތެރޭގައި އިންސާނީ ވަސީލަތް ތަރައްގީކޮށް މަތީ ތައުލީމްގެ ފުރުސަތު ފަހިކޮށްދެމުން އަންނަ ކަމަށް ވެސް ވިދާޅުވި އެވެ.