އަދީބުގެ މައްޗަށް ހުކުމްކުރުން ހަވީރު 6:00 ގައި

ކުރީގެ ނައިބު ރައީސް އަހުމަދު އަދީބުގެ މައްޗަށް ހުކުމް އިއްވުން މިއަދު ހަވީރު 6:00 ގައި ބާއްވަން ކްރިމިނަލް ކޯޓުން ނިންމައިފި އެވެ.

މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ ޚިޔާނާތާ ގުޅިގެން ހަތް ދައުވާއެއް އަދީބުގެ މައްޗަށް ކުރި އެވެ. އެއީ ޚިޔާނާތްތެރިވުމުގައި ބައިވެރިވުމުގެ ދެ ދައުވާ އާއި މަގާމުގެ ނުފޫޒު ބޭނުން ކޮށްގެން ނާޖާއިޒް ފައިދާ ހޯދުމުގެ ދައުވާއަކާއި މަގާމުގެ ނުފޫޒު ބޭނުން ކޮށްގެން ނާޖާއިޒް ފައިދާ ހޯދައި ދިނުމުގެ ދައުވާއަކާއި ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ދައުވާއެއްގެ އިތުރުން މަނީ ލޯންޑްރިންގެ ދެ ދައުވާ އެކެވެ.

ދައުލަތާއި އަދީބާ އެކު ވެފައިވާ އިއުތިރާފްގެ އެއްބަސްވުމުގެ ދަށުން އަދީބު މިދިޔަ ހަފުތާގައިވަނީ ކޯޓުގައި އެ ދައުވާތަކަށް އެއްބަސްވެ ވަޑައިގެންފަ އެވެ. އޭގެ ބަދަލުގައި އަދީބަށް ލުއި އަދަބެއް ދޭނެ ކަމަށް އެއްބަސްވުމުގައިވެ އެވެ.

މިއަދު ބޭއްވި އަޑުއެހުމުގައި އިއުތިރާފްގެ އެއްބަސްވުމާއި އަދަބާ ބެހޭގޮތުން ސުވާލު ކުރުމަށް ފަހު އެ މައްސަލަ ބައްލަވާ ގާޒީ ހަސަން ސައީދު ފުރަތަމަ ނިންމެވީ ހުކުމް އިއްވުމުގެ މަޖިލިސް ބުދަ ދުވަހު ކުރިއަށް ގެންދިއުމަށެވެ. އެކަމަކު ގާނޫނު އޮތްގޮތުން އަވަސް ނިޔާގެ މައްސަލައެއް ނަމަ، މިއަދު ހުކުމް އިއްވަން ލާޒިމްވާނެ ކަމަށް ދައުލަތުން ބުނުމުން ގާޒީ ހަސަން ވަނީ އަޑުއެހުން މެދުކަނޑާލައްވައިފަ އެވެ. އޭގެ އިރުކޮޅެއް ފަހުން އަޑުއެހުން ފެށްޓެވުމަށް ފަހު ގާޒީ ހަސަން ވިދާޅުވީ ހުކުމް އިއްވުމުގެ މަޖިިލިސް ހަވީރު 6:00 ގައި ކުރިއަށް ގެންދަވާނެ ކަމަށެވެ.

އިއުތިރާފްގެ އެއްބަސްވުމުގެ ދަށުން އަދީބަށް އަންނަނީ 20 އަހަރުގެ ޖަލު ހުކުމަކާއި ދެ މިލިއަން ރުފިޔާގެ ޖޫރިމަނާ އެކެވެ. އެއީ ޚިޔާނާތްތެރިވުމުގައި ބައިވެރިވުމުގެ އެއް ދައުވާއަށް ހަތަރު އަހަރާއި ނުވަ މަހުގެ ޖަލު ހުކުމަކާއި އޭގެ ދެވަނަ ދައުވާއަށް ދެ އަހަރާއި ހަތަރު މަހުގެ ޖަލު ހުކުމަކާއި މަނީ ލޯންޑްރިންގެ ކޮޮންމެ ދައުވާއަކަށް ފަސް އަހަރާއި 11 މަހުގެ ޖަލު ހުކުމަކާ އެކު އެއް މިލިއަން ރުފިޔާގެ ޖޫރިމަނާއަކާއި މަގާމުގެ ނުފޫޒު ބޭނުން ކުރުމުގެ އެއް ދައުވާއަށް އެއް މަހުގެ ޖަލު ހުކުމެއް އަދި ދެވަނަ ދައުވާއަށް ހަ މަހުގެ ޖަލު ހުކުމެއް އަދި ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ދައުވާއަށް ތިން މަހުގެ ޖަލު ހުކުމެކެވެ.

އެ އަޑުއެހުމުގައި އަދީބު ވިދާޅުވީ ތަހުގީގަށް އެއްބާރުލުން ދެއްވުމުގެ ގޮތުން އޭނާގެ ފޯނާއި މެސެޖްތައް ފުލުހުންނަށް ދެއްވާފައިވާނެ ކަމަށާއި އަދި ފައިސާ ޖަމާވި އެކައުންޓްތަކާއި ހޯދި މުދާތަކުގެ މައުލޫމާތު ވެސް ފުލުހުންނަށް ފޯރުކޮށް ދެމުންދާ ކަމަށް އަދީބު ވިދާޅުވި އެވެ. އިތުރު ވާހަކައެއް އޭނާ ވިދާޅެއް ނުވެ އެވެ.

އިއުތިރާފް އެއްބަސްވުމުގެ ދަށުން އަދީބު 20 އަހަރަށް ޖަލަށްލާން ހުކުމް ކުރިޔަސް، އޭނާ ޖަލުގައި ހޭދަކުރަަން ޖެހިވަޑައިގަންނަވާނީ 19 އަހަރެވެ. އެއީ މައްސަލަތަކާ ގުޅިގެން މިދިޔަ އަހަރުގެ ފަހުކޮޅުން ފެށިގެން އޭނާ ބަންދުގައި ހުންނެވުމުންނެވެ. ކުރިން ބަންދުގައި ހުރި މުއްދަތު ހުކުމުގެ މުއްދަތުން އުނި ކުރަން ޖެހެ އެވެ.

އެމްއެމްޕީއާރުސީގެ ޚިޔާނާތާއި ރިޔާސީ ލޯންޗްކޮޅުގައި އެއްޗެއް ގޮއްވާލި މައްސަލަ އާއި ފިސްތޯޯލައެއް ގެންގުޅުމުގެ ކުށުގައި 33 އަހަރުގެ ޖަލު ހުކުމެއް ކުރިން ކްރިމިނަލް ކޯޓުން އިއްވި އެވެ. އެކަމަކު ހައި ކޯޓާއި ސުޕްރީމް ކޯޓުން ކުރިން ވަނީ އެ ހުކުމްތައް ބާތިލްކޮށްފަ އެވެ.