ފިިލައިގެން އުޅުނު މައްސަލާގައި ލުތުފީގެ މައްޗަށް ދައުވާކޮށްފި

ނޮވެމްބަރު، 3 1988 ގައި ރާއްޖެ އަށް ދިން އުދުވާނީ ހަމަލާގައި އިސްކޮށް ހަރަކާތްތެރިވި އަބްދުﷲ ލުތުފީ ފިލައިގެން ރާއްޖެ އިން ބޭރުގައި އުޅުނު މައްސަލާގައި އޭނާގެ މައްޗަށް ދައުވާކޮށްފި އެވެ.

އުމުރު ދުވަހުގެ ޖަލު ހުކުމެއް ތަންފީޒުކުރަމުން ދަނިކޮށް ލުތުފީ ރާއްޖެ އިން ބޭރަށް ކުރީގެ ރައީސް މުހައްމަދު ނަޝީދުގެ ވެރިކަމުގައި 2010 ވަނަ އަހަރު ފޮނުވީ ބޭސްފަރުވާއަށެވެ. އޭގެ ފަހުން ލުތުފީ ފިލައިގެން އުޅުނީ ސްރީ ލަންކާގަ އެވެ. އެކަމަކު ލަންކާގައި ހުންނަ ރާއްޖޭގެ އެމްބަސީ އަށް މިދިޔަ އަހަރު ލުތުފީ ގޮސް ހިމާޔަތް ހޯދުމުން އޭނާ ރާއްޖެ ގެނެސް، ވަނީ އަނބުރާ ޖަލަށް ގެންގޮސްފަ އެވެ. އޭނާ ފިލައިގެން އުޅުނު މައްސަލަ އޭރު ފުލުހުން ބެލި އެވެ.

ޕްރޮސިކިއުޓާ ޖެނެރަލްގެ އޮފީހުން މިއަދު ބޭއްވި ނޫސްވެެރިންގެ ބައްދަލުވުމުގައި ޕީޖީ ހުސައިން ޝަމީމް ވިދާޅުވީ ލުތުފީގެ މައްސަލަ އެ އޮފީހަށް ފޮނުވުމުން އެ މައްސަލާގައި މިހާރު ދައުވާ ކޮށްފައިވާ ކަމަށެވެ. އެކަމަކު ލުތުފީ އަށް ކުރީ ކޮން ދައުވާއެއްކަން އޭނާ ހާމައެއް ނުކުރައްވަ އެވެ. އެކަމަކު މައްސަލައިގެ ތަފްސީލު ފަހުން ހާމަ ކުރާނެ ކަމަށް ވެސް ޝަމީމް ވިދާޅުވި އެވެ.

"އަޅުގަނޑު މިބަލަނީ މިހާރު އެ މައްސަލަ ޝަރީއަތަށް ހުށަހެޅިފައި އޮންނާނެ ކަމަށް. އަޅުގަނޑުމެން އެ ތަފްސީލުތައް ފަހުން އަރުވާނަން،" ޝަމީމް ވިދާޅުވި އެވެ.

ލަންކާގެ ޕްލޯޓް ޖަމާއަތާ ގުޅިގެން ރާއްޖެއަށް ދިން އުދުވާނީ ހަމަލާގައި 19 ދިވެއްސަކު ޝަހީދުކޮށްލައި، ހިނގި އެ ހާދިސާގައި ލުތުފީ އާއި އިތުރު ބަޔަކު މަރަން ހުކުމްކުރި އެވެ. އެކަމަކު އޭރުގެ ރައީސް މައުމޫން އަބްދުލްގައްޔޫމް ފަހުން ވަނީ ހުރިހާ އެންމެންގެ މަރުގެ އަދަބު އުމުރު ދުވަހުގެ ޖަލު ހުކުމަކަށް ބަދަލުކޮށް ދެއްވައިފަ އެވެ.