ކޮވިޑް-19އާ ގުޅިގެން 4،128 އޮކްސިޖަން ސިލިންޑަރު ގެނައުމުގައި ޚިޔާނާތް ހިންގާފައިވާ މޯލްޑިވް ގޭސްގެ މެނޭޖިން ޑިރެކްޓަރު އަލީ އިކްރާމްގެ މައްޗަށް ކޮށްފައިވާ ކޮރަޕްޝަންގެ ތުހުމަތު އޭނާ މިއަދު ދޮގުކުރައްވައިފި އެވެ.
އަންހެން މުވައްޒަފަކަށް ޖިންސީ ފުރައްސާރަ ކުރި ކަމުގެ ތުހުމަތުގައި ސަސްޕެންޑްކޮށްފައިވާ އިކްރާމްގެ މައްޗަށް ތުހުމަތުކުރަނީ ގޭސް ސިލިންޑަރު ގަތުމުގައި ހިންގި 16 މިލިއަން ރުފިޔާގެ ކޮރަޕްޝަނެއްގައި ބައިވެރިވުމެވެ. ރައްޔިތުންގެ މަޖިލީހުގެ އެސްއޯއީ ކޮމިޓީން އަންނަނީ އެ މައްސަލަ ބަލަމުންނެވެ.
މި މައްސަލައިގައި އެންމެ ބޮޑު ތުހުމަތަކީ، އޮކްސިޖަން ސިލިންޑަރު ގަތުމަށް ހަވާލުކުރި ސިންގަޕޫރުގެ ޕްރޯ ބިޒް ކުންފުނީގެ ހިއްސާދާރަކު ޚަރަދުކޮށްގެން ގޭހުގެ ޑީއެމްޑީ އިކްރާމް ސިންގަޕޫރަށް ދަތުރެއް ކުރައްވާފައި ވުމެވެ. ލިޔެކިޔުމުން އެ ހަރަދުތައް ފެންނަން އެބައޮތެވެ.
ޕްރޯބިޑް ކުންފުނީގެ ހިއްސާދާރަކާ ގާތް ގުޅުމެއް އޮންނަ ކަމަށް އިކްރާމް މިއަދު ވަނީ އެއްބަސްވެވަޑައިގެންފަ އެވެ. ހަ ކުންފުންޏަކުން ކުރިމަތިލިއިރު 3،000 ސިލިންޑަރު ޕްރޯބިޒްއާ ހަވާކުރީ އެހެން ކުންފުނިތަކަށް ވުރެން ވެސް ބޮޑު އަގުގަ އެވެ.
މި މައްސަލައިގައި އެސްއޯއީ ކޮމިޓީއަށް އިކްރާމް ހާޒިރުކުރުމުން ވިދާޅުވީ ބަޔަކު އަޑީގައި ތިބެ އޭނާ ފްރޭމްކޮށްފައިވާ ކަަމަށެވެ. އޮކްސިޖަން ސިލިންޑަރު ހޯދުމާ ގުޅޭ ގޮތުން ކުންފުނިން ހަދާފައިވާ އިންޓާނަލް އޮޑިޓް ރިޕޯޓުގައި ހުރި ވާހަކަތައް ވެސް އިކްރާމް ދޮގުކުރެއްވި އެވެ.
އޭނާ ވިދާޅުވީ ކޮވިޑު ފަރުވާގެ ބޭނުމަށް އޮކްސިޖަން ސިލިންޑަރު ހޯދީ ވަރަށް އަވަސް އަރުވާލައިގެން ކަަމަށާއި ޕްރޮކިއުމެންޓް ޕްރޮސެސްގައި އޭނާގެ ބައިވެރިވުމެއް ނޯންނާނެ ކަމަށެވެ.
އިކްރާމް ވިދާޅުވި ގޮތުގައި އޮކްސިޖަން ސިލިންޑަރު ގަތުމަށް ސިންގަޕޫރުގެ ޕްރޯބިޒް ކުންފުންޏާ ހަވާލުކުރާކަށް އޭނާ އެއްވެސް މުވައްޒަފަކަށް އިރުޝާދު ދެއްވައިފައެއް ނޯންނާނެ އެވެ. ޕްރޯބިޒުން ބާ ސިލިންޑަރުތަކެއް ފޮނުވުމުން ވެސް އަޅާނުލީ އޭނާގެ ދައުރެއް އޭގައި ނޯންނާނެތީ ކަމަށް ވިދާޅުވި އެވެ.
އިކްރާމް ވިދާޅުވީ ބާ ސިލިންޑަރުތަކާ ހަވާލުވީ ކުންފުނީގެ ކަމާ ބެހޭ މުވައްޒަފެއް ކަމަށެވެ.
އާ ސިލިންޑަރުތަކަކަށް ފައިސާ ދައްކައި ރިފާބިޝް ސިލިންޑަރުތައް ގެނައުމުން ކުންފުނި ހިންގެވުމާ ހަވާލުވެ ހުންނެވި ބޭފުޅާގެ ހައިސިއްޔަތުން ފިޔަވަޅު ނޭޅީ ކީއްވެތޯ އާއި އެކަމާ މެދު އަމަލުކުރެއްވީ ކޮން ގޮތަކަށްތޯ އެސްއީއޯ ކޮމިޓީގެ މުގައްރިރް އިލްޔާސް ލަބީބް އެއްސެވުމުން އިކްރާމް ވިދާޅުވީ އޭނާ އެއްވެސް ކަމެއް ނުކުރައްވާ ކަމަށެވެ. ސަބަބަކީ އެއްވެސް ޕްރޮސެސްއެއްގެ ތެރެއަށް އޭނާ ވެންނެވުމަށް ބޭނުން ނުވާތީ ކަަމަށެވެ.
އޭރު މޯލްޑިވް ގޭހުން އައީ އެކަމުގެ އޮޑިޓް ކުރަމުންނެވެ.
"އޮޑިޓް ފެއްޓުމަށް ފަހު އަޅުގަނޑު ވަނުމަކީ އެންމެ ރަނގަޅު މަރުހަލާ ކަމަށް ގަބޫލު ނުކުރެވުނީ،" އިކްރާމް ވިދާޅުވި އެވެ.
ރިފާބިޝްޑް ސިލިންޑަރުތަކަކަށް ވުމުން ހަވާލު ނުވާނެ ކަން ސިންގަޕޫރުގެ ކުންފުންޏަށް އެންގެވިންތޯ އިލްޔާސް ލަބީބް އެއްސެވުމުން އިކްރާމް ވިދާޅުވީ އެކަން އަންގައި ކްރެޑިޓް ނޯޓެއް ޕްރޯބިޒް ކުންފުނިން ހޯދަން މަސައްކަތް ކުރެއްވި ކަމަށެވެ. ބޯޑުން މި ސިލިންޑަރާ ދެމެދު ނިންމި ގޮތް އޭނާ އަށް ސާފުނުވުމަކީ ވެސް ފިޔަވަޅު އެޅުން ލަސްވި ސަބަބެއްގެ ގޮތުގައި އިކްރާމް ދެއްކެވި އެވެ.