ކޮންމެހެން ފޮނުވަން ޖެހިގެން ނޫނީ މި ދުވަސްވަރު ގޭގެއަށް ތަށިބަރި ފޮނުވުން ހުއްޓާލަން އެޗްޕީއޭއިން އިލްތިމާސްކޮށްފި އެވެ.
ކޮވިޑް-19އާ ގުޅިގެން މިރޭ ބޭއްވި ނޫސްވެރިންގެ ބައްދަލުވުމުގައި ތަރުޖަމާން މަބްރޫކް އަޒީޒާއި ޑރ. އިބްރާހިމް އަފްޒަލް ވެސް ވަނީ މިކަމުގެ ނުރައްކާތެރިކަން ފާހަގަކުރައްވައި އެކަން ނުކުރުމަށް ގޮވާލައްވައިފަ އެވެ.
ޑރ. އަފްޒަލް ވިދާޅުވީ މިހާރު އޮތް ހާލަތަށް ބަލާއިރު، ގޭގޭގައި ބަލި ޖެހިފައި ހުރި މީހަކު ހުއްޓަސް ނޭނގޭނެ ކަމަށެވެ. އެމީހާގެ ފުށުން ގޭގައި ތިބި މީހުންނަށް ބަލި ޖެހޭނެ ކަމަށާއި އެއީ ހުއްޓުވޭނެ ކަމެއް ނޫން ކަމަށް ވިދާޅުވި އެވެ.
އެހެންނަމަވެސް، އެއް ގެއިން އަނެއް ގެއަށް އެ ބަލި ދިޔުން ހުއްޓުވިދާނެ ކަމަށާއި އެއް ގެއިން އަނެއް ގެޔަށް ދިއުން ހުއްޓާލަފައިވާ ގޮތަށް ކޮންމެހެން ފޮނުވަން ޖެހިއްޖެ ހާލަތެއްގައި ނޫނީ ތަށިބަރު ބަދަލު ނުކުރުމަށް އިލްތިމާސްކުރެއްވި އެވެ.
ތަށި ބަރި ފޮނުވާ ނަމަ ވެސް އެއާ މެދު އަމަލު ކުރާނީ ހަމަ ބޭރުން ގެންނަ އެހެން އެއްޗިއްސާ މެދު ވެސް އަމަލު ކުރާ ގޮތަށް ކަމަށް ޑރ. އަފްޒަލް ވިދާޅުވި އެވެ. އެގޮތުން ދޮވެވޭ އެއްޗެއް ނަމަ ބޭރު ރަނގަޅަށް ދޮވުން އަދި ކޮންޓެއިނާއެއް ނަމަ އަމިއްލަ ގޭގައި ބޭނުންކުރާ ތައްޓަކަށް ބަދަލުކޮށް އެ ކޮންޓެއިނާއެއް އަވަހަށް އެއްލާލުމަށް ޑރ. އަފްޒަލް އިލްތިމާސް ކުރެއްވި އެވެ.
"އަޅުގަނޑުމެންނަކަށް ނޭނގޭނެ ހަގީގަތުގައި ހާއްސަކޮށް އެ ސިމްޓޮމެޓިކް މީހުން އެހާ ގިނައިން ތިބޭއިރު ގޭގައި ބަލި މީހަކު އުޅޭ ކަމެއް، އޭނާގެ ގޭގެ މީހުންނަށް ބަލި ޖެހުމަކީ އޭނާއަކަށް ހުއްޓުވޭނެ ކަމެއް ނޫން، އެހެންނަމަވެސް އެއް ގެއިން އަނެއް ގެއަށް ތަށިބަރި އެއްޗެހި ފޯރުކޮށްދިނުމުގެ ކަންތައް ކުރިއަށް ގެންދާނަމަ އެއް ގެއިން އަނެއް ގެއަށް ބަލި ދިއުމުގެ ފުރުސަތު އިތުރުވެގެންދާނެ،" ޑރ. އަފްޒަލް ވިދާޅުވި އެވެ.
މިކަމާ ގުޅިގެން މަބްރޫކް ވިދާޅުވީ ރަމަޟާން މަސް ކަމުން ދިވެހިންގެ އާދަކާދައިގެ ތެރެއިން ގޭގެއަށް ތަށިބަރި ފޮނުވާތަން އަދިވެސް ފެންނަމުންދާ ކަމަށެވެ. އެހެންނަމަވެސް ތަށިބަރި ފޮނުވާއިރު އޭގެ ޒަރިއްޔާއިން ވެސް ވައިރަސް ދަތުރުކުރާނެ ކަން ގަބޫލްކުރަން ޖެހޭ ކަމަށް ވިދާޅުވި އެވެ. އޭރުން ހަމަ މީހާ ގޭގެއަށް ދިއުމެކޭ އެއްފަދަ ވީ ކަމަށާއި އެހެންވީމާ އެކަން ކުރުން ހުއްޓާލަން ޖެހޭ ކަމަށް ވިދާޅުވި އެވެ.
މާލެއިން ކޮވިޑް-19ގެ ފުރަތަމަ ކޭސް ފެނުމާ އެކު މުޅި މާލެ ލޮކްޑައުންކޮށްފައި ވާއިރު، ވިޔަފާރި ބޭނުމަށާއި މި ނޫން ވެސް ކަންކަމުގައި ދޫކޮށްފައިވާ ވަކި ހާއްސަ ފާސްތަކަކަށް ވަކި ވަގުތެއްގައި ނޫނީ ބޭރަށް ނިކުމެ އުޅުން ވަނީ މަނާކޮށްފަ އެވެ.
ކޮވިޑް-19 ޖެހިގެން ރާއްޖެއިން މިހާރު ތިން މީހުން މަރުވެފައިވާއިރު، 648 މީހުން ގައިން މިބަލި ވަނީ ފެނިފަ އެވެ.
