އައިޖީއެމްއެޗުގައި ކޮވިޑް ފެތުރުނީ އުސޫލަށް ގެނައި ބަދަލަކުން!

ސަރުކާރުގެ މައި ހޮސްޕިޓަލް، އައިޖީއެމްއެޗުގައި ކޮވިޑް-19 ފެތުރުނީ އެޑްމިޓްވާ އެންމެން ޓެސްޓް ކުރަމުން އައި އުސޫލަށް ގެނައި ކުއްލި ބަދަލަކާ އެކު ޓެސްޓްކުރުމެއް ނެތި ފަރުވާ ކުރިއަށް ގެންދަން ނިންމުމުން ކަމަށް "މިހާރު"އަށް އެނގިއްޖެ އެވެ.

ކޮންމެ ދުވަހަކު ގިނަ ބަޔަކު ޚިދުމަތް ހޯދާ ހޮސްޕިޓަލުގައި، ބަލި މީހުންނާއި ޑޮކްޓަރުންނާއި ނަރުހުން ހިމެނޭ ގޮތުން 11 މީހަކު ކޮވިޑް-19އަށް ޕޮޒިޓިވްވީ އިންފެކްޝަން ކޮންޓްރޯލްކުރަން ކުރިން ވެސް ފިޔަވަޅުތައް އަޅައި، ޚާއްސަ އުސޫލްތަކަކަށް އަމަލުކުރަމުން ދަނިކޮށެވެ. ހޮސްޕިޓަލުގައި ބަލި ފެތުރުމަކީ އެ ހޮސްޕިޓަލުގެ ޑޮކްޓަރުންނާއި ނަރުހުންނާއި އެހެން މުވައްޒަފުންނާއި ބަލި މީހުންނާއި ބަލި މީހުންގެ އާއިލާތަކާއި ފަރުވާ ހޯދަން ދާ މީހުންނާއި ހޮސްޕިޓަލަށް ޒިޔާރަތްކުރާ މީހުން ބައްޔަށް ހުށަހެޅުމުގެ ފުރުސަތު އޮތް ކަމަކަށް ވާތީ މިހާރު އަންނަނީ އަނެއްކާވެސް ވަރުގަދަ ފިޔަވަޅުތަކެއް އަޅަމުންނެވެ.

ކޮވިޑް-19 އިން ރައްކާތެރިވާން އެ ހޮސްޕިޓަލްގައި ކުރިން އަމަލުކުރަމުން އައި ގޮތަކީ، އެޑްމިޓްކުރާ އެންމެން ކޮވިޑަށް ޓެސްޓް ކުރުމެވެ. މާލޭގައި ކޮމިއުނިޓީ ސްޕްރެޑެއް ފެށުމާ އެކު އަމަލުކުރަން ފެށި މި އުސޫލު ސާކިއުލާއަކުން ލުއިކޮށްލީ، އެނގިފައިވާ ގޮތުގައި، ކޮވިޑް ޓެސްޓްކޮށް ނަތީޖާ ލިބެންދެން ކުޑަކުއްޖެއްގެ ސާޖަރީއެއް ހެދުން މަޑުޖައްސާލުމުން، އެ ކުއްޖާގެ ގުނަވަނެއް ނަގަން ޖެހުނު ހާދިސާއާ ގުޅިގެންނެވެ.

އެ ސާކިއުލާގައި އެންގީ ސީރިއަސް ނޫން ހާލަތްތަކުގައި ވެސް ކޮވިޑަށް ޓެސްޓްނުކޮށް، ފަރުވާ އާއި އެޑްމިޓްކުރުން ވެސް ކުރިއަށް ގެންދާށެވެ.

ކުޅިވަރުގައި މަޝްހޫރު، ހުސެއިން ހަލީމް (ކުޑަ ހުސެން)ގެ ދަރިފުޅުގެ ގުނަވަނެއް ނެގުމުގައި ހޮސްޕިޓަލުގެ އިހުމާލު އޮތް ކަމަށް ކުރި ތުހުމަތު ހޮސްޕިޓަލުން ދޮގުކުރެ އެވެ. އެއާ އެކު ވެސް އެފަދަ ކަމެއް ތަކުރާރުވިޔަ ނުދޭން ގެނައި ބަދަލާ އެކު، އެޑްމިޓްވުމުގެ ކުރިން ޓެސްޓް ކުރަން އޮންނަ އުސޫލް ދޫކޮށްލީ އެވެ. މިއީ، ބައެއް ޑޮކްޓަރުންނާއި ނަރުހުންގެ ކަންބޮޑުވުން އޭރު ވެސް އޮތް މައްސަލައެކެވެ.

އުސޫލް ލުއިކޮށްލި ފަހުން ދިމާވި ހާދިސާއަކުން ހޮސްޕިޓަލުގެ ތެރޭގައި ކޮވިޑް-19 ފެތުރި މިހާތަނަށް ވަނީ 11 ޕޮޒިޓިވް ކޭސް ފެނިފަ އެވެ. އެއީ، ފަސް ބަލި މީހުންނާއި ހަތަރު ސްޓާފުން ކަމަށް އައިޖީއެމްއެޗުން ބުންޏެވެ.

އޭގެ ތެރޭގައި، ސްޕެޝަލައިޒްވާން ބޭރުގައި ހުރެފައި، ކޮވިޑާ ގުޅިގެން އެހީތެރިކަން ފޯރުކޮށްދޭން އައި އައިޖީއެމްއެޗުގެ އޮންކޮލޮޖިސްޓެއް ވެސް ހިމެނެ އެވެ. ގިނަ އަދަދެއްގެ ނަރުހުން ހިމެނޭ ގޮތުން ގާތްގަނޑކަށް 27 މުވައްޒަފުން ވަނީ ހޯމް ކަރަންޓީންކޮށްފަ އެވެ.

އައިޖީއެމްއެޗުގައި ކޮވިޑް-19 ފެތުރުނުކަން އެނގުނީ، އެ ހޮސްޕިޓަލްގެ އައިސީޔޫގައި ކެންސަރު ބައްޔަށް ފަރުވާދެމުން ދިޔަ އިންޑޮނޭޝިއާގެ ފިރިހެނަކު ކޮވިޑް-19 އަށް ޕޮޒިޓިވްވުމާ އެކު، އެހެން ބައެއް މީހުންގެ ޓެސްޓުތައް ހެދުމުންނެވެ. އުމުރުން 39 އަހަރުގެ އެ މީހާ އެ ބައްޔަށް ޕޮޒިޓިވްވިކަން އެނގުނީ މިދިޔަ ބުރާސްފަތި ދުވަހު އޭނާ މަރުވި ފަހުންނެވެ. ކެންސަރު ބަލީގައި ދެވަނަ ސާޖަރީއެއް ހަދަން އެ މީހާ ކޮވިޑް-19 އަށް ޓެސްޓު ކުރި ނަމަވެސް ނަތީޖާ ލިބުމުގެ ކުރިން އޭނާ މަރުވީ އެވެ.

އައިޖީއެމްއެޗުގައި ފަރުވާ ދެމުން އަންނަ ބަލި މީހުންނާއި މުވައްޒަފުން ވަނީ ކޮންޓެކްޓް ޓްރޭސިން ހަދައިފަ އެވެ. މީގެ ތެރެއިން ބަލި މީހުން ޕޮޒިޓިވްވީ އައިސީޔޫގައި ފަރުވާ ދިނުމަށް ފަހު ވޯޑަށް ބަދަލުކޮށްފައި ވަނިކޮށެވެ.

ހެލްތު އިމަޖެންސީ އޮޕަރޭޝަން (އެޗްއޯސީ)ގައި ރޭ ބޭއްވި ޕްރެސް ކޮންފަރެންސްގައި އައިޖީއެމްއެޗުގެ މެޑިކަލް ޑިރެކްޓަރު ޑރ. އަލީ ނަޒީމް ވިދާޅުވީ އެ ހޮސްޕިޓަލުގެ ވޯޑުތަކުގައި ތިބި ބަލި މީހުން ކޮވިޑަށް ޓެސްޓް ކުރުން އަދިވެސް ކުރިއަށް އެބަ ގެންދާ ކަމަށެވެ.

"ކޮންމެވެސް ވަރަކަށް އެކްސްޕޯޝާވެފައި ތިބި ރިލޭޓިވްސް ވެސް ޓެސްކުރަމުން އެބަދޭ. މުވައްޒަފުން ވެސް ޓެސްޓް ކުރަމުން އެބަދޭ،" ޑރ. ނަޒީމް ވިދާޅުވި އެވެ.

ހެލްތު ޕްރޮޓެކްޝަން އޭޖެންސީގެ އިރުޝާދާ އެކު އައިޖީއެމްއެޗްގެ ކޮލިޓީ އިމްޕްރޫވްމަންޓް ޑިވިޝަނާ ގުޅިގެން މިހާރު އަންނަނީ ހަރުކަށި ފިޔަވަޅުތަކެއް އަޅަމުންނެވެ.

ޑރ. ނަޒީމް ވިދާޅުވި ގޮތުގައި އެއް ކަމަކަށް، އައިސީޔޫ އަށް މީހުން ވެއްދުމުގެ ބަދަލުގައި ހާލު ބޮޑު ބަލި މީހުން އެޑްމިޓްކުރަނީ ރެސްޕިރޭޓަރީ ޔުނިޓުގަ އެވެ. އިންޑޮނީޝިއާގެ ބަލިމީހާ ޕޮޒިޓިވްވި އިރު އައިސީޔޫގައި ފަރުވާދެމުން އައި ހަ މީހުންގެ ޓެސްޓް ނަތީޖާ ދެއްކީ ނެގެޓިވްކޮށެވެ.

އެކަމަކު ކޮވިޑަށް މީހުން ޕޮޒިޓިވްވި ވޯޑެއްގައި ފަރުވާ ދޭ ބަލި މީހަކު ގެއަށް ދޫކޮށްލަން ޖެހުނު ނަމަވެސް އެ މީހަކު ލާނީ ހޯމް ކަރަންޓީނަށް ކަމަށް އައިޖީއެމްއެޗުން ބުންޏެވެ.

އެޑްމިޓްކުރާއިރު ކުރިއެކޭ އެއްގޮތަށް މިހާރު ޓެސްޓްކުރޭ

ޑރ. ނަޒީމް ވިދާޅުވީ ބޮޑެތި އޮޕަރޭޝަންތަކާއި އެޑްމިޓްކުރާ މީހުން ޓެސްޓް ކުރަމުން ދިޔައިރު ވެސް އެ ވަގުތު ނަތީޖާ ނެގެޓިވް ވިޔަސް ދެތިން ދުވަސް ފަހުން ޕޮޒިޓިވްވުމުގެ ފުރުސަތު ވެސް އޮންނަ ކަމަށެވެ.

"ނަމަވެސް މިހާރު އަޅުގަނޑުމެން ގެނައި ބަދަލަކީ ހުރިހާ އެޑްމިޝަންސްތައް [ކުރިއެކޭ އެއްގޮތަށް] ޓެސްޓްކުރަމުން ގެންދާނަން މި ވަގުތަށް. އެއީ މިހާރު އެތެރޭގައި ތިބި ޕޭޝަންޓުންނާއި އެޑްމިޓް ކުރެވޭ ޕޭޝަންޓުންގެ ރައްކާތެރިކަމަށް. މިހާރު މި ދިމާވެފައިވާ ކޮންޓިންޖެންސީގައި ސްޓާފުން ވެސް މަދުވަމުން ދިއުމާ އެކީގައި، އިތުރަށް ހަރުދަނާ ކުރުމުގެ އުސޫލެއްގެ ގޮތުން އެކަން މިކުރީ،" ޑރ. ނަޒީމް ވިދާޅުވި އެވެ.

"އިތުރަށް ބަލަމުން މިގެންދަނީ އަޅުގަނޑުމެންގެ ޕްރޮސެސްތަކާއި ޕްރެކްޓިސްތަކާއި ޕްރޮޓޮކޯލްސްތައް ހަރުދަނާ ކުރެވޭނެ ގޮތްތަކެއް ޑޮކްޓަރުންނާއި ނަރުހުންނާ ގުޅިގެން."

އައިޖީއެމްއެޗުގެ ގިނަ ޚިދުމަތްތަކެއް މި ހަފުތާގައި ފުޅާކުރަން ނިންމާފައި އޮތް ނަމަވެސް، ކޮވިޑަށް ބަޔަކު ޕޮޒިޓިވްވުމާ ގުޅިގެން އެ ޚިދުމަތްތައް ފެށުމުން މިހާރު އޮތީ މަޑުޖައްސާލައިފަ އެވެ. އެއީ ކޮންޓެކްޓްސްތައް މަދުކުރުމުގެ ގޮތުންނެވެ.