އަންހެން މުވައްޒަފަކަށް ޖިންސީ ފުރައްސާރަ ކުރި މައްސަލައެއްގެ ތުހުމަތުގައި މޯލްޑިވް ގޭސްގެ ޑެޕިއުޓީ މެނޭޖިން ޑިރެކްޓަރު އަލީ އިކްރާމް އިއްޔެ ސަސްޕެންޑްކޮށްފި އެވެ.
އެސްޓީއޯގެ ބެލުމުގެ ދަށުގައި އޮންނަ ކުންފުނި ހިންގެވުމާ ވަގުތީ ގޮތުން ހަވާލުވެ ހުންނެވި އިކްރާމް ދެ ހަފުތާއަށް ސަސްޕެންޑްކުރީ ކުންފުނީގެ ބޯޑުންނެވެ. އިކްރާމްގެ މައްސަލަ ބޯޑަށް ހުށަހެޅީ ހެއްކެއްގެ ގޮތުން އަންހެން މުވައްޒަފަށް އޭނާ ފޮނުއްވި ބައެއް މެސެޖްތަކާ އެކުގަ އެވެ.
މަސްއޫލިއްޔަތުތަކުން އިކްރާމް ދުރުކޮށް ކުންފުނި ހިންގުން ބޯޑުން ހަވާލުކުރީ ޗީފް ފައިނޭންޝަލް އޮފިސަރު އަހްމަދު ސަލީމްއާ އެވެ.
އަންހެން މުވައްޒަފަކަށް މެސެޖްކުރައްވައި އަދި ދިމާވުމުން ފޮށި ހަދާ މައްސަލައިގައި ބޯޑުން އޭނާއާ މެދު ފިޔަވަޅު އެޅިއިރު އެ ތުހުމަތުތައް އިކްރާމް ދޮގުކުރައްވަ އެވެ. އޭނާ "މިހާރު"އަށް ވިދާޅުވީ ޗެޓް ލޮގަކާ އެކު އޭނާއާ ދެކޮޅަށް މައްސަލައެއް ހުށަހެޅި ނަމަވެސް ފުރައްސާރައިގެ މެސެޖެއް ނުކުރައްވާ ކަމަށެވެ.
އެކަމަކު "މިހާރު"އަށް ފެނުނު އެ ޗެޓް ލޮގުގައި އަންހެން މުވައްޒަފަށް ބަދުއަހުލާގީ ފޮޓޯއެއް ވެސް ހިމެނެ އެވެ. އަދި މެސެޖްތަކުން އަންހެން މުވައްޒަފަށް ފުރައްސާރަކޮށްފައިވެ އެވެ.
އިކްރާމާ ދެކޮޅަށް ބޯޑަށް ހުށަހެޅި މައްސަލައިގައި ބުނެފައި ވަނީ ރަސްމީ މަސައްކަތު ބައްދަލުވުމަކަށް ފަހު "ހާދަ ރީއްޗޭ،" އަދި "ވަރަށް މިސްވޭ"، "ބައްދާލަން ބޭނުންވާ ކަމަށް" ވިދާޅުވެ ގިނަ މެސެޖުތަކެއް ފޮނުވި ކަމަށެވެ. އެ ގޮތަށް މެސެޖު ކުރައްވަމުން ގޮސް ޒާތީ ދިރިއުޅުމުގެ ވާހަކަ އޮޅުންފިލުއްވުން ފަދަ އޮފީހުގެ މަސައްކަތަށް ދަތިވާ ވަރަށް ފުރައްސާރައިގެ އަމަލުތަކެއް ހިންގެވި ކަމަށް ތުހުމަތުކުރި އެވެ.
"މިހާރު"އަށް އެނގިފައިވާ ގޮތުގައި އިކްރާމަށް ތުހުމަތުކުރާ ޖިންސީ ފުރައްސާރައިގެ މައްސަލަ ފުލުހުންނާއި ޖެންޑާ މިނިސްޓްރީއަށް ވެސް މިހާރު ވަނީ ހުށަހަޅައިފަ އެވެ.