ކޮވިޑް-19ގެ ހާލަތާ ގުޅިގެން އަމަލުކުރަން ހެލްތު ޕްރޮޓެކްޝަންސް އޭޖެންސީ (އެޗްޕީއޭ) އިން އާއްމުކޮށްފައިވާ އުސޫލާ އެއްގޮތަށް ޕީސީއާރު ޓެސްޓު ހުށަހެޅުމުން ކުރީގެ ރައީސް އަބްދުﷲ ޔާމީންގެ ވަކީލުންނަށް އެމަނިކުފާނާ ބައްދަލުކުރުމުގެ ފުރުސަތު ލިބޭނެ ކަމަށް މޯލްޑިވްސް ކަރެކްޝަނަލް ސާވިސް އިން މިއަދު ބުނެފި އެވެ.
މާފުށީ ޖަލުގައި ހުކުމް ތަންފީޒުކުރައްވާ ޔާމީންއާ އެމަނިކުފާނުގެ ވަކީލުންނަށް އިއްޔެ ބައްދަލެއް ނުކުރެއްވުނެވެ. އެއީ، ކުރިން ވެސް އެމަނިކުފާނުގެ ދިފާއީ ބައްދަލުވުންތަކަށް ހުރަސްއަޅަމުން އަންނަ އުސޫލުން ހިނގި ކަމެއް ކަމަށް ވަކީލުން ވިދާޅުވެ އެވެ.
ޔާމީންގެ ވަކީލުންގެ ޓީމުގައި ހިމެނިވަޑައިގަންނަވާ އާދަމް ޝަމީމް ވިދާޅުވީ ޔާމީނަށް ގާނޫނީ އެހީތެރިކަން ފޯރުކޮށްދޭން ދައުލަތުން ތަކުރާރުކޮށް ހުރަސްއަޅަމުންދާ ކަމަށެވެ. އެކަމަކު ވަކީލުންގެ ބައްދަލުވުން ހުއްޓުވަން އިއްޔެ ކުރިމަތިކުރުވީ އާ ޝަރުތެއް ކަމަށް ވިދާޅުވިއަސް އޭގެ ތަފްސީލެއް ނުދެއްވަ އެވެ.
ކަރެކްޝަންސްގެ މީޑިއާ އޮފިޝަލް ވިދާޅުވީ ވަކީލުންގެ ބައްދަލުވުމަށް އެތަނުން ހުރަސްނާޅާ ކަމަށެވެ. ބައްދަލުވުމުގެ ހުއްދަ ނުލިބުނީ ހެލްތު ޕްރޮޓެކްޝަން އޭޖެންސީ (އެޗްޕީއޭ)ގެ އެންގުމާ އެއްގޮތަށް ޕީސީއާރު ޓެސްޓް ނުހަދައި ހުށަހެޅުމުން އޭނާ ވިދާޅުވި އެވެ.
"ވަކީލު ބައްދަލުވުންތައް ހަަމަޖައްސައިދޭން އަޅުގަނޑުމެންނަށް ކުރެވެން އޮތް ހުރިހާ ކަމެއް ކޮށްދެން. ވަކީލުން އިއްޔެ ހުށަހެޅީ އެޗްޕީއޭ އިން އަމަލުކުރަން އަންގާފައި އޮތް އުސޫލާ އެއްގޮތަކަށް ނޫން،" އޮފިޝަލް ވިދާޅުވި އެވެ.
"ޕީސީއާރު ޓެސްޓް ހުށަހެޅުމުން އެ ހުއްދަ ލިބޭނެ."
އޭނާ ފާހަގަކުރެއްވި ގޮތުގައި މާލޭގައި ތިއްބަވާ ކަރެކްޝަނަލް ސާވިސްގެ މުވައްޒަފުންނަށް ވެސް މާފުށީ ޖަލަށް ވަދެވެނީ 72 ގަޑިއިރު ނުވާ ޕީސީއާރު ޓެސްޓެއް ހުށަހަޅައި ކައުންސިލްގެ ހުއްދައާ އެކުގަ އެވެ.
ކޮވިޑް-19އާ ގުޅިގެން ކަރަންޓީންވާން ޖެހޭ 14 ދުވަހުގެ މުއްދަތު 10 ދުވަހަށް ކުރުކޮށް، އެޗްޕީއޭ އިން ނެރުނު އިއުލާނުގައި ބުނެފައި ވަނީ ކޮންމެހެން ދޭން ޖެހޭ ހިދުމަތެއް ދިނުމަށާއި މަޝްރޫއުތަކުގެ މަސައްކަތް ހިންގުމަށް ހުއްދަ ލިބިގެން ކުރު މުއްދަތަށް މާލެއިން އަތޮޅު ތެރެއަށް ދަތުރުކުރާ މީހުން ވެސް 72 ގަޑިއިރު ނުވާ ނެގެޓިވް ޕީސީއާރް ނަތީޖާއެއް ހުށަހަޅަން ޖެހޭނެ އެވެ.
އެޗްޕީއޭގެ މި އުސޫލު ހިނގަނީ ވަކި ބަޔަކަށް ކަމަށާއި ސަރުކާރުގެ ދަތުރުތަކުގައި ވަޑައިގަންނަވާ ބޭފުޅުން އެ އުސޫލަށް ތަބާނުވާ ކަމުގެ ކަންބޮޑުވުން ޕީޕީއެމާއި ޕީއެންސީން ފާޅުކުރެ އެވެ.
ޔާމީންގެ ވަކީލުންގެ ޓީމުގައި ހިމެނިވަޑައިގަންނަވާ ކުރީގެ ނައިބު ރައީސް ޑރ. މުހައްމަދު ޖަމީލް އަހްމަދު ރޭ ވިދާޅުވެފައި ވަނީ ޕީސީއާރު ޓެސްޓް ހުށަހެޅުމުގެ އުސޫލު އާންމު ރައްޔިިތުންނަށް އޮތް ނަމަވެސް ރައީސް ޔާމީންއާ ބައްދަލުކުރުމުގައި ލުއި ދޭން ޖެހޭނެ ކަމަށެވެ.
"އަޅުގަނޑުމެން ކިހިނެއްތޯ ކޮންމެ ފަހަރަކު ޓެސްޓު ހަދަނީ؟ އެމަނިކުފާނު ހުންނެވީ ދައުލަތުގެ ބެލުމުގެ ދަށުގައި. އެހެންވީމަ ވަކީލުންނާ ބައްދަލުކުރުމުގެ ހުރިހާ ކަމެއް ހަމަޖެއްސުމަކީ ދައުލަތުގެ ޒިންމާއެއް،" ޑރ. ޖަމީލް ވިދާޅުވި އެވެ.
އިދިކޮޅު ކޯލިޝަނުން ތުހުމަތުކުރާ ގޮތުގައި، ޔާމީނާ ބައްދަލުކުރަން ވަކީލުންނަށް އިއްޔެ ފުރުސަތު ނުދިނީ އެމަނިކުފާނާ ދެކޮޅަށް ކޯޓަށް ހުށަހަޅާފައިވާ ދައުވާގެ ދިފާއަށް ހުރަސްއެޅުމަށެވެ. މަނީ ލޯންޑްރިންގެ ދައުވާއަކާއި ރިޝްވަތު ހިފުމުގެ ދައުވާއެއް، އެމަނިކުފާާނާ ދެކޮޅަށް ވަނީ އުފުލައިފަ އެވެ.