ކެއުންބުއިމުގެ ޚިދުތްދޭ ތަންތަން، ކުރިއަށް އޮތް ރޯދަމަސް ފެށެންދެން މެންދަމު އެކެއް ޖަހަންދެން ހުޅުވައިގެން ޚިދުމަތް ދިނުމަށް އިކޮނޮމިކް މިނިސްޓްރީން މިއަދު ހުއްދަ ދީފި އެވެ.
ކަލަންޑަރުގައިވާ ގޮތުން މި އަހަރުގެ ރޯދަމަސް ފެށޭނީ މި މަހުގެ 13 ގަ އެެވެ.
އިކޮނޮމިކް މިނިސްޓްރީން ކުރި އިއުލާނެއްގައި ބުނީ، ރޯދަމަސް ފެށެންދެން، ކެފޭ/ރެސްޓޯރަންޓު ނުވަތަ ކެއުންބުއިމުގެ ޚިދުމަތް ދޭ ތަންތަން ފަތިހު 4:30 އިން މެންދަމު އެކެއް ޖަހަންދެން މިހާރު ހުޅުވިފައި ބެހެއްޓޭނެ ކަމަށެވެ.
ނަމަވެސް އެ ތަންތަން ރޯދަމަހު ހުޅުވާފައި ބެހެއްޓުމަށް ސަރުކާރުން ހުއްދަ ދީފައި ވަނީ ކޮންމެ ދުވަހެއްގެ ހަވީރު 5:30 އިން މެންދަމު 3:00 އާ ދެމެދުގަ އެވެ.
މާލެ ސަރަހައްދުގައި ކޮވިޑް-19 ފެތުރިފައިވާތީ މިހާރު ކެފޭ/ރެސްޓޯރަންޓުތައް ހުޅުވިފައި ބެހެއްޓެނީ ރޭގަނޑު 10:30 ވަންދެންނެވެ. ނަމަވެސް މިއަދު ގެނައި ބަދަލާއެކު، އާންމު އުސޫލަށް އެ ގަޑިތައް ފެތުނީ އެވެ.
ކެއުންބުއިމުގެ ޚިދުމަތްދޭ ތަންތަން ހުޅުވާފައި ބެހެއްޓޭ ގަޑި އިތުރުކުރިޔަސް ކޮވިޑާ ގުޅިގެން އެޗްޕީއޭ އިން ހަދާފައިވާ ގައިޑްލައިނަށް އަމަލުކުރަން އިކޮނޮމިކް މިނިސްޓްރީން އެދެ އެވެ.