މޯލްޑިވް ގޭސް ހިންގުމާ ހަވާލުވެ ހުންނެވި، އެ ކުންފުނީގެ ޑެޕިއުޓީ މެނޭޖިން ޑިރެކްޓަރު އިކްރާމް އަލީއަށް ތުހުމަތުކުރާ އޮކްސިޖަން ސިލިންޑަރު ގެނައުމުގެ ޚިޔާނާތް 16 މިލިއަނަށް އަރާކަން އެސްއޯއީ ކޮމިޓީގައި ހާމަކުރި މައުލޫމާތުތަކުން އެނގިއްޖެ އެވެ.
ކުރީގެ ސަރުކާރުގައި ވެސް ޚިޔާނާތުގެ ގިނަ މައްސަލަތަކެއް ފަޅާއެރި މޯލްޑިވް ގޭހަށް މި ފަހަރު ތުހުމުކުރަނީ ކޮވިޑް-19 އާ ގުޅިގެން 4،128 އޮކްސިޖަން ސިލިންޑަރު ގެނައުމުގައި ޚިޔާނާތް ހިންގާފައިވާ ކަމެވެ. މި މައްސަލަ އެސްއޯއީ ކޮމިޓީއަށް ހުށަހެޅީ ޖިންސީ ފުރައްސާރައިގެ ތުހުމަތުގައި ސަސްޕެންޑްކޮށްފައިވާ އިކްރާމަށް ތުހުމަތުކޮށެވެ.
މި މައްސަލައިގައި އެންމެ ބޮޑު ތުހުމަތަކީ، އޮކްސިޖަން ސިލިންޑަރު ގަތުމަށް ހަވާލުކުރި ކުންފުނީގެ ހިއްސާދާރަކު ޚަރަދުކޮށްގެން ގޭހުގެ ޑީއެމްޑީ އިކްރާމް ސިންގަޕޫރަށް ދަތުރެއް ކުރައްވާފައި ވުމެވެ. ލިޔެކިޔުމުން އެ ހަރަދުތައް ފެންނަން އެބައޮތެވެ.
މޯލްޑިވް ގޭހުން 47 ލީޓަރުގެ އޮކްސިޖަން ސިލިންޑަރުތައް ހޯދަން ކޯޓޭޝަން ފޮނުވީ ބޭރުގެ ހަ ކުންފުންޏަކަށެވެ. އޭގެތެރެއިން ކުރިމަތިލީ އެއް ކުންފުންޏަށް 1،000 ސިލިންޑަރު ގަންނަން ހަވާލުކޮށް ބާކީ 3،000 ސިލިންޑަރު ގެނައުމަށް އެއްބަސްވީ ސިންގަޕޫރުގެ ޕްރޯބިޒް ކިޔާ ކުންފުންޏަކާ އެކުގަ އެވެ. މި ކުންފުނިން ފޮނުވި ރީފާބިޝްޑް ސިލިންޑަރުތައް ބޭނުމެއް ނުކުރެވެ އެވެ.
ކޮމިޓީން ބަލާ ޚިޔާނާތުގެ މައްސަލައިގެ ތަފްސީލް
- ހަ ކުންފުންޏަކަށް ކޯޓޭޝަން ހޯދަން ހުށަހެޅީ 4،128 އޮކްސިލިންޑަރު ގަތުމަށް.
- އޭގެތެރެއިން 3،000 ސިލިންޑަރު ގަތުމަށް ހަވާލުކުރީ އަގު ބޮޑުކޮށް ހުށަހެޅި ކުންފުންޏާ.
- އެ ކުންފުނީގެ ހިއްސާދާރަކާ އެކީގައި ޑީއެމްޑީ އިކްރާމް ސިންގަޕޫރަށް ދަތުރެއް ކުރެއްވި.
- އެ ދަތުރުގައި ދެކޮޅު ޓިކެޓަށް ފައިސާ ދެއްކީ އޮކްސިޖަން ސިލިންޑަރު ގަންނަން ހަވާލުކުރި ކުންފުނީގެ ހިއްސާދާރު.
- އޮކްސިޖަން ސިލިންޑަރުގެ ވިޔަފާރީގައި އުޅޭ ކުންފުންޏަކަށް ނުވާތީ ޕްރޮކިއުމެންޓް މެނޭޖަރު ދެކޮޅު ހެދުމުން އޭނާ ބަދަލުކުރި.
ކޮމިޓީގެ މުގައްރިރު އަދި ހުޅުދޫ ދާއިރާގެ މެމްބަރު އިލްޔާސް ލަބީބް، މައްސަލައިގެ ތަފްސީލް ކޮމިޓީއާ ހިއްސާކުރައްވަމުން ވިދާޅުވީ ޕްރޯބިޒްގެ އަގު އެހެން ކުންފުނިތަކަށް ވުރެން ބޮޑު ކަމަށެވެ. އެ މީހުންނާ އެ ސިލިންޑަރުތައް ހަވާލުކުރަން ޖެހޭ ސަބަބެއް ކަމަށް އިކްރާމް އިރުޝާދު ދެއްވާފައި ވަނީ އަގު ބޮޑުވިޔަސް ވަރަށް އަވަހަށް ބޭނުން ވާތީ ކަން ކޮމިޓީއަށް ލިބުނު ލިއުންތަކުން އެނގޭ ކަމަށް އިލްޔާސް ވިދާޅުވި އެވެ.
މޯލްޑިވް ގޭހުން އޮކްސިޖަން ސިލިންޑަރު ގެނައުމުގައި ހަދާފައިވާ ގޯސްތައް ބަލަން، ބެލެނިވެރި ކުންފުނި އެސްޓީއޯ އިން ވަނީ އިންޓާނަލް އޮޑިޓެއް ހަދައިފަ އެވެ.
އާ ސިލިންޑަރުތައް ފޮނުވަން އެދުމުން ސިންގަޕޫރުގެ ކުންފުނިން ފޮނުވާފައި ހުރީ ބާ ސިލިންޑަރުތަކެވެ. އެތަކެތި ފޮނުވީ ސާވިސްކޮށްފައި، ބޭރުގައި ކުލަލައި ރީތިކޮށްފަ އެވެ. އެހެންވެ އެ ބަލައިގަތުމަށް އެ ކުންފުނިން މޯލްޑިވް ގޭހަށް އޮތީ ލިއުމުން އެދިފަ އެވެ.
"މިކޮޅުން [ގޭހުން] ދިން ޖަވާބެއް ނެތް ލިޔެކިޔުމަކުން ފެންނާކަށް. އެކަމަކު ސިލިންޑަރުތަކުގައި މައްސަލައެއް ދިމާނުވާނެ ކަމުގެ ގެރެންޓީ ދީފައި އޮތް އީމެއިލެއް ގޭހަށް ފޮނުވާފައި އިނދޭ،" އިލްޔާސް ވިދާޅުވި އެވެ.
ފުރަތަމަ 1،000 ސިލިންޑަރު ގަނެފައި ވަނީ ސިލިންޑަރަކަށް 253 ޑޮލަރަށެވެ. މިއީ އާ ސިލިންޑަރުތައް ކަމަށް ބެލެވޭ ކަމަށާއި އެކަން ކޮމިޓީން އިތުރަށް ޔަގީންކުރާނެ ކަމަށް އިލްޔާސް ވިދާޅުވި އެވެ.
އެކަަމަކު 3،129 ސިލިންޑަރަކީ ބާ އެއްޗިއްސެވެ. މާލެއާ ހަމައަށް ގެނެސްފައި ވަނީ އެއްޗެއް 224 ޑޮލަރަށެވެ.
ކުންފުނީގެ ހިއްސާދާރާ އެކު ޑީއެމްޑީ އާއި މަޖިލިސް މެމްބަރެއްގެ ދަތުރެއް!
އެސްއޯއީ ކޮމިޓީގައި އާއްމުވި މައުލޫމާތުން އެނގެނީ އޮކްސިޖަން ސިލިންޑަރުތައް ގަތުމަށް އެ ކުންފުންޏާ ހަވާލުކުރުމުގެ ކުރިން އިތުރު މީހަކާ އެކުގައި އިކްރާމް ވަނީ ސިންގަޕޫރަށް ދަތުރެއް ކުރައްވައިފަ އެވެ. ޑީއެމްޑީގެ ދަތުރަށް ދިވެއްސަކު ފައިސާ ދައްކާފައިވާ އިރު އެ މީހާ އަކީ ސިންގަޕޫރުގެ ޕްރޯބިޒް ކުންފުނީގެ ހިއްސާ އޮންނަ ޑައިރެކްޓަރެކެވެ.
"އޭނާ ޓިކެޓަށް ޕޭ ކުރި ކަމަަށް ލިޔެކިޔުންތައް ހުރީ، ދެކޮޅަށް ވެސް ފައިސާ ދައްކާފައި އެބަހުރި،" އިލްޔާސް ވިދާޅުވި އެވެ.
މި ދަތުރުގައި ރައްޔިތުންގެ މަޖިލީހުގެ މެމްބަރަކު ޑީއެމްޑީއާ އެކުގައި ވަޑައިގެންނެވި ނަމަވެސް އިތުރަށް ބަލަންޖެހޭ ކަންކަން ހުރުމުން ކަމަށް ވިދާޅުވެ ކޮމިޓީގައި މުގައްރިރު އެ މެންބަރުގެ ނަމެއް ހާމައެއް ނުކުރައްވަ އެވެ.
އެނގިފައިވާ ގޮތުގައި އެއީ ތިނަދޫ ދެކުނު ދާއިރާގެ އެމްޑީޕީ މެންބަރު އަބްދުﷲ ސަނީފެވެ. ނަމަވެސް ޚިޔާނާތާ އޭނާއާ ގުޅުންހުރި ކަމުގެ އެއްވެސް ހެއްކެއް އަދި ކޮމިޓީއަށް ލިބިފައެއް ނުވެ އެވެ.
މި ޚިޔާނާތާ ގުޅިގެން މެމްބަރުންނަށް ވާހަކަ ދައްކަވަން ލިބުނު ފުރުސަތުގައި އެއް ބޭފުޅަކު ވިދާޅުވީ އޮކްސިޖަން ސިލިންޑަރު ގެންނަން ސިންގަޕޫރުގެ ޕްރޯބިޒަށް ހަވާލުކުރީ މޯލްޑިވް ގޭހުގެ ޕްރޮކިއުމެންޓް މެނޭޖަރު ވެސް ބަދަލުކޮށްގެން ކަމުގެ މައުލޫމާތު ލިބޭ ކަމަށެވެ. އޭނާ ބަދަލުކުރި ސަބަބެއް ކަމަށް ވަނީ އިލެކްޓްރޯނިކް ސާމާނު ވިއްކާ ޕްރޯބިޒަކީ އޮކްސިޖަން ސިލިންޑަރުގެ ވިޔަފާރި ކުރާ ކުންފުންޏެއް ނޫން ކަމަށް ބުނެ ކޯޓޭޝަން ހޯދަން ދެކޮޅު ހެދުމެވެ.
މި މައްސަލައިގައި ހުށަހެޅި ލިއުންތައް އިތުރަށް ދިރާސާކޮށް އިތުރު ބައްދަލުވުމެއް ބާއްވާގޮތަށް ވަނީ ހަމަޖައްސައިފަ އެވެ.