ބަންގްލަދޭޝްގެ އިތުރު 200 މީހުން ގައުމަށް ފޮނުވާލައިފި

ރާއްޖޭގައި ގަވައިދާ ހިލާފަށް އުޅޭ އަދި އެނބުރި ގައުމަށް ދާން ބޭނުންވާ ބަންގްލަދޭޝްގެ އިތުރު 200 މީހުން މިއަދު ފޮނުވާލައިފި އެވެ.

ގަވައިދާ ހިލާފަށް އުޅޭ ބިދޭސީން އަނބުރާ ގައުމަށް ފޮނުވާލުމަށް، މޯލްޑިވިއަނުން މިހާތަނަށް ވަނީ ގިނަ ފްލައިޓްތަކެއް ބާއްވާފަ އެވެ. މިއީ އެ އެއާލައިނުން ކުރާ 33 ވަނަ ދަތުރެވެ.

ބިދޭސީން އެ މީހުންގެ ގައުމަށް އަނބުރާ ފޮނުވާލުމަށް މިހާރު ކުރާ މަސައްކަތުގައި މި އަހަރު 20،000 ބިދޭސީން ފޮނުވާލެވޭނެ ކަމަށް، އިކޮނޮމިކް މިނިސްޓަރު ފައްޔާޒް އިސްމާއިލް މިދިޔަ ޖުލައި މަހުގެ ތެރޭގައި ވަނީ ވިދާޅުވެފަ އެވެ.

މާލެ ތެރޭގައި ކޮވިޑް-19 ފެތުރެން ފެށި ފަހުން މި މަހުގެ 17ގެ ނިޔަލަށް 5،700 އަށް ވުރެ ގިނަ ބަންގްލަދޭޝް މީހުން އެ މީހުންގެ ގައުމަށް ގެންގޮސްފައިވާނެ ކަމަށް މޯލްޑިވިއަނުން ވަނީ ބުނެފަ އެވެ.

ކޮވިޑް-19 އިން ރައްކާތެރިވުމަށްޓަކައި މާލެ ސަރަހައްދު ލޮކްޑައުންކުރުމުން ވަރަށް ގިނަ ބިދޭސީންނަށް އެކަމުގެ ނޭދެވޭ އަސަރު ކުރި އެވެ. ވަޒީފާ ގެއްލި ހާލުގައި ޖެހުމުން އެނބުރި ގައުމަށް ދާން ބޭނުންވި ބިދޭސީން ގިނަ އެވެ. ރާއްޖޭގައި 7،000އަށް ވުރެ ގިނަ މީހުންނަށް ކޮވިޑް ޖެހިފައިވާއިރު އޭގެ ތެރެއިން 2،200 މީހުންނަކީ ބަންގްލަދޭޝްގެ މީހުންނެވެ.