ބޭރު ގައުމުތަކުގައި ރާއްޖޭން ގާއިމްކޮށްފައިވާ ކޮންސިއުލޭޓެއްގެ ވެރިޔަކަށް ފުރަތަމަ ފަހަރަށް އައްޔަން ކުރި ވެރިޔަކަށް އާމިނަތު އަބްދުﷲ ދީދީ ހަމަޖައްސައިފި އެވެ.
ފޮރިން މިނިސްޓްރީން ބުނީ އާމިނަތު އަބްދުﷲ ދީދީ އަށް ޓްރިވެންޑްރަމްގެ ކޮންސުލް ޖެނެރަލްގެ މަގާމުގެ ފަތްކޮޅު ހަވާލުކުރެއްވީ ފޮރިން މިނިސްޓަރު އަބްދުﷲ ޝާހިދު ކަމަށެވެ.
އާމިނަތު އަބްދުﷲ ދީދީ ކުރިން ހުންނެވީ މިނިސްޓްރީ އޮފް ފޮރިން އެފެއާޒްގެ ޕާމަނަންޓް ސެކްރެޓަރީގެ މަގާމުގަ އެވެ. އޭނާ ޚާރިޖީ ދާއިރާގައި އޭނާ 17 އަހަރަށް ވުރެ ދިގު މުއްދަތަކަށް ހިދުމަތް ކުރެއްވި އިރު ފޮރިން މިނިސްޓްރީގެ ޑިރެކްޓަރު ކަމާއި އެހެން ބައެއް މަގާމުތައް ފުރުއްވި އެވެ.
އޭނާ ވަނީ ބިޒްނަސް މެނޭޖްމަންޓްގެ ދާއިރާއިން އިންޑިއާގެ ބެންގަލޫރުގެ ޔުނިވަރސިޓީއިން ބެޗެލާސް ޑިގްރީ ހާސިލްކުރައްވައި، އިންޓަނޭޝަނަލް ރިލޭޝަންސްގެ ދާއިރާއިން އޮސްޓްރޭލިއާގެ މޮނާޝް ޔުނިވާސިޓީއިން މާސްޓާސް ޑިގްރީ ހާސިލުކުރައްވާފަ އެވެ.
ބޭރު ގައުމެއްގައި ރާއްޖެއިން ފުރަތަމަ ފަހަރަށް ގާއިމް ކުރި ކޮންސިއުލޭޓް ޖެނެރަލްގެ މަގާމަށް އަންހެން ބޭފުޅަކު އައްޔަން ކުރި އިރު، ބޭރުގައިވާ ރާއްޖޭގެ 17 ޑިޕްލޮމެޓިކް މިޝަންގެ ތެރެއިން އަށް މިޝަނެއް ހިންގަވަން ތިއްބެވީ އަންހެން ބޭފުޅުންނެވެ.