އައްޑޫގައި ހިންގި އޮޕަރޭޝަންގައި މިހާތަނަށް ގާތްގަނޑަކަށް 80 ކިލޯގެ ޑްރަގްސް ފެނިފައިވާ ކަމަށާއި މުޅި އޮޕަރޭޝަން ހިންގީ ދިވެހި ފުލުހުންގެ އިންޓެލިޖެންސުގެ މައްޗަށް ކަމަށް ޕޮލިސް ކޮމިޝަނަރު މުހައްމަދު ހަމީދު ވިދާޅުވެއްޖެ އެވެ.
ސީޕީ މިހެން ވިދާޅުވެފައި މި ވަނީ މިއީ ޕާކިސްތާނުގެ ޑްރަގް އިންޓެލިޖެންސުން ދިން މައުލޫމާތަކަށް ހިންގި އޮޕަރޭޝަނެއް ކަމަށް ޕާކިސްތާނުގެ ބައެއް ނޫސްތަކުން ބުނެފައިވަނިކޮށެވެ.
"އައްޑޫ އޮޕަރޭޝަންގައި ގާތްގަނޑަކަށް 80 ކިލޯގެ ޑްރަގްސް ވަނީ އަތުލައިގަނެވިފައި. މިއީ ސީދާ ދިވެހި ފުލުހުންގެ އިންޓެލިޖެންސުގެ މައްޗަށް ދިވެހި ފުލުހުންގެ ހިންގި އޮޕަރޭޝަނެއް. ތަހުގީގު ކުރިއަށްދާ ވަރަކުން އެހެން ގައުމުތަކާ ވެސް ހިއްސާކުރާނަން. މަގްސަދަކީ ޑްރަގްސް އެތެރެކުރުމަށް ހުރަސް އެޅުން،" ސީޕީގެ ޓްވީޓްގައިވެ އެވެ.
ލަފާކުރެވޭ ގޮތުން، އަތުލައިގަތް މަސްތުވާތަކެތީގެ އަގު 130 މިލިއަނަށް ވުރެ ބޮޑުވާނެ އެވެ.
މި އޮޕަރޭޝަނާ ބެހޭ އިތުރު ތަފްސީލްތައް ފުލުހުން އަދި ހާމައެއް ނުކުރެ އެވެ. މިހާތަނަށް އާންމުވެފައިވާ މައުލޫމާތުން އެނގޭ ގޮތުގައި އައްޑޫގެ ވަރުގަދަ ޑްރަގް ޑީލަރެއް ކަމަށް ފުލުހުން ކުރިން ވެސް ތުހުމަތުކޮށް އެތައް ފަހަރަކު އެކި ކުށްތަކުގައި ހައްޔަރުކޮށްފައިވާ އިބްރާހިމް ރަޝީދު (އަބުޗާ)އާ އެކު އިތުރު ބަޔަކު ވަނީ ޑްރަގްސްއާ އެކު ހައްޔަރުކޮށްފަ އެވެ.
މި އޮޕަރޭޝަންގައި ފުލުހުން، މަސްތުވާތަކެތި އުފުލި ޑިންޑީއެއް ހުއްޓުވަން އުޅުމުން އޭގައި ތިބި މީހުން ވަނީ މަސްތުވާތަކެތި ހުރި ގޯނިތައް ކަނޑަށް އުކާލައިފަ އެވެ. ނަމަވެސް ފުލުހުން އެ ތަކެތި ވަނީ ނަގައިފަ އެވެ.
އެނގިފައިވާ ގޮތުގައި، މި ކޭސްއާ ގުޅިގެން ހުޅުމާލޭގައި ވެސް ފުލުހުން އަންނަނީ އޮޕަރޭޝަނެއް ހިންގައި ބައެއް ތަންތަން ފާސްކުރަމުންނެވެ.
މިފަހަރުގެ އޮޕަރޭޝަނަކީ މިހާތަނަށް އެންމެ ގިނައިން ޑްރަގްސް ފެނުނު އެއް އޮޕަރޭޝަނެވެ. މިދިޔަ އަހަރުގެ އޭޕްރީލް ފަހު ފުލުހުން ވަނީ ކަނޑުމަގުން އެތެރެކޮށް ގދ. ހުޅުވާރުލު ކިޔާ ފަޅުރަށެއްގައި ވަޅުލާފައި ހުއްޓާ 149 ކިލޯގް ޑްރަގްސް ހޯދައިފަ އެވެ. އެ މައްސަލާގައި ފަސް މީހަކަށް ވަނީ ދައުވާކޮށްފަ އެވެ.