ޕްރޮސެކިއުޓާ ޖެނެރަލް ހުސައިން ޝަމީމްގެ އިތުބާރު ނެތްކަމުގެ މައްސަލަ ރަައްޔިތުންގެ މަޖިލީހަށް ހުށަހަޅަން އިދިކޮޅު ކޯލިޝަނުން ނިންމައިފި އެވެ.
ކޮވިޑް-19 އާ ގުުޅިގެން ރާއްޖެ އަށް ގެންނަން ހަވާލުކުރި ވެންޓިލޭޓަރުތައް ނުލިބުނު މައްސަލާގައި ޖިނާއީ ދައުވާ ނުކުރަން ޕްރޮސެކިއުޓާ ޖެނެރަލް ނިންމެވުމުން އެކަމަށް ގިނަ ފާޑުކިޔުންތަކެއް ވަނީ އަމާޒުވެފަ އެވެ.
އިދިކޮޅު ކޯލިޝަނުން މިއަދު ބޭއްވި ނޫސްވެރިންގެ ބައްދަލުވުމެެއްގައި އެ ކޯލިޝަންގައި ހިމެނިވަޑައިގަންނަވާ މަޖިިލީހުގެ މަޑުއްވަރީ ދާއިރާގެ މެމްބަރު އަދި ކުރީގެ ޑިފެންސް މިނިސްޓަރު އާދަމް ޝަރީފް ވިދާޅުވީ ކޮވިޑް-19 ގެ ދުވަސްވަރު ރައްޔިތުން ބަލި މަޑުކަމެއްގެ ތެރޭގައި ތިއްބާ ވެންޓިލޭޓަރުގެ މައްސަލާގައި ބޮޑު ޚިޔާނާތެއް ހިންގައި، އަދި އެކަމަށް ޒިންމާވާނެ މީހަކު ނެތުމަކީ ސީރިއަސް މައްސަލައެއް ކަމަށެވެ. އެހެންވެ، ޕީޖީގެ އިތުބާރު ނެތްކަމުގެ މައްސަލަ މާދަމާ މަޖިލީހަށް ހުށަހަޅުއްވާނެ ކަމަށް އޭނާ ވިދާޅުވި އެވެ.
"އެ މައްސަލަ މާދަމާ އަޅުގަނޑުމެން ވައްދާނަން. އެ މައްސަލައަކީ ސީރިއަސް މައްސަލައަކަށް ވާތީ އަޅުގަނޑުމެން ބަލާނީ ވީހާ ވެސް އަވަހަށް އެކަން ކުރިއަށް ގެންދަން." އާދަމް ވިދާޅުވި އެވެ.
އާދަމް ވިދާޅުވީ ވެންޓިލޭޓަރުގެ މައްސަލާގެ ޚިޔާނާތް ބަލަން އެމްޑީޕީ މެމްބަރުން ވެސް ތާއީދުކުރާތީ ޕީޖީގެ އިތުބާރު ނެތްކަމުގެ މައްސަލަ އަށް އެމްޑީޕީގެ ތާއީދު ލިބޭނެ ކަމަށް ގަބޫލު ކުރައްވާ ކަމަށެވެ.
ވެންޓިލޭޓަރު މައްސަލާގައި ޖިނާއީ ދައުވާ ކުރެވޭނެ ހެއްކެއް ނެތް ކަމަށް ޕީޖީ ނިންމެވުމުން މަޖިލީހުގެ ރައީސް މުހައްމަދު ނަޝީދު ވެސް ވަނީ އެކަމަށް ފާޑު ވިދާޅުވެފަ އެވެ. އަދި ވަގު ސަރުކާރަކާ އެކު އެމްޑީޕީ އޮންނަން އެދިވަޑައިނުގަންނަވާ ކަމަށް އެމަނިކުފާނު ވަނީ ވިދާޅުވެފަ އެވެ.
