އެއްވެސް މަހުލޫގަކަށް މަރުން ސަލާމަތް ނުވެވޭނެ ކަމަށާއި މަރު ހަނދާންކޮށް އެ ވަގުތަށް ތައްޔާރުވާން ޖެހޭ ކަމަށް މިއަދުގެ ހުކުރު ހުތުބާގައި ގޮވާލައިފި އެވެ.
އިސްލާމީ މަރުކަޒުގައި މިއަދު ހުތުބާ ދެއްވީ ޝެއިހު އިލްޔާސް ހުސެއިން އެވެ. ހުތުބާގެ މައުލޫއަކީ މަރު ހަނދާން ކުރުމެވެ.
ހުތުބާ ދެއްވަމުން އިލްޔާސް ވިދާޅުވީ ﷲގެ ޒާތުފުޅު ފިޔަވައި ކޮންމެ އެއްޗަކީ ފަނާވެ ނެތި ހިނގައިދާނެ އެއްޗެއް ކަމަށާއި ކިތަންމެ ވަރުގަދަ ތަނެއްގައި ބަންދުވެ ހުރި މީހަކާއި ފަގީރު ކުޑަ ކުއްޖަކަށް ވިޔަސް މަރުން ސަލާމަތެއް ނުވާނެ ކަމަށެވެ. އެހެންކަމުން ގިނަގިނައިން މަރު ހަނދާން ކުރުމަށް ރަސޫލާ އިރުޝާދު ދެއްވާފައިވާ ކަމަށް އިލްޔާސް ވިދާޅުވި އެވެ.
"އިލްމުވެރިން ވިދާޅުވާ ގޮތުގައި މުއުމިން އަޅާ ގިނަގިނައިން މަރު ހަނދާން ކުރާނަމަ ތައުބާވުމަށް އަވަސްވެ ގަތުމާއި ފުދުންތެރިކަމާއި އަޅުކަން ކުރުމުގެ ޝައުގުވެރިކަން ﷲ މިންވަރު ކުރައްވާނެ. އަދި މަރުމަތިން ހަނދާން ކުރުން ދޫކޮށްލައިފި މީހާ ތައުބާވުން ލަސްވުމާއި ދަހިވެތިކަން އިތުރުވުމާއި އަޅުކަމުގައި ކަންނެތްކަން އޭނާގެ މައްޗަށް ވެރިވެދޭ،" އިލްޔާސް ވިދާޅުވި އެވެ.
އިންސާނާ މަރަށް ހާޒިރުވުމުން ގިނަ ކަންތައްތައް ހަނދާން ވާނެ ކަމަށް ހުތުބާގައި ބުންޏެވެ. އޭނާ ވަށައިގެންވާ މީހުން ފެނުމުން އެ މީހުންނާ ވާހަކަ ދައްކަން ބޭނުންވާނެ ކަމަށާއި ނުކުރެވި ހުރި ކަންކަން ކުރަން ބޭނުންވާނެ ކަމަށް އިލްޔާސް ވިދާޅުވި އެވެ. ނަމަވެސް އެއްވެސް ކަމެއް ނުކުރެވި އަދި ވާހަކައެއް ވެސް ނުދެއްކޭނެ ކަމަށާއި ފެންނާނީ ބޭކަލުންގެ ޖަމާއަތްތަކާއެކު މަލަކަލްމައުތުގެފާނު އެ މީހާގެ ފުރާނަ ހިއްޕަވަން ވަޑައިގަންނަވާ ތަން ކަމަށް ވެސް އޭނާ ވިދާޅުވި އެވެ.
"އެއީ ސުންޕާކަން ބޮޑު ވޭންދެނިވި ވަގުތުކޮޅެއް. އަނބިމީހާ އާއި ދަރީންނާއި ގާތްތިމާގެ މީހުންނާއި އެކުވެރިންނާއި ހެޔޮ އެދޭ އެންމެންނާ ވަކިވަނީ، މިއީ ކޮންމެ މީހަކު ވެސް ހަނދާން ކުރަން ޖެހޭ ވަގުތެއް،" އިލްޔާސް ވިދާޅުވި އެވެ.
އެހެންކަމުން ޣާފިލްކަމުން ހޭލައި ފާފަތަކުން ތައުބާވެ ﷲގެ ހަޒްރަތަަށް އެނބުރި ރުޖޫއަވުމަށް ހުތުބާގައި ގޮވާލި އެވެ. އަދި ކޮންމެ ވަގުތަކު ވެސް މަރުވެދާނެ ކަމަށްޓަކައި ﷲ އަށް ބިރުވެތިވެ ހެޔޮ އަމަލުތައް ގިނަ ކުރުމަށް ހުތުބާގައި ގޮވާލި އެވެ.
"އެކަނި އިނދެ އަމިއްލަ ނަފްސާ މި ސުވާލުތައް ކޮށްލާ. ދީނުގެ އެންމެ މުހިންމު ރުކުން ކަމުގައިވާ ފަރުޟު ނަމާދުތައް ކުރެވޭ ހެއްޔެވެ؟ ޤުރުއާނުން އެއްވެސް މިންވަރެއް ކިޔެވޭ ހެއްޔެވެ؟ ހުރިހާ ނިއުމަތްތައް ތަނަވަސްކޮށްދެއްވި ގަދަކީރިތިވަންތަ ﷲ ގެ ކުޅަދުންވަންތަކަމާ މެދު ވިސްނާލިން ހެއްޔެވެ؟ ކުށް ފާފަތަކާ ދުރުވެ ހެޔޮ ކަންކަމަށް އަވަސްވެ ގަނެވޭ ހެއްޔެވެ؟ މި ސުވާލުތަކުގެ ކުރިމަތީގައި އިސްޖަހާލަން ޖެހިއްޖެ މީހަކަށް ހިތާމައިގެ ކޮޅެއް ވެސް ނެތެވެ،" އިލްޔާސް ވިދާޅުވި އެވެ.
