އާ އަހަރާ ދިމާކޮށް، ޕެޓްރޯލް ކުރުން ފުލުހުން އިތުރުކޮށްފި

އާ އަހަރު ފެށުމާ ދިމާކޮށް، ޕެޓްރޯލް ކުރުން ފުލުހުން އިތުރުކޮށް، ގާނޫނާއި ގަވާއިދާ ޚިލާފު އަމަލުތައް ހުއްޓުވުމުގެ ޚާއްސަ މަސައްކަތްތަކެއް ފަށައިފި އެވެ.

އާ އަހަރު ފެށުމާ ދިމާކޮށް، ފުލުހުން މިހާރު ކުރިއަށް ގެންދާ އޮޕަރޭޝަން "ރިވެތި" އާ ގުޅޭ މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމެއްގައި، ފުލުހުން ބުނީ ޕެޓްރޯލް ކުރާ އަދަދު މިހާރު އިތުރުކޮށް، ޕެޓްރޯލް ކުރާ އުސޫލަށް ވެސް ބަދަލުތަކެއް ގެނެސްފައިވާ ކަމަށެވެ. އިސްކަންދަރު ކޮށީގައި ބޭއްވި ނިއުސް ބްރީފިންގައި ފުލުހުން ބުނީ، ޕެޓްރޯލް ކުރުމުގެ ތެރޭގައި، ވެހިކަލްގެ ސްޓިކާތައް ހަމަތޯ ބަލައި އެ އުޅަނދުތައް ރަނގަޅަށް ފާސްކުރާނެ ކަމަށެވެ.

ޓްރެފިކް ޕޮލިސްގެ ހެޑް، ސުޕްރިޓެންޑެންޓު އޮފް ޕޮލިސް ހުސައިން ސަމީރު ވިދާޅުވީ، 2020 އަށް މަރުހަބާ ކިޔަން ހިންގާ ހަރަކާތްތަކާ ދިމާކޮށް، މިދިޔަ ހަފުތާގެ އާދިއްތަ ދުވަހުން ފެށިގެން މާލެ ސަރަހައްދުގައި ހާއްސަ އޮޕަރޭޝަނެއް ކުރިއަށް ގެންދާ ކަމަށެވެ.

އެ އޮޕަރޭޝަނުގެ ތެރެއިން، ގިނަ އަދަދެއްގެ ވެހިކަލާއި މީހުން ބަލައި ފާސްކޮށްފައިވާ ކަމަށް ވިދާޅުވި އެވެ.

ސަމީރު ވިދާޅުވި ގޮތުގައި، މާލެތެރޭގެ ސަލާމަތީ ކަންކަން ވަރުގަދަކޮށް، ކުށްކުރުން އިތުރުވާ ކަމަށް ބެލެވޭ ސަރަހައްދުތަކުގައި މިހާރު ފުލުހުން ގިނައިން ހަރަކާތްތެރިވާނެ އެވެ. އޭގެ ތެރެއިން ޝައްކު ކުރެވޭ މީހުން ހުއްޓުވައި ސުވާލު ކުރާނެ ކަމަށް އޭނާ ވިދާޅުވި އެވެ.

ސަމީރު ވިދާޅުވީ، އެ އޮޕަރޭޝަނުގެ ތެރެއިން މިހާތަނަށް 6،857 އުޅަނދެއް ވަނީ ފާސްކޮށްފަ އެވެ. އަދި 908 މީހުން ފާސްކޮށް، ފޭރުމަށް ބޭނުންކުރާ އާލާތްތަކާއި އާ އަހަރު ފާހަގަކުރުމާ ދިމާކޮށް، އެކި ފަރާތްތަކުން ހިންގާ ފަންޑްރައިޒިންގެ ހަރަކާތްތަކުގެ ތެރެއިން ފޭރިފައިވާ ފައިސާ އާއި ބަނގުރަލާއި މަސްތުވާތަކެތި އަތުލައިގަނެފައިވާ ކަމަށް ވިދާޅުވި އެވެ. އޭގެ އިތުރުން ކުށް ހިންގާ ކަމަށް ފާހަގަކުރެވޭ ތަންތަން އޮޕަރޭޝަނުގައި ބަލައި ފާސްކޮށް މަސައްކަތް ކުރަމުން އަންނަ ކަމަށް ވިދާޅުވި އެވެ.

"ޝައްކު ކުރެވޭ ފަރާތްތައް ހުއްޓުވައި ހަށިގަނޑު ބަލައި ފާސްކުރުމާއި މަގުމަތިން އުޅަނދުފަހަރު ފާސްކުރުމާއި ކެފޭ ރެސްޓޯރެންޓުތައް އަދި ގެސްޓް ހައުސް، ޝައްކު ކުރެވޭ ތަންތަން ބަލައި އަޅަންޖެހޭ އެންމެހައި ފިޔަވަޅުތައް މި ގެންދަނީ އަޅަމުން،" ސަމީރު ވިދާޅުވި އެވެ.

ހުޅުމާލޭގެ ނެއިބަހުޑް ޕޮލިސްގެ ހެޑް، ސަބް އިންސްޕެކްޓާ އޮފް ޕޮލިސް މުހައްމަދު އިސްމާއިލް ވިދާޅުވީ އާ އަހަރު ފާހަގަ ކުރުމާ ދިމާކޮށް، ހިންގާ ޖިނާއީ ކުށްތައް ހުއްޓުވަން ހުޅުމާލޭގެ އެކި ސަރަހައްދުތަކުގައި ފުލުހުން ހަރަކާތްތެރިވާނެ ކަމަށެވެ. އަދި ކުށްކުރާ މީހުންނާ ދެކޮޅަށް ގާނޫނީ ފިޔަވަޅު އަޅާނެ ކަމަށް އޭނާ ވިދާޅުވި އެވެ.

އެކި ވަގުތު ތަކުގައި ހުޅުމާލޭގައި ފުލުހުން ހަރަކާތްތެރިވާއިރު، ހާއްސަކޮށް ރޭގަނޑު ވަގުތުގައި ފުލުހުންގެ ހަރަކާތްތައް އިތުރުވާނެ ކަމަށް އިސްމާއިލް ވިދާޅުވި އެވެ. އޭގެ ތެރޭގައި ހުޅުމާލޭގެ ފޭސް ދޭއް އަދި އިންޑަސްޓްރިއަލް ޒޯން ހިމެނެ އެވެ.

"މީހުން ނޫޅޭ އެކަހެރި ސަރަހައްދުތަކުގައި ބަލައި ފާސްކުރާނެ. މިގޮތުން އެ ތަންތަނުގައި އާއްމު އިޖުތިމާއީ މިންގަނޑުތަކާ ހިލާފަށް އެއްވެސް ކަމެއް ހިންގާ ފަރާތްތަކާ ދެކޮޅަށް ފިޔަވަޅު އަޅާނެ ކަމަށް ދަންނަވަން،" އިސްމާއިލް ވިދާޅުވި އެވެ.

ކްރައިމް ޕްރިވެންޝަން އަދި ޕަބްލިކް އެފެއާޒް ޑިޕާޓްމަންޓުގެ ގެ ހެޑް، ޗީފް އިންސްޕެކްޓާ އޮފް ޕޮލިސް ފާތިމަތު ނަޝްވާ ފާއިތުވި ދެ އަހަރާ އަޅާ ބަލާއިރު، އާ އަހަރާ ދިމާކޮށް ކުދިކުދި ވައްކަން މިއަހަރު އިތުރު ވެފައިވާ ކަމަށެވެ. އެ ކަންކަމަށް އާއްމުން ހޭލުންތެރިކުރުވަން ކެމްޕެއިންތަކެއް ހިންގަމުން އަންނަ ކަމަށް ވިދާޅުވި އެވެ.

ނަޝްވާ ވަނީ، މިއީ ސްކޫލް ޗުއްޓީ ދުވަސްވަރަށް ވުމުން، ރަށުން ބޭރަށް ދާއިރު ގެތައް ތަޅުލުމަށް ހާއްސަ ސަމާލުކަން ދިނުމަށް އެދިވަޑައިގެންފަ އެވެ. އަދި ގެސްޓް ހައުސްތަކާއި ހޮޓާތަކުގައި ތިބޭއިރު، އަގުބޮޑު ސާމާނާއި ތަކެއްޗަށް ވީހާ ވެސް ބޮޑަކަށަް ސަމާލުކަން ދިނުމަށް އެދިވަޑައިގަތެވެ.