ކޮވިޑް-19 ޖައްސާ ވައިރަހުގެ، އިނގިރޭސިވިލާތުން ފެނުނު އާ ވައްތަރު ރާއްޖޭގައި އުޅޭ ކަމެއް އަދި ނޭނގެ އެވެ. އެކަން ބެލެން އޮތީ ބޭރުގެ ލެބޯޓްރީއެއްގައި ޓެސްޓުކޮށްގެންނެވެ. އެކަމަކު އެކަމަށްޓަކައި ސާމްޕަލްތަކެއް އަދި ބޭރަކަށް ނުފޮނުވަ އެވެ.
ހެލްތު އިމަޖަންސީ އޮޕަރޭޝަންސް ސެންޓަރު (އެޗްއީއޯސީ)ގެ ތަރުޖަމާނު ޑރ. ނަޒްލާ ރަފީގު "މިހާރު" އަށް ރޭ ވިދާޅުވިގޮތުގައި މި އާ ވޭރިއަންޓް ރާއްޖޭގައި އުޅޭތޯ ބަލާނެ އެވެ. އެކަމަކު ސާމްޕަލްތަކެއް ބޭރުގެ ލެބޯޓްރީއަކަށް ފޮނުވުމުގެ މަސައްކަތް އަދި އޮތީ މަޝްވަރާގެ މަރުހަލާގަ އެވެ.
ގައިން ގަޔަށް އެރުމުގެ ނުރައްކާ 70 ޕަސެންޓް ބޮޑު ކަމަށް ބެލެވޭ މި ވޭރިއަންޓް އުޅޭތޯ ބަލާނީ ރާއްޖޭގައި އުޅޭ ކޮވިޑް ވައިރަހުގެ ސްޓްރެއިންތައް ދެނެގަތުމުގެ ޖީން ސީކުއެންސިންގެ ތެރެއިންނެވެ. ޖީން ސީކުއެންސިން އަށް ސާމްޕަލްތަކެއް އެއް ފަހަރު ބޭރަށް ފޮނުވައި ނަތީޖާ ވަނީ ލިބިފަ އެވެ. ޑރ. ނަޒްލާ ވިދާޅުވިގޮތުގައި އާ ވޭރިއެންޓް އުޅޭތޯ ބަލާނީ ޖީން ސީކުއެންސިން އަށް ދެން ފޮނުވާ ސާމްޕަލްތައް ޓެސްޓުކުރާ އިރު އެވެ.
ދެވަނަ ބުރަކަށް ސާމްޕަލްތަކެއް ފޮނުވާނެ ތާރީޚެއް އަދި ކަނޑައެއް ނާޅަ އެވެ.
"މި ވަގުތު ހުރިހާ ފްލައިޓްތައް ނެތުމާއި މި ކަހަލަ ކަންތައްތަކާ ހެދި، ތަންކޮޅެއް ކޮމްޕްލެކްސް. އެހެންވީމާ އެއާލައިންތަކާ ވާހަކަދައްކައިގެން އިންތިޒާމްތައް ހަމަޖެހުނީމަ [ފޮނުވާނެ]،" ޑރ. ނަޒްލާ ވިދާޅުވި އެވެ.
އާ ވޭރިއަންޓް ރާއްޖޭގައި އުޅޭތޯ ބަލަން ބޭރަށް ސާމްޕަލްތަކެއް ފޮނުވައިފި ކަމަށް މީޑިއާ އިން ކުރިން ރިޕޯޓްކުރި ނަމަވެސް ޑރ. ނަޒްލާ ވިދާޅުވީ "ބައެއް ނޫސްތަކުގައި ލިޔެފައި ހުރީ އަޅުގަނޑުމެން ސީދާ ބުނި ގޮތަކަށް ނޫން" ކަމަށެވެ.
"މީގައި ބޮޑަށް މުހިއްމީ އެއްވެސް ވައްތަރެއް ފެތުރުން ކުޑަކުރުން. ކޮންމެ އެއްޗެއް އަޔަސް ހުއްޓުވޭނީ އާއްމުކޮށް އަޅަން މި ޖެހޭ ފިޔަވަޅުތަކުން."
ބޭރުން އަންނަ މީހުންގެ ސާމްޕަލް ފޮނުވާނެ
ރާއްޖޭގައި އާ ވޭރިއެންޓްގެ ވާހަކަ ބޮޑަށް ދެކެވެން ފެށީ މާލޭގައި ބޭއްވި ކައިވެނި ޕާޓީއަކަށް ދިޔަ އެތައް ބަޔަކު ކޮވިޑަށް ޕޮޒިޓިވްވެގެން ކޮންޓެކްޓް ޓްރޭސިން ހެދި އިރު އިނގިރޭސިވިލާތުން އައިސް ހުރި މީހަކު ފާހަގަވުމާ ގުޅިގެންނެވެ. އެކަމަކު އޭނާއަކީ އެ ޕާޓީގެ ފަހުން ރާއްޖެ އައި މީހެއް ކަމަށް ހެލްތު ޕްރޮޓެކްޝަން އޭޖެންސީން ވަނީ ބުނެފަ އެވެ.
ޑރ. ނަޒްލާ ވިދާޅުވިގޮތުގައި މި ވައިރަހުގެ ޖީން ސީކުއެންސިން އަށް ރާއްޖެ އިން ފުރަތަމަ ބުރު ފޮނުވި ސާމްޕަލްތަކުގައި ހިމެނީ އެންމެ ފުރަތަމަ ރާއްޖެ އިން ބަލި ފެނުނު އިރު ޕޮޒިޓިވްވި، ބޭރުން އައި މީހުންގެ ބައެއް ސާމްޕަލްތަކާއި މާލެ އިން ކޮމިއުނިޓީ ސްޕްރެޑް ފުރަތަމަ ފެނުނު ބައެއް ސާމްޕަލްތަކާއި ސެޕްޓެމްބަރު މަހާ ހަމައަށް ކޮންމެ މަހަކު ޕޮޒިޓިވްވި ބައެއް ސާމްޕަލްތަކެވެ.
އާ ވޭރިއެންޓް އުޅޭތޯ ބަލަން، ވަކި ބައެއްގެ ސާމްޕަލްތައް ޓެސްޓުކުރުވާނެ އެވެ.
"މިސާލަކަށް [އާ ވޭރިއަންޓް] ޔޫކޭގައި އެންމެ ގިނައިން އުޅޭ ކަމަށް ވަންޏާ ޔޫކޭ އިން އައިސް ޕޮޒިޓިވްވެފައި ތިބި ޓޫރިސްޓުންނާއި މީހުންގެ ވެސް ސާމްޕަލްސް އޭގެ ތެރޭގައި ހިމެނޭނެ. އޭގެ އިތުރަށް ވެސް ހަމަ ރެންޑަމްކޮށް އެހެން ތަންތަނުން އަންނަ މީހުންގެ ސާމްޕަލްތައް ވެސް ފޮނުވޭނެ،" ޑރ. ނަޒްލާ ވިދާޅުވި އެވެ.
"އާ އެއްޗެހި އަންނަމުންދާނެ"
ކުރީ ފަހަރު ޖީން ސީކުއެންސިން ހެދީ ތައިލެންޑުގެ ލެބޯޓްރީއަކަށް ފޮނުވައިގެންނެވެ. ޑރ. ނަޒްލާ ވިދާޅުވިގޮތުގައި ދެން ވެސް ފޮނުވާނީ އެ ތަނަށް ކަމަށް ވުން އެކަށީގެންވެ އެވެ. އެކަމަކު ދެވަނަ ބުރަށް ލެބޯޓްރީއެއް ކަނޑައަޅަން ޑަބްލިޔުއެޗްއޯއާ ދަނީ މަޝްވަރާކުރަމުންނެވެ.
އާ ވޭރިއަންޓެއް އުޅޭތޯ ދެނެގަތުމުގެ ގާބިލްކަމެއް ރާއްޖޭގައި ނެތް އިރު، ޑރ. ނަޒްލާ ވިދާޅުވިގޮތުގައި، އެކަމަށް ބޭނުންވާ ޚާއްސަ ލެބޯޓްރީ ވަސީލަތްތައް މި ވަގުތުން ވަގުތަށް ގާއިމް ނުކުރެވުނަސް ބޭރަށް ސާމްޕަލް ފޮނުވައިގެން ޓެސްޓުކުރެވެންޏާ އެންމެ ރަނގަޅެވެ. އެހެން ބައެއް ވައިރަސްތައް ވެސް ގަވާއިދުން ބޭރަށް ފޮނުވައިގެން، ބޭނުންވާ މައުލޫމާތުތައް ހޯދާކަން އޭނާ ފާހަގަކުރެއްވި އެވެ.
ޑރ. ނަޒްލާ ވިދާޅުވިގޮތުގައި އިސްކަންދޭންވީ ކޮވިޑުން ރައްކާތެރިވުމުގެ އާއްމު ފިޔަވަޅުތަކުގައި ހިފަހައްޓާށެވެ.
"މީގައި ބޮޑަށް މުހިއްމީ އެއްވެސް ވައްތަރެއް ފެތުރުން ކުޑަކުރުން. ކޮންމެ އެއްޗެއް އަޔަސް ހުއްޓުވޭނީ އާއްމުކޮށް މި އަޅަން ޖެހޭ ފިޔަވަޅުތަކުން. ނައިޖީރިއާ އާއި ސައުތު އެފްރިކާގައި ވެސް އާ ވޭރިއަންޓެއް އުޅޭ ކަމުގެ މައުލޫމާތު އެބަ ލިބޭ. އެހެންވީމާ އެ އެއްޗެހި އަންނަމުންދާނެ،" ޑރ. ނަޒްލާ ވިދާޅުވި އެވެ.
"ވޭރިއެންޓެއް އައިކަން މި އެނގެނީ އަންނަ ފަހުން. އެނގޭ އިރު އޭތި ވަރަށް ބޮޑަށް ފެތުރިފައި އޮންނާނީ. އެހެންވީމާ ހަމަ އާއްމު ފިޔަވަޅުތައް ވަރަށް މުހިއްމު، ކޮންމެ ވައްތަރެއް އައުން ހުއްޓުވުމަށް ވެސް."
އިނގިރޭސިވިލާތުގައި ފެތުރު އާ ވޭރިއަންޓް އެހެން ގައުމުތަކުގައި ވެސް އުޅޭކަން މިހާރު ދަނީ އެނގެމުންނެވެ. އެ ވައްތަރު އިނގިރޭސިވިލާތުގައި އުޅޭކަން ފާހަގަވުމާ އެކު އެތައް ގައުމަކުން ވަނީ އިނގިރޭސިވިލާތުން އެ ގައުމުތަކަށް މީހުން ދިޔުން މަނާކޮށްފަ އެވެ. ރާއްޖެ އިން އެ ފިޔަވަޅު ނާޅައި ނިންމީ އިނގިރޭސިވިލާތުގައި 12 ގަޑި އިރަށް ވުރެ ގިނައިރު ހޭދަކޮށްފައި އަންނަ ދިވެހިންނާއި ވޯކް ވިސާގައި އަންނަ ބިދޭސީން 10 ދުވަހަށް ކަރަންޓީނުކުރާށެވެ.
އިނގިރޭސިވިލާތުން ފާހަގަވި ވޭރިއަންޓް މާ ފަސޭހަ އިން ފެތުރޭކަން އެނގުނަސް އެ ވޭރިއަންޓަކީ ބަލި އިތުރަށް ގޯސްކުރާ ވައްތަރެއް ކަމެއް ނޭނގެ އެވެ. ތަޖުރިބާކާރުން ލަފާކުރަނީ ކޮވިޑް ވައިރަހަށް މިހާރު އުފައްދާފައިވާ ވެކްސިންތަކަށް މި ވޭރިއަންޓް ވެސް ހުއްޓުވޭނެ ކަމަށެވެ.