ކޮކޯ ބޮޑު ހިތި ރިސޯޓުން ރާއްޖޭގެ ފުރަތަމަ ފްލޯޓިން ޔޯގާ ސްޓޫޑިއޯ މި އަހަރުގެ މާޗު މަހު ހުޅުވަން ތައްޔާރުވެއްޖެ އެވެ.
މި ސްޓޫޑިއޯ އަކީ ބޮޑު ހިތި ރިސޯޓު ހިންގާ ކުންފުނި "ކޮކޯ ކަލެކްޝަން" އާއި ޗައިނާގެ ވެރިރަށް ބެއިޖިން އަށް ނިސްބަތްވާ ކުންފުންޏެއް ކަމަށްވާ "އަކުއާއެކްސް އެކެޑެމީ" އާ ގުޅިގެން ހުޅުވާ ސްޓޫޑިއޯއެކެވެ. މި ކުންފުންޏަކީ ޗައިނާގައި ވެސް ފުރަތަމަ ފަހަރަށް ފްލޯޓިން ޔޯގާ ސްޓޫޑިއޯއެއް ހުޅުވި ކުންފުންޏެވެ.
މި ސްޓޫޑިއޯ ހަދާފައި ހުންނާނީ މޫދު ކުޅިވަރުގެ ތެރޭގައި ހިމެނޭ، ފަލި ޖަހައިގެން ދުއްވާ ބޯޑުތައް ބޭނުންކޮށްގެންނެވެ. މި ބޯޑުތައް ބަހައްޓާފައި ހުންނާނީ މޫދުގެ ވަކި ފުންމިނެއްގައި އިންސާނެއްގެ ބަރުމިން ހިފެހެއްޓޭ ގޮތަށެވެ.
އާންމު ޔޯގާއާ ހިލާފަށް ފްލޯޓިން ޔޯގާގައި ސަމާލުކަން ދޭންޖެހޭ މިންވަރު ބޮޑުވާނެ އެވެ. މިކަމުގެ ސަބަބުން ޔޯގާ އިން އިން ލިބޭ ފައިދާގެ އިތުރަށް ފްލޯޓިން ޔޯގާ އިން ފައިދާ ވާނެ އެވެ. ކޮކޯ ބޮޑު ހިތިން ބުނި ގޮތުގައި މި ސްޓޫޑިއޯގެ ސަބަބުން ކަސްރަތު ކުރުމުގެ މުޅިން ތަފާތު ގޮތެއް އެ ރިސޯޓަށް އަންނަ ޓޫރިސްޓުންނަށް ތަޖުރިބާ ކުރެވޭނެ އެވެ.
"އެކުއާއެކްސް އެކެޑެމީ އަކީ ފިޓްނެސް އިންޑަސްޓްރީގެ ލީޑަރުންނަށް ވެފައި އެ ކުންފުންޏާއެކު ރާއްޖޭގެ ފުރަތަމަ ފްލޯޓިން ޔޯގާ ސްޓޫޑިއޯ ހުޅުވޭތީ އަޅުގަނޑުމެން މި ތިބީ ވަރަށް އުފަލުން. މީގެ ސަބަބުން އަޅުގަނޑުމެންގެ ރިސޯޓަށް އަންނަަ ޓޫރިސްޓުންނަށް ރާއްޖޭގެ މޫދުގެ ރީތިކަން ތަފާތު ގޮތަކަށް ތަޖުރިބާ ކޮށްލެވޭނެ،" ކޮކޯ ބޮޑު ހިތި ރިސޯޓުގެ ޑިރެކްޓާ އޮފް މާކެޓިން ޝަފާ ޝަބީރު ވިދާޅުވި އެވެ.
ސްޓޫޑިއޯ ހުޅުވުމާ ގުޅުވައިގެން މާޗު 15-19 އަށް ބޮޑު ހިތި ރިސޯޓުން ޔޯގާ ރިޓްރީޓް ޕްރޮގްރާމެއް ވެސް ކުރިއަށްގެންދާނެ އެވެ. މި ޕްރޮގްރާމުގައި ތަމްރީނު ދޭނީ އެކުއެކްސް އެކެޑެމީގެ ތަޖުރިބާކާރު މީހުންނެވެ.