ކުޅުދުއްފުށީ ކުޅީގެ ބާކީ އޮތް ސަރަހައްދު ހިމާޔަތްކުރަން ގޮވާލައިފި

ހދ. ކުޅުދުއްފުށީ ކުޅީގެ ބާކީ އޮތް 30 ޕަސެންޓު، އަވަސް ފިޔަވަޅުތަކެއް އަޅައި ހިމާޔަތްކުރަން ހިއުމަން ރައިޓްސް ވޮޗުން ގޮވާލައިފި އެވެ.

މޫސުމަށް އަންނަ ބަދަލުތަކާ ގުޅިގެން ނުރައްކަލަކަށް ހުށަހެޅިފައިވާ ރާއްޖޭގެ ރަށްތަކުގެ ތެރެއިން ކުޅުދުއްފުށީގައި އޮތް ކުޅީގެ 70 ޕަސެންޓް އެއާޕޯޓް އަޅަން 2018 ގައި ނެތިކޮށްފައިވާ ކަމުގެ ކަންބޮޑުވުން އެ ޖަމިއްޔާ އިން ފާޅުކުރި އެވެ. ކުޅުދުއްފުށި މިހާރު ސިޓީއަކަށް ބަދަލުކޮށްފައިވާ އިރު، ކުޅީގެ ދެން އޮތް ސަރަހައްދަށް ގެއްލުންވާ ގޮތަށް މި ސަރުކާރުން ޕްލޭންތައް ހެދުމުގެ ވިސްނުން ގެންގުޅޭ ކަމުގެ ހިތްހަމަނުޖެހުން ފާޅުކޮށްފައިވެ އެވެ.

ކުޅުދުއްފުށީގެ ކުޅީގެ ބާކީ އޮތް ސަރަހައްދަށް ގެއްލުންވާ ގޮތަށް ތަރައްގީގެ އެއްވެސް ކަމެއް ކުރަން އުޅޭ ކަމަކަށް މި ފަހުން ސަރުކާރުން ބުނެފައެއް ނުވެ އެވެ.

ރަށްރަށުގައި ފެންބޮޑުވުމާއި ސުނާމީ އަދި އެހެން ވެސް ގުދުރަތީ ކާރިސާތަކުން ރަށްތައް ހިމާޔަތްކޮށްދިނުމުގައި ކުޅީގެ ހިއްސާބޮޑުކަން ފާހަގަކޮށް، ކުޅުދުއްފުށީގެ ކުޅިން ބޮޑު ބައެއް ހަލާލުކޮށްލުމުން އެ ރަށް ގުދުރަތީ ގޮތުން ނުރައްކަލަށް ހުށެޅިފައިވާ ކަމަށް އެ ޖަމިއްޔާ އިން ބުނެފައިވެ އެވެ.

ތަރައްގީއަށްޓަކައި ކުޅީގެ ބޮޑު ބައެއް ހަލާލުކޮށްލި ފަހުން، ބޯކޮށް ވާރޭވެހޭ ދުވަސްތަކުގައި ރަށުގައި އާދަޔާ ޚިލާފަށް ފެންބޮޑުވާ ކަން ފާހަގަކޮށްފައިވެ އެވެ. އަދި ކުރިއަށް ވުރެން ގިނަ ގެތަކުގައި ފެންބޮޑުވަމުންދާ ކަމަށް ވެސް ކުޅުދުއްފުށީގެ ރައްޔިތުންނާ ހަވާލާދީ އެ ޖަމިއްޔާ އިން ބުނެފައިވެ އެވެ.

ކުޅިތައް ނެތިވެ ހަލާކުވެގެން ދިއުމަކީ ރަށްގިރުމާއި ފެންބޮޑުވުން ފަދަ މައްސަލަތަކުން ރައްޔިތުންނަށް އިތުރު ގެއްލުންތަކެއް ކުރިމަތިވާނެ ކަމެއް ކަމަށާއި މޫސުމަށް އަންނަ ބަދަލުތަކުގެ ސަބަބުން ނުރައްކަލަކަށް ހުށަހެޅިފައިވާ ރައްޔިތުންނަށް އިތުރު ގެއްލުންތައް ކުރިމަތިނުވާނެ ގޮތަކާ މެދު ސަރުކާރުން ވިސްނަން ޖެހިފައިވާ ކަން ހިއުމަން ރައިޓްސް ވޮޗް އިން ހަނދާންކޮށްދީފައިވެ އެވެ.

ކުރީގެ ސަރުކާރުން ތިމާވެއްޓަށް، ދިން ފަދަ ގެއްލުންތަކާ ދުރުވެ ހިމާޔަތް ކުރުމުގެ ވައުދު ރައީސް އިބްރާހިމް މުހައްމަދު ސޯލިހްގެ ސަރުކާރުން ވި ގޮތަށް ކުޅުދުއްފުށީގެ ކުޅި ހިމާުޔަތްކޮށް ރައްކާތެރިކަން ޖެހޭ ކަމަށް ބުނެފައިވެ އެވެ.

ކުޅުދުއްފުށީ ކުޅިއަކީ ރާއްޖޭގައި އޮތް އެންމެ ބޮޑު މަށިކުޅީގެ އިތުރުން ރާއްޖޭން ނެތުމުގެ ބިރު އޮތް ގިނަ ގަސްތަކެއް ވެސް ހިމެނޭ ސަރަހައްދެކެވެ.

ކުޅުދުއްފުށީގައި އެއާޕޯޓް އަޅަން ކުޅި ހިއްކުމަށް ކުރީގެ ސަރުކާރުން ނިންމުމުން އެކަން ހުއްޓުވަން ތިމާވެށީގެ ޖަމިއްޔާތަކުން ގިނަ މަސައްކަތްތަކެއް ކުރި އެވެ. ކޯޓަށް ވެސް މައްސަލަ ހުށަހެޅި އެވެ. ނަމަވެސް އެކަމަށް ބެލުމެއް ނެތި އެއާޕޯޓް މަޝްރޫއު ކުރިއަށް ގެންދިޔަ އެވެ.

އެ ކުޅި ސަލާމަތްކުރެވޭނެ ގޮތެއް ހޯދަން، މެންގްރޫވް އެކްޝަން ޕްރޮޖެކްޓާއި އިންޓަނޭޝަނަލް ޔޫނިއަން ފޯ ކޮންޒިވޭޝަން އޮފް ނޭޗާ (އައިޔޫސީއެން) ގެ ސައިސިސްޓުންތަކެއް މިދިޔަ އަހަރުގެ ތެރޭގައި ކުޅި އަށް ގޮސް ދިރާސާތަކެއް ހެދި އެވެ.