ކޮވިޑްގެ އާ ސްޓްރެއިންއެއް ފެތުރޭތީ ރާއްޖެ ސަމާލުވެގެން

ކޮވިޑް-19 ގެ އާ ސްޓްރެއިންއެއް އިނގިރޭސި ވިލާތުގައި ފެތުރޭތީ ރައްކާތެރިކަމުގެ ފިޔަވަޅުތައް ހަރުދަނާކުރަން ފަށާފައިވާ ކަމަށް ކަމަށް ހެލްތު އިމަޖަންސީ އޮޕަރޭޝަން ސެންޓަރު (އެޗްއީއޯސީ) ގެ ތަރުޖަމާނު ޑރ. ނަޒްލާ ރަފީގު ރޭ ވިދާޅުވެއްޖެ އެވެ.

އާންމުކޮށް ކޮންމެ ވައިރަހެއްގައި ވެސް އެއް ސްޓްރެއިން ނުވަތަ ވައްތަރަށް ވުރެ ގިނައިން ހުރެ އެވެ. ނަމަވެސް އިނގިރޭސި ވިލާތުން މިހާރު ފެނިފައިވާ އާ ސްޓްރެއިން، ކުރިއަށް ވުރެ އަވަހަށް ފެތުރޭކަން ސައިންސްވެރިން ވަނީ ފާހަގަކޮށްފަ އެވެ. މި ސްޓްރެއިން އެންމެ ފުރަތަމަ ފެނުނީ މިދިޔަ ސެޕްޓެމްބަރު މަހު ނަމަވެސް މި މަހު ލަންޑަނުން ކޮވިޑަށް ޕޮޒިޓިވްވި 25 ޕަސެންޓު މީހުންނަށް ޖެހިފައި ވަނީ މި ސްޓްރެއިނެވެ. އެހެންވެ، ބައެއް ގައުމުތަކުން މިހާރު ވަނީ އިނގިރޭސި ވިލާތަށް ދަތުރުކުރުން މަނާކޮށްފަ އެވެ.

އެޗްއީއޯސީ އިން ރޭ ބޭއްވި މީޑިއާ ބްރީފިންގައި ނަޒްލާ ވިދާޅުވީ އާ ސްޓްރެއިންގެ ކަންކަން ވަރަށް ގާތުން ބަލަމުން އަންނަ ކަމަށެވެ.

"އަޅުގަނޑުމެން ވެސް މި ދަނީ މި ސްޓްރެއިންގެ ކަންތައްތައް ވަރަށް ގާތުން ބަލަމުން އަދި މިކަމާ ގުޅިގެން ހަމަ އިތުރަށް މިހާރު ހުރި ފިޔަވަޅުތައް އިންޕްލިމެންޓޭޝަން ރަނގަޅު ކުރުމާއި އަދި މި ފިޔަވަޅުތަކަށް ސަމާލުކަންދީ އެކަންކަން ތަންފީޒުކުރެވޭ މިންވަރު އިތުރުކުރުމުގެ މަސައްކަތް ކުރިއަށް މި ދަނީ،" އޭނާ ވިދާޅުވި އެވެ.

މި ފަދަ ސްޓްރެއިންތައް އުޅޭކަން އެނގެނީ އެ ފެތުރެން ފެށީމާ ކަމަށާއި އެހެންވެ، ރާއްޖޭން ކޮވިޑަށް ޕޮޒިޓިވްވާ އަދަދު ދަށްވި ނަމަވެސް އަދިވެސް ރައްކާތެރިކަމުގެ ފިޔަވަޅުތައް އެޅުމުގައި ދެމިތިބެން ޖެހޭ ކަމަށް ނަޒްލާ ވިދާޅުވި އެވެ.

ވައިރަހަކީ އަބަދުވެސް ބަދަލުވަމުން ނުވަތަ މިއުޓޭޓް ވަމުން އަންނަ އެއްޗެކެވެ. ދުނިޔޭގައި މިހާރު އެންމެ ގިނައިން ފެންނަ ކޮރޯނާވައިރަސް ސްޓްރެއިނަކީ މިދިޔަ ފެބްރުއަރީ މަހު ޔޫރަޕުން ފެނުނު ސްޓްރެއިނެކެވެ. އެއީ އެންމެ ފުރަތަމަ ޗައިނާގެ ވުހާން ޕްރޮވިންސުން ފެނުނު ސްޓްރެއިނެއް ނޫނެވެ.

އަލަށް ފެތުރެން ފެށި ސްޓްރެއިންގެ ވައިރަސް ފަސޭހައިން ފެތުރޭކަން ހޯދިފައި ވިޔަސް މިއީ އިތުރަށް ބަލި ގޯސްވާ ވައިރަހެއް ކަމެއް ނޭނގެ އެވެ. ތަޖުރިބާކާރުން ވިދާޅުވީ މި ސްޓްރެއިން ފަސޭހައިން ފެތުރުނަސް ވައިރަހާ ދެކޮޅަށް މިހާރު އުފައްދާފައިވާ ވެކްސިން މި ސްޓްރެއިންއާ ދެކޮޅަށް ބޭނުންކުރެވޭނެ ކަމަށެވެ.