ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ސެކިއުރިޓީ ބްރީޗްވި ގޮތުގެ ތަހުގީގެއް ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީން) ފަށައިފި އެވެ.
ނަޝީދުގެ ސެކިއުރިޓީ ބްރީޗްވި ގޮތުގެ ތަހުގީގެއް ހިންގަން ނިންމީ އެކޮމިޓީން މިރޭ ބޭއްވި ބައްދަލުވުމުގަ އެވެ. އެކޮމިޓީގެ ބައްދަލުވުން މިރޭ ވެސް ކުރިއަށް ގެންދިޔައީ ސިއްރު ބައްދަލުވުމެއްގެ ގޮތުގަ އެވެ.
ބައްދަލުވުމަށް ފަހު ނެރުނު ބަޔާނުގައި ކޮމިޓީން ބުނީ ދައުލަތުގެ ތިން ބާރުގެ ތެރެއިން ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ސަލާމަތީ ހިދުމަތްތަކުން ރައްކާތެރިކަން ދެމުން ދަނިކޮށް، އެ ރައްކާތެރިކަން ބްރީޗްވި ގޮތުގެ އިންކުއަރީއެއް ހަދަން ނިންމާފައިވާ ކަަމަށެވެ.
ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ "މިހާރު"އަށް މިރޭ ވިދާޅުވީ މަޖިލީހުގެ ރައީސް މުހައްމަދު ނަޝީދަށް ދިން ހަމަލާއަކީ ދައުލަތުގެ ތިން ބާރުގެ ތެރެއިން އެއް ބާރަށް ދިން ހަމަލާއެއް ކަމަށް ވާތީ އެ ތަހުގީގު ކުރިއަށް ގެންދިއުމަކީ މަޖިލީހުން މިވަގުތު އެންމެ އިސްކަންދޭނެ ކަންތައް ކަމަށެވެ.
" ސެކިއުރިޓީ ބްރީޗްވިކަން އެއޮތީ ފެންނަން. 241 ކޮމިޓީގެ އެ އިންކުއަރީ އަކީ މަޖިލީހުން އެންމެ އިސްކަންދޭނެ ކަންތައް،" އީވާ ވިދާާޅުވި އެވެ.
ބުރާސްފަތިދުވަހުގެ ރޭ ނަޝީދު ދިރިއުޅުއްވާ ގޭގެ ކައިރިން، ކާރުކޮޅަށް އަރާވަޑަައިގަންނަވަން އުޅުއްވަނިކޮށް އައިއީޑީއެއް ގޮއްވާލައިގެން ދިން ހަމަލާގައި އެމަނިކުފާނު ވަރަށް ބޮޑަށް ޒަހަމްވި އެވެ. އެ ހަމަލާގައި ލިބިވަޑައިގެންނެވި ޒަހަމްތަކަށް ފަރުވާކުރުމަށް އޭޑީކޭ ހޮސްޕިޓަލުން ވަނީ ގިނަ ސާޖަރީތަކެއް ހަދައިފަ އެވެ. އެކަމަށް ސޯޅަ ގަޑިއިރަށް ވުރެ ގިނަ ވަގުތު ހޭދަވި އެވެ. ނަޝީދަށް މިހާރު ފަރުވާދެމުން އަންނަނީ އައިސީޔޫގަ އެވެ.
ނަޝީދަށް ހަމަލާ ދިނުމާ ގުޅިގެން ބުރާސްފަތިދުވަހުގެ ރޭ ބޭއްވި ބައްދަލުވުމުގައި 241 ކޮމިޓީން ނިންމީ ހަމަލާ ތަހުގީގުކުރުމަށް ބޭރުގެ މާހިރުންގެ އެހީތެރިކަން ހޯދަން ސަލާމަތީ ހިދުމަތްތަކަށް ލަފާދިނުމަށެވެ. މިރޭގެ ބައްދަލުވުން ސިއްރުކުރުމުގެ ކުރިން ކޮމިޓީގެ މުގައްރިރު އަދި ހިތަދޫ އުތުރު ދާއިރާގެ އެމްޑީޕީ މެމްބަރު މުހައްމަދު އަސްލަމް ވިދާޅުވީ އެ ލަފަޔާ އެއްގޮތަށް ސަރުކާރުން ބޭރުގެ މާހިރުންގެ އެހީ ހޯދަން ނިންމާފައިވާ ކަމަށެވެ. ނަޝީދަށް ހަމަލާ ދިނުމާ ގުޅިގެން އެރޭ މެންދަމު ގައުމާ މުހާތަބު ކުރެއްވި އިރު، ރައީސް އިބްރާހީމް މުހައްމަދު ސޯލިހު އެކަން އިއުލާނު ކުރެއްވި އެވެ.
"މި ހަމަލާގެ ފުރިހަމަ ތަހުގީގެއް ހިންގުމަށްޓަކައި ބައިނަލްއަގްވާމީ ތަޖުރިބާކާރުންގެ އެހީތެރިކަން މި އަންނަނީ ހޯދަމުން. މިގޮތުން އޮސްޓްރޭލިއާ ފެޑަރަލް ޕޮލިސް އެ ތަހުގީގުގައި ބައިވެރިވުމަށް އަންނަ ހޮނިހިރު ދުވަހު [މާދަމާ] ރާއްޖެ އައުމަށް ވަނީ ހަމަޖެހިފައި،" ރައީސް އެރޭ ވިދާޅުވި އެވެ.