ޖަޕާނުން ރާއްޖެއަށް 21.7 މިލިއަން ރުފިޔާގެ ހިލޭ އެހީ މިއަދު ދީފި އެވެ.
ފޮރިން މިނިސްޓްރީން ބުނީ ކޮވިޑް-19 ގެ ސަބަބުން ދިމާވެފައިވާ ދަތިކަމުން އަރައިގަތުމުގައި އެހީތެރިކަން ދޭން ޖަޕާނުން ނިންމާފައިވާ ކަމަށެވެ. އޭގެ ތެރެއިން މިއަދު ހަދިޔާކުރި 21.7 މިލިއަން ރުފިޔާގެ ފައިދާ ދިވެހި ސަރުކާރަށާއި ރާއްޖޭގެ އިގުތިސާދު އަލުން ހުޅުވާލުމަށް މަސައްކަތް ކުރަމުން އަންނަ ދަނޑިވަޅުގައި ވިޔަފާރިވެރިންނަށް ވެސް ކުރާނެ ކަމަށް ބުންޏެވެ.
އެކަންކަމުގެ އިތުރުން އާމްދަނީ ހޯދޭނެ އާ ގޮތްތައް ބަލައި، ދިގު މުއްދަތެއްގައި އިގުތިސާދު ކުރިއެރުވުމުގައި އެހީތެރިކަން ފޯރުކޮށްދެވޭނެ ކަމަށް ވެސް ބުންޏެވެ.
ސަރުކާރުން ނިންމާފައިވަނީ ކޮވިޑް-19 ފެތުރޭތީ މިހާރު އަޅާފައިވާ ފިޔަވަޅުތައް ރައްޔިތުންގެ އެއްބާރުލުމާއެކު ރަނގަޅަށް ތަންފީޒު ކުރެވޭ ނަމަ މި މަހުގެ 28 ގެ ފަހުން ލުއިތަކެއް ދިނުމަށެވެ. އެކަމުގެ ތައްޔާރީތައް ވަމުން އަންނަކަމަށް ރައީސް އިބްރާހިމް މުހައްމަދު ސޯލިހު ރޭ ވަނީ ވިދާޅުވެފަ އެވެ.
ޖަޕާނުގެ އެހީ ހަމަޖެހިފައިވަނީ ޔޫއެންޑީޕީގެ އެހީތެރިކަމާއެކުގަ އެވެ. އެހެންވެ ފޮރިން މިނިސްޓްރީން ވަނީ އެ ޖަމާއަތަށް ވެސް ޝުކުރު އަދާކޮށްފަ އެވެ.
ފޮރިން މިނިސްޓްރީން ބުނީ ކޮވިޑް-19 އާ ދެކޮޅަށް މަސައްކަތް ކުރުމަށް ސިއްހީ ހިދުމަތްތެރިންގެ އަދަދު އިތުރުކުރުމުގައި ރާއްޖެއަށް އެހީ ދިނުމާ ގުޅޭ ގޮތުން ވެސް މަޝްވަރާކުރަމުން އަންނަކަމަށެވެ.
މި މަހުގެ ކުރީކޮޅު ވެސް ޖަޕާނުން ވަނީ އަށް މިލިއަން ރުފިޔާގެ އެހީދީފަ އެވެ. އެ އެހީ އޭރު ދީފައިވަނީ ޔުނިސެފާއި މޯލްޑިވްސް ރެޑް ކްރެސެންޓަށެވެ.
