ކަމިޝަނާ އޮފް ޕޮލިސް މުހައްމަދު ހަމީދު އޮސްޓްރޭލިއާ އަށް މިހާރު ކުރައްވަމުން ގެންދަވާ ދަތުރުގައި އެ ގައުމުގެ މަރުކަޒީ ފުލުހުންގެ ވެރިންނާ ބައްދަލުކުރައްވައިފި އެވެ.
ފުލުހުން ބުނީ ހަމީދުގެ ދަތުރުގައި އޮސްޓްރޭލިއާ ފެޑެރަލް ފުލުހުންގެ ކަމިޝަނަރު ރީސް ޕީ ކާޝޯވް އާއި އެހެން ބައެއް އިސް އޮފިިސަރުންނާ އިއްޔެ ބައްދަލުކުރައްވައި މަޝްވަރާކުރެއްވި ކަމަށެވެ.
ސީޕީ ހަމީދު ކުރެއްވި ޓްވީޓެއްގައި ވިދާޅުވީ އޮސްޓްރޭލިއާ ވެރިރަށް ކެންބެރާގައި ހުންނަ އެ ގައުމުގެ ފުލުހުންގެ ހެޑްކުއާޓަރުގައި ކަމިޝަނާ ރީސް ޕީ ކާޝޯވްއާ އެކު ބޭއްވެވި ބައްދަލުވުމުގައި މަޝްވަރާކުރެއްވީ ފުލުހުންގެ ގާބިލުކަން އިތުރުކުރުމާއި ދެ ގައުމުގެ ފުލުހުންގެ މަސްލަހަތު އޮންނަ ގިނަ ދާއިރާތަކަކުން ގުޅުން ބަދަހިކުރަން ކަމަށެެވެ.
އޮސްޓްރޭލިއާ އަކީ ރާއްޖޭގެ ފުލުހުން ތަމްރީނުކުރުމަށް ވަރަށް ބޮޑަށް އެހީވާ ގައުމެކެވެ. ހަރުކަށި ފިކުރާ ދެކޮޅަށް ފުލުހުން ކުރާ މަސަައްކަތްތަކުގެ އެންމެ މުހިއްމު ބައިވެރިންނަކީ އޮސްޓްރޭލިއާ ފުލުހުންނެވެ. އެގޮތުން ދެ ގައުމުގެ ފުލުހުން ގުޅިގެން މިދިޔަ އަހަރު ފޯރަމެއް ވެސް ބޭއްވި އެވެ.
އެ ފޯރަމް ފެށުމަށް އޭރު ބޭއްވި ރަސްމިއްޔާތުގައި ސީޕީ ހަމީދު ވިދާޅުވީ، ޓެރަރިޒަމް ހުއްޓުވަން ކުރާ މަސައްކަތުގައި ރާއްޖެއާ އެއް ވިސްނުމުގެ ގައުމުތަކުގެ ބައިވެރިވުން ވެސް ބޭނުންވާ ކަމަށެވެ. އެގޮތުން، އިޖުތިމާއީ ފެންވަރުގައި އިސްނަގައިގެން ކުރާ މަސަައްކަތްތަކަށް ފަންޑު ކުރުމަށް ފުޅާ ދާއިރާއެއްގައި ތަފާތު ފަރާތްތަކުގެ ބައިވެރިވުން އުފައްދަން ޖެހޭ ކަމަށް ހަމީދު ވިދާޅުވި އެވެ.