ތިމަރަފުށީގެ ޓެރަރިޒަމް މައްސަލާގައި ދައުވާކޮށްފި

ތ. ތިމަރަފުށީގައި ހަރުކަށި ފިކުރުގެ އަމަލުތަކެއް ހިންގަން އުޅުމުގެ ތުހުމަތުގައި ހައްޔަރުކުރި މީހުންނަށް ދައުވާކުރުމަށް ކްރިމިނަލް ކޯޓަށް ހުށަހަޅައިފި އެވެ.

ޕްރޮސެކިއުޓާ ޖެނެރަލް (ޕީޖީ) ހުސެއިން ޝަމީމް، އަމިއްލަ ބްލޮގުގައި މިއަދު ވިދާޅުވީ، ތިމަރަފުށީގައި މިދިޔަ އަހަރުގެ ފަހުކޮޅު ދޭން އުޅުނު ހަމަލާ ދިރާސާކޮށް އިއްޔެ ކޯޓަށް ހުށަހަޅާފައިވާ ކަމަށެވެ.

އެ މައްސަލައިގައި އަށް މީހަކު ހައްޔަރުކޮށް މިދިޔަ މަހުގެ 25 ގައި ވަނީ ދައުވާކުރަން ފޮނުވައިފަ އެވެ. ފުލުހުން ވަނީ އެ މީހުންގެ ވަނަވަރު ވެސް އާއްމުކޮށްފަ އެވެ. އެ މީހުންގެ ތެރެއިން، އަބްދުﷲ ޝަރީފަކީ ޓެރަރިސްޓް އައިސިސް ޖަމާއަތުން އަމީރުކަމުގެ މަގާމަށް އައްޔަންކޮށް އެކަމުގެ ލިޔުން ވެސް ދީފައިވާ މީހެކެވެ. ހައްޔަރުކޮށް ދައުވާކުރަން ފޮނުވި މީހުންނާއި ދައުވާތަކަކީ؛

އަބްދުﷲ ޝަރީފް، 34، ތ. ތިމަރަފުށި/ ފެހިވިދުވަރު

* ޓެރަރިޒަމްގެ އަމަލެއް ކުރުމަށް ރޭވުމުގެ ކުށުގެ ދައުވާ

* ޓެރަރިސްޓް ޖަމާޢަތަކަށް ތާއީދުކުރާ މީހެއްކަމަށް ދޭހަވާފަދަ ލިޔުމެއް ގެންގުޅުމުގެ ކުށުގެ ދައވާ އާއި

* ޓެރަރިސްޓް ޖަމާއަތެއްގެ މެންބަރަކަށްވުމުގެ ކުށުގެ ދައުވާ

އަހުސަން މުހައްމަދު، 32، ތ. ތިމަރަފުށި/ ކެނެރީގެ

* ޓެރަރިސްޓް ޖަމާޢަތަކަށް ތާއީދުކުރާ މީހެއްކަމަށް ދޭހަވާފަދަ ލިޔުމެއް ގެންގުޅުމުގެ ކުށުގެ ދައުވާ

* ޓެރަރިސްޓް ޖަމާއަތެއްގެ މެންބަރަކަށްވުމުގެ ކުށުގެ ދައުވާ

އަލީ މުނީޒު، 28، ތ.ތިމަރަފުށި/ ކެނެރީގެ

* ޓެރަރިޒަމްގެ އަމަލެއް ކުރުމަށް ހިތްވަރު ދިނުމުގެ ކުށުގެ ދައުވާ

* ޓެރަރިޒަމްގެ އަމަލެއް ކުރުމަށް ބޭނުންވާ އުކުޅުތައް ދަސްކުރުމުގެ ކުށުގެ ދައުވާ

* ޓެރަރިސްޓް ޖަމާއަތަކަށް ތާއީދުކުރާ މީހެއްކަމަށް ދޭހަވާފަދަ ލިޔުމެއް ގެންގުޅުމުގެ ކުށުގެ ދައުވާ

މުހައްމަދު އާސިރު، 34، ތ. ތިމަރަފުށި/ އަސުރުމާގެ

* ޓެރަރިޒަމްގެ އަމަލެއް ކުރުމަށް ހިތްވަރު ދިނުމުގެ ކުށުގެ ދައުވާ

އަލީ އަރުހަމް މުހައްމަދު، 18، ރ. ކަނދޮޅުދޫ/ ފެހިވިލާ

* ޓެރަރިޒަމްގެ އަމަލެއް ކުރުމަށް ރޭވުމުގެ ކުށުގެ ދައުވާ

* ޓެރަރިސްޓް ޖަމާޢަތަކަށް ތާއީދުކުރާ މީހެއްކަމަށް ދޭހަވާފަދަ ލިޔުމެއް ގެންގުޅުމުގެ ކުށުގެ ދައުވާ

* ހަނގުރާމައަށް ދާން އުޅުމުގެ ކުށުގެ ދައުވާ

ޝަމާހް ޝަރީފް، 20، ތ. ތިމަރަފުށި/ ސައިމާ

* ޓެރަރިޒަމްގެ އަމަލެއް ކުރުމަށް ރޭވުމުގެ ކުށުގެ ދައުވާ

* ޓެރަރިސްޓް ޖަމާއަތަކަށް ތާއީދުކުރާ މީހެއްކަމަށް ދޭހަވާފަދަ ލިޔުމެއް ގެންގުޅުމުގެ ކުށުގެ ދައުވާ

އިބްރާހިމް ލޫތު، 21، ނ.ކުޑަފަރި/ ރޯޒްމީޑް

* ޓެރަރިޒަމްގެ އަމަލެއް ކުރުމަށް ރޭވުމުގެ ކުށުގެ ދައުވާ

* އަދުލުއިންސާފު ގާއިމުކުރުމަށް ހުރަސްއެޅުމުގެ ކުށުގެ ދައުވާ

އަބްދުﷲ އިމާދު، 29، ރ. މަޑުއްވަރި/ ބީޗް ހައުސް

* ޓެރަރިޒަމްގެ އަމަލެއް ކުރުމަށް ރޭވުމުގެ ކުށުގެ ދައުވާ

* ޓެރަރިސްޓް ޖަމާޢަތަކަށް ތާއީދުކުރާ މީހެއްކަމަށް ދޭހަވާފަދަ ލިޔުމެއް ގެންގުޅުމުގެ ކުށުގެ ދައުވާ

* އަދުލުއިންސާފު ގާއިމުކުރުމަށް ހުރަސްއެޅުމުގެ ކުށުގެ ދައުވާ

* އޮރިޔާންކާޑު ގެންގުޅުމުގެ ކުށުގެ ދައުވާ

އެ މައްސަލައިގެ ތަފްސީލު ހިއްސާކުރައްވަމުން ޕީޖީ އޮފީހުގެ ޕަބްލިކް ޕްރޮސެކިއުޓާ އަދި މީޑިއާ އޮފިޝަލް އަހުމަދު ޝަފީއު ވިދާޅުވީ އެ މީހުންނަށް ދައުވާކުރަން ފޮނުވީ ޓެރަރިސްޓް ޖަމާއަތްތަކަށް ތާއީދުކޮށް އެކަމަށް ހިތްވަރުދީ ޓެރަރިސްޓް ޖަމާއަތްތަކުގެ އަމަލުތަކަކީ ސަބަބުވެރި އަމަލުތަކެއް ކަމަށް ދައްކަން އުޅުމުގެ ތުހުމަތުގައި ކަމަށެވެ.

އޭގެ އިތުރުން އިސްލާމިކް ސްޓޭޓުގެ އިރުޝާދުގެ ދަށުން ރާއްޖޭގައި ޓެރަރިޒަމްގެ އަމަލުތައް ކުރުމަށް ރާވައި އެކަމަށް ހިތްވަރުދީ ތިމަރަފުށީގައި ހަރަކާތްތެރިވާ ދީނީ ހަރުކަށި ފިކުރުގެ އިސްފަރާތްތަކުން އޮޕަރޭޓްކުރާ "ނަސާހް 3" ދޯނި ތެރޭގައި އައިއީޑީ އެއް ތައްޔާރުކުރުމަށްފަހު އެ ގޮއްވާލައި ރާއްޖޭގެ ގައުމީ ސަލާމަތަށް ނުރައްކަލެއް ތައްޔާރުކުރުވުމަށް ތައްޔާރީތައްވަމުން ދިއުމާއި ދަތުރު ދިއުމުގެ ނަމުގައި ފަޅު ރަށްރަށަށް ގޮސް ހަނގުރާމައިގެ އެކި އުކުޅުތައް ދަސްކޮށް ތިމަރަފުށީގައި ދީނުގެ ނަމުގައި ހަރުކަށި ފިކުރު ފެތުރުމުގެ ގޮތުން އެ ރަށުގެ ބައެއް ގޭގޭގައި ހަރުކަށި ފިކުރުތަކަށް ހިތްވަރު ލިބޭފަދަ ކްލާސްތައް ހިންގައި ވަކިން ޖަމާއަތް ހަދައިގެން ނަމާދުކުރަމުން ދިއުމަކީ ވެސް އެ މީހުންނަށް ދައުވާކުރަން ފޮނުވި ސަބަބުތަކެވެ.

ޝަމީމް ބްލޮގުގައި ވިދާޅުވި ގޮތުގައި، ތިމަރަފުށީގެ ޓެރަރިޒަމް މައްސަލައަކީ ހުޅުމާލޭގައި މިދިޔަ އަހަރު ކުރީކޮޅު ޓޫރިސްޓުންތަކަކަށް ދިން ހަމަލާއަށް ފަހު، ނިޒާމުތައް ޓެސްޓުކުރަން ލިބުނު ފުރުސަތެކެވެ. އެ މައްސަލަ މި ހިސާބަށް ގެނައުމުގައި ޝާމިލްވި ކޮންމެ މީހަކު އެ މީހެއްގެ ރޯލު ފުރިހަމައަށް އަދާކުރި ކަމަށާއި ކޮށްފައިވަނީ ދުނިޔޭގެ ފެންވަރުގެ މަސައްކަތެއްކަން ޝަމީމް ފާހަގަކުރެއްވި އެވެ.

ހުޅުމާލޭގައި ހަމަލާދިން މައްސަލާގައި އެއްވެސް މީހަކަށް ދައުވާ ނުކުރެވި ދޫވުމުން ޕީޖީ އަށް ފާޑުކިޔުން އަމާޒުވި އެވެ.

"މާނައަކީ، ކުރިއަށް އޮތް ތަނުގައި މައްސަލައެއް ކުރިމަތިނުވާނެއެކޭ ނޫނެވެ. މައްސަލަ ކުރިމަތިވާނެ އެވެ. ނަމަވެސް، އެކަމުގެ ތެރެއަށް ޒާތީ ތައައްސުބެއް ނުގެނެސް، މައްސަލަ ހައްލުކުރެވޭނެ ނިޒާމެއް ގާއިމުކޮށް އެ ނިޒާމު މިހާރު ހިނގަ އެވެ،" ބްލޮގުގައި ވެ އެވެ.

ކުރިއަށް އޮތް ޝަރީއަތުގެ މަރުހަލާގައި ވެސް ފުލުހުންނާއި ޕީޖީ އޮފީހުގެ ވަކީލުން، ރާއްޖެ އާއި ބޭރުން ލިބެން ހުރި ވަސީލަތެއް އެންމެ ފުރިހަމަ ގޮތުގައި ބޭނުންކުރާނެ ކަމަށާއި މައްސަލަ ފަސޭހައެއް ނުވާނެ ކަމަށް ޝަމީމް ވިދާޅުވި އެވެ.

"އެކަން އެނގެއެވެ. މި މައްސަލައިގައި ވެސް އަދި އިތުރަށް ރަނގަޅު ކުރެވޭނެ ކަންކަން އެބަހުއްޓެވެ. އެބައި އަޅުގަނޑުމެން މި ދަނީ ދިރާސާ ކުރަމުންނެވެ. ދެން އަންނަ މައްސަލައެއްގައި، މާތްﷲ އިރާދަކުރެއްވިއްޔާ، މިއަށްވުރެ އަދި މާ މޮޅަށް މަސައްކަތް ކުރެވޭނެއެވެ،" އޭނާ ވިދާޅުވި އެވެ.