އެކްޓަރު ވިވެކް އޮބެރޯއީ ފިލްމު ހަދަން ފަށައި އޭނާގެ އަމިއްލަ ފިލްމު ކުންފުނި އޮބެރޯއީ މެގަ އެންޓައިންމަންޓުން މިދިޔަ އަހަރު އިއުލާންކުރި ދެ ފިލްމުގެ ތެރެއިން ހޮރޯ ތުރިލާ "ރޯޒީ: ދަ ސެފްރޯން ޗެޕްޓާ" ގެ ކާސްޓުގައި އަރްބާޒް ޚާނާއި މަލިކާ ޝެރާވަތު ވެސް ހިމަނައިފި އެވެ.
ބޮލީވުޑް ހަންގާމާ އިން ބުނީ ސަލްމާންގެ ކޮއްކޮ އަރްބާޒް ފިލްމުގައި ކުޅޭނީ ވަރަށް ޓަފް ފުލުހެއްގެ ރޯލު ކަމަށާ މަލިކާގެ ކެރެކްޓާ އަކީ ވެސް ވާހަކައިގެ ވަރަށް ބޮޑު ހިއްސާއެއް ކަމަށެވެ. އެ ނޫހުން ބުނީ މަލިކާ ފިލްމުން ފެންނާނީ މީގެ ކުރިން އޭނާ ނުކުޅޭ ކަހަލަ ވަރަށް ތަފާތު ރޯލަކުން ކަމަށެވެ. ނަމަވެސް އޭނާ އާއި އަރްބާޒަށް "ރޯޒީ" އިން ފުރުސަތު މިއީ ބޮލީވުޑްގައި މާ ވިދާ ތަރިންނެއް ވެސް ނޫނެވެ. މަލިކާގެ ކެރިއަރުގައި މިހާތަނަށް ކުޅުނު އެންމެ ފާހަގަކޮށްލެވޭ ފިލްމަކީ "މާޑާ" އެވެ.
ވިވެކް ޕްރޮޑިއުސްކޮށް، މުހިއްމު ރޯލެއް ވެސް ކުޅޭ "ރޯޒީ" އަކީ ކުރީގެ ޓީވީ ސިލްސިލާ "ކަސޯޓީ ޒިންދަގީ ކީ" ގެ ޕްރޭނާގެ ރޯލު ކުޅެގެން މަޝްހޫރުވި ޝްވޭތާ ތިވާރީގެ ދަރިފުޅު ޕަލަކް ތިވާރީ ބޮލީވުޑަށް ތައާރަފުރާ ފިލްމެވެ. އޭނާއާ އެކު މިދިޔަ އަހަރު ފިލްމުގެ ޕޯސްޓަރުތަކެއް ވެސް ދައްކާލާފައިވެ އެވެ. "ރޯޒީ" ގެ ފުރަތަމަ ޝޫޓިން ޝެޑިއުލް ޑިސެމްބަރު މަހުގެ ތެރޭގައި ޕޫނޭގައި ނިންމާފައިވާ އިރު، ދެވަނަ ޝެޑިއުލް އަންނަ މަހުގެ ތެރޭގައި ފަށާނެ އެވެ.
މީގެ ޑައިރެކްޓަރަކީ ވިޝާލް ރަންޖަން މިޝްރާ އެވެ.
ވިވެކް ޕްރޮޑިއުސްކޮށް ކުޅޭ ފިލްމު "އިތީ: ކޭން ޔޫ ސޯލްވް ޔޯ އޯން މާޑާ؟" އަކީ ވެސް ވިޝާލް ޑައިރެކްޓްކުރާ ފިލްމެކެވެ. މި ފިލްމު ވެސް އިއުލާންކުރީ މިދިޔަ އަހަރު އެވެ. "އިތީ" އިން ބަތަލާ ސުޝްމިތާ ސެންގެ ކޮއްކޮ ރަޖީވް ސެން ބޮލީވުޑަށް ނެރޭނެ އެވެ.