ވަރަށް ބޮޑު އާލާސްކަންފުޅަކަށް ފަރުވާ ހޯއްދަވަން އަހަރެއްހާ ދުވަސް ހޭދަކުރެއްވުމަށް ފަހު އަލުން ރައްޔިތުންގެ މަޖިލީހަށް ވަޑައިގެންނެވުމުން ކޮމަންޑޫ ދާއިރާގެ މެމްބަރު ހުސައިން ވަހީދު، އޭނާއަށް އެހީތެރިވި އެންމެނަށް މިއަދު ޝުކުރު އަދާކުރައްވައިފި އެވެ.
ޔުނައިޓެޑް އަރަބް އެމިރޭޓްސްގެ ހޮސްޕިޓަލެއްގައި ފަރުވާ ހޯއްދެވުމަށް ފަހު ރާއްޖެއަށް ވަޑައިގެންނެވި ފަހުން ރައްޔިތުންގެ މަޖިލީހަށް ހުސައިން ފުރަތަމަ ވަޑައިގެންނެވީ އިއްޔެ އެވެ. މަޖިލީހުގެ ތަޅުމަށް އޭނާ ވަދެވަޑައިގެންނެވުމުން ރިޔާސަތުން މަޖިލީހުގެ ރައީސް މުހައްމަދު ނަޝީދު އެކަން ފާހަގަކުރައްވައި މަރުހަބާ ވިދާޅުވި އެވެ.
އެކަމަކު ކުރީގެ ރައީސް ވިދާޅުވީ ހުސައިންގެ ހާލުކޮޅު އަދިވެސް މުޅިން ރަނގަޅު ނޫން ކަމަށެވެ.
އިއްޔެގެ ޖަލްސާގައި ބައިވެރިވެވަޑައިގެންނެވި ނަމަވެސް އެއްވެސް ބަހުސެއްގައި ވާހަކައެއް ނުދައްކަވަ އެވެ. އެކަމަކު މިއަދު ވާހަކަ ދެއްކެވި އެވެ. އެގޮތުން ވާހަކަ ފައްޓަވަމުން ފުރަތަމަ ވިދާާޅުވީ ޝުކުރުގެ ލިސްޓެކެވެ.
"ބޭސްފަރުވާއެއް ކުރަމުން މިއަދު މި ހިސާބަށް އައިސް އަނެއްކާވެސް ތިޔަ އެންމެ ބޭފުޅުންނާ ބައްދަލުވެ އެއްޗެއް ބުނެލަން ލިބުުމުން އަޅުގަނޑު ހަމަ މާތްﷲ ސުބްހާނަހޫ ވަތަޢާލާއަށް ހަމްދާއި، ޝުކުރުކުރަން،" ހުސެއިން ވިދާޅުވި އެވެ. އެ ބަސްކޮޅާ އެކު އިސްދަށަށް ޖައްސާލެއްވުނެވެ.
ދެން ވިދާޅުވީ ރާއްޖެއިން ބޭރުގައި ފަރުވާ ހޯއްދަވަމުން ގެންދެވި އިރު ދާއިރާގެ ގިނަ އަދަދެއްގެ ރައްޔިތުންނާއި ހެޔޮއެދިވަޑައިގަންނަވާ އެތައް މެމްބަރުންނެއް ގުޅުއްވައި ހާލު ބައްލަވަމުން ގެންދެވި ކަމަށެވެ. އެކަމަށްޓަކައި އެ އެންމެންނަށް ވެސް ޝުކުރު އަދާކުރެއްވި އެވެ.
އާލާސްކަންފުޅާ ބެހޭ ގޮތުން އެއްވެސް ވާހަކައެއް ނުދައްކަވަ އެވެ.
ހުސެއިންގެ ސިއްހީ ހާލުކޮޅު ގޯސްވެގެން ޔޫއޭއީގެ ހޮސްޕިޓަލެއްގެ އައިސީޔޫގައި ވެސް އެތައް ދުވަހަކު އޮންނެވި އެވެ.