ކޮވިޑް-19އާ ގުޅިގެން ވެންޓިލޭޓަރުތަކެއް ގަންނަން 30 މިލިއަން ރުފިޔާ ދައްކައި އެކަމަކު އެ އެއްޗެހި ނުލިބުނު މައްސަލައިގައި ދައުވާ ނުކުރަން ޕްރޮސެކިއުޓާ ޖެނަރަލް ނިންމެވުމުން ކުރީގެ ރައީސް އަދި މިހާރު ރައްޔިތުން މަޖިލީހުގެ ރައީސް މުހައްމަދު ނަޝީދު ސަރުކާރަށް ވަރަށް ބޮޑަށް ފާޑު ވިދާޅުވެއްޖެ އެވެ.
ނަޝީދު މިއަދު ކުރެއްވި ޓުވީޓެއްގައި ވިދާޅުވީ ވެންޓިލޭޓަރުގެ މައްސަލާގައި މަތި ޖެހުނަ ދީފި ނަމަ ރާއްޖޭގެ ރައްޔިތުންނަށް އިތުރަށް ލިބޭނެ ގެއްލުން ބޮޑުވާނެ ކަމަށެވެ. އަދި ފެންނަނީ ސަރުކާރުން މިކަމުގައި ބައިވެރިވެފައިވާ ތަން ކަމަށް ވިދާޅުވެ، އެ މަނިކުފާނު ދެން ލިއުއްވީ "ވައްކަން ކުރާ ސަރުކާރަކާ އެކީ އެމްޑީޕީ އޮންނާކަށް ނޭދޭނެ" ކަމަށެވެ.
"މިކަންކަން ބަދަލުކުރަން ޖެހޭ އަދި ރައްޔިތުންނާ އެކުގައި އަޅުގަނޑު މިކަމުގައި ދޫ ދޭކަށް ނެތިން،" ނަޝީދު ވިދާޅުވި އެވެ.
ދުބާއީގެ އެގްޒެކިއުޓާސް ކުންފުންޏާ ހަވާލުކޮށްގެން 75 ވެންޓިލޭޓަރު ގަންނަން ސަރުކާރުން ފައިސާ ދެއްކި އެވެ. ނަމަވެސް މިހާތަނަށް ލިބުނީ އެންމެ 10 ވެންޓިލޭޓަރެވެ. އަނެއް ބައި ލިބޭނެކަމުގެ ޔަގީންކަމެއް ސަރުކާރަކަށް ވެސް ނެތެވެ.
އެ މުއާމަލާތުގައި އެޑްވާންސްކޮށް ފައިސާ ދެއްކުމުގައި ކޮރަޕްޝަނުގެ އަމަލުތައް ހިންގާފައިވާ ކަމަށް ތުހުމަތުކޮށް، އެންޓި ކޮރަޕްޝަން ކޮމިޝަން (އޭސީސީ) އިން ޕީޖީ އަށް މައްސަލަ ފޮނުވުމުން ޕީޖީ ހުސެއިން ޝަމީމް ނިންމެވީ ދައުވާކުރެވޭ ވަރުގެ ހެއްކެއް ނެތް ކަމަށެވެ.
އެގޮތަށް ނިންމީ ކުރިން ހޯދާފައިވާ ހެއްކާއި ގަރީނާގެ މައްޗަށް ބަލައި ޖިނާއީ ކުށެއްގައި ސާބިތު ކޮށްދޭން ޖެހޭ އުންސުރުތައް ސާބިތުކޮށްދެވިދާނެ ކަމަށް ނުފެންނާތީ ކަމަށް ވެސް ޕީޖ އޮފީހުން ބުނެ އެވެ.
ނަޝީދު ވަނީ އެމްޑީޕީގެ ގައުމީ މަޖިލީހުގެ ވަޓްސްއެޕް ގުރޫޕުގައި ވެސް އެ މަނިކުފާނުގެ ހިތްޕުޅުހަމަނުޖެހުން ފާޅުކުރައްވައިފަ އެވެ. އެގޮތުން ޕީޖީ ހުސެއިން ޝަމީމް އާއި އޭސީސީގެ ރައީސް މަރިޔަމް ޝިއުނާގެ އިތުބާރު ނެތްކަމުގެ ވޯޓު ނަގަން ފެނިވަޑައިގަންނަވާ ކަމަށް ވެސް އެ ގްރޫޕްގައި ނަޝީދު ވިދާޅުވި އެވެ.
އެ ވާހަކަފުޅަށް ވަޓްސެޕް ގްރޫޕުގައި ބައެއް މެންބަރުން ތާއީދު ވެސް ކުރެއްވި އެވެ.
ވެންޓިލޭޓަރު މައްސަލާގައި ޝާމިލްވި ހުރިހާ ފަރާތްތަކަށް އަދަބު ދޭން ޖެހޭ ކަމަށް ނަޝީދު މީގެ ކުރިން ވެސް ވިދާޅުވެފައިވެ އެވެ. އެންމެ ފުރަތަމަ ދައުވާ ނުކުރަން ނިންމި މައްސަލަ ރައްޔިތުން މަޖިލީހުން ވެސް ބެލި އެވެ.
އެ މައްސަލާގައި ކުރީގެ ހެލްތު މިނިސްޓަރު އަބްދުﷲ އަމީންގެ އިތުބާރު ނެތް މައްސަލަ ރައްޔިތުންގެ މަޖިލީހަށް ވައްދަން ނިންމާފައި ވަނިކޮށް، އޭނާ އިސްތިއުފާ ދެއްވީ އެވެ. އަދި އިސްތިއުފާގެ ސިޓީގައި އަމީން ވިދާޅުވި ގޮތުގައި، މަގާމުން ދުރުކުރުމަށް "ވާންކުރުމަކީ" އެއީ ކޮންމެހެން އޭނާ އަށް އަމާޒުވާ "އެތިފަހަރެއް" ކަމަށް ދެކެވަޑައިނުގަންނަވަ އެވެ.