ސްޓެލްކޯއިން ބަހައްޓާފައިވާ ވަގުތީ ޖަނަރޭޓަރުތައް ބޭނުންކުރުން ހުއްޓާލައި އެ ސަރަހައްދުގައި ދިރިއުޅޭ މީހުންނަށް ދިމާވާ އުނދަގޫތައް ހައްލުކުރަން، މާލެ-ހުޅުމާލެ އިންޓަކަނެކްޝަންގެ މަސައްކަތް އަންނަ މަހުގެ ފަހުކޮޅަށް ނިންމައި ކަރަންޓުދޭން ފަށަން ޔުޓިލިޓީ ރެގިއުލޭޓަރީ އޮތޯރިޓީން އެ ކުންފުންޏަށް އިއްޔެ އަންގައިފި އެވެ.
ޔުޓިލިޓީ އޮތޯރިޓީން މިއަދު ނެރުނު ބަޔާނުގައި ބުނީ އެ ޖަނަރޭޓަރުތަކުގެ ސަބަބުން، އެ ހިސާބުގައި ދިރިއުޅޭ މީހުންނަށް އަޑާއި ދުމާއި ވައިބްރޭޝަންގެ ނޭދެވޭ އަސަރުކުރާ ކަމުގެ ޝަކުވާ މިދިޔަ ފެބްރުއަރީ ފަހުކޮޅު ލިބިފައިވާ ކަމަށެވެ.
އެކަންކަން ބެލުމަށްފަހު ހަތަރު ކަމެއް ކުރަން ސްޓެލްކޯއަށް އަންގާފައިވެ އެވެ. އެއީ؛
- އެ މައްސަލައަށް ދާއިމީ ހައްލެއް ލިބެންދެން، ޖަނަރޭޓަރުތަކުން ވާ އުނދަގޫ ކުޑަކުރަން ފިޔަވަޅު އެޅުން.
- މާލެ-ހުޅުމާލެ އިންޓަކަނެކްޝަންގެ މަސައްކަތް ޖުލައި 31، 2021 ގެ ނިޔަލަށް ނިންމައި ކަރަންޓު ދޭން ފެށުން.
- ވަގުތީ ޖަނަރޭޓަރުތައް ބޭނުންކުރުން އޮގަސްޓް 15، 2021 ގެ ކުރިން ހުއްޓާލުން.
- ކުރިއަށް އޮތް ތަނުގައި އިތުރު ޖަނަރޭޓަރެއް ބަހައްޓާ ނަމަ އެކަމަށް ބޭނުންވާ ހުރިހާ އެސެސްމަންޓެއް ހުށަހެޅުމަށް ފަހު ގަވާއިދާ އެއްގޮތަށް މަސައްކަތްކުރުން.
މާނިފާ ހިނގުމާއި ކޮއިމަލާ ހިނގުން ގުޅޭ ކަންމައްޗަށްވާ ގޮތަށް ގާކޮށިތެރޭގައި ޖަނަރޭޓަރުތައް ބަހައްޓާފައި ހުރީ މާލޭއަށް ކަރަންޓު ބޭނުންވާ ވަރު އިތުރުވަމުންދާތީ ކަރަންޓު ނުކެނޑި ހިފެހެއްޓުމަށެވެ. ނަމަވެސް، އެ ސަރަހައްދުގައި އުޅޭ މީހުންނަށް އުނދަގޫ ކުރިމަތިވާކަން ކަމާބެހޭ ފަރާތްތަކުގެ ސަމާލުކަމަށް ގެނައުމުން، ވަގުތީ އިންޖީނުތައް ބަހައްޓާފައިވާ ސަރަހައްދު ސައުންޑް އެޓެނުއޭޝަން މެޓީރިއަލް ބޭނުންކޮށްގެެން ހިޔާކުރަން ފަށާފައިވެ އެވެ.
އެކަމުގައި އެޗްއާރުސީއެމުން ވެސް ނިންމާފައިވަނީ ސާފު އަދި ސިއްހަތަށް ރަނގަޅު މާހައުލެއް ލިބުމުގެ ހައްގުން މަހުރޫމްވެފައިވާތީ، އެ ތަނުގައި އުޅޭ މީހުންނަށް ބަދަލު ހޯދަން ކޯޓަށް ދެވޭނެ ކަމަށެވެ.
އޮތޯރިޓީން ބުނީ އެ މައްސަލައަށް އެންމެ އަވަސް ހައްލެއްގެ ގޮތުގައި ފެނުނީ ވަގުތީގޮތުން ބަހައްޓާފައިވާ ޖަނަރޭޓަރުތައް ބޭނުންކުރުން ހުއްޓާލުން ކަމަށެވެ. އެކަމަކު، އޭގެ ސަބަބުން އެތައް ބަޔަކަށް އުނދަގޫވާނެކަން ފާހަގަކުރި އެވެ.
"ސްޓެލްކޯއިން ފޯރުކޮށްދެމުން ގެންދަނީ އަސާސީ ހިދުމަތަކަށްވެފައި މި ގޮތަށް ކަންކުރުމުން މާލޭގެ އެކި ހިސާބުތަކުން ކަރަންޓު ކަނޑާލަން ޖެހި ޖަނަރޭޓަރުތަކަށް އޭގެ ނޭދެވޭ އަސަރުކުރުމާ އެކު އެތަކެއް ރައްޔިތުންނަށް މިކަމުގެ ސަބަބުން އެކި ކަހަލަ އުނދަގޫތަކާ ކުރިމަތިލާންޖެހިދާނެ އެވެ،" ރެގިއުލޭޓަރީ އޮތޯރިޓީގެ ބަޔާނުގައި ބުންޏެވެ.
"މި އޮތޯރިޓީއާ ސްޓެލްކޯއާ އެކު ކުރެވުނު މަޝްވަރާތަކުގައި، ވަގުތީގޮތުން ބެހެއްޓިފައިވާ ޖަނެރޭޓަރުތަކަކީ ކޮންމެހެން ހިންގަން ޖެހިއްޖެ ހާލަތެއްގައި މެނުވީ ނުހިންގާނެ ޖެނެރޭޓަރުތަކެއްކަމުގެ ޔަގީންކަން ސްޓެލްކޯއިން ވަނީ ދީފަ އެވެ،"
އެ ބަޔާނުގައި ބުނިގޮތުގައި އިންޖީނުގޭގެ މައްސަލައަށް ދާއިމީ ހައްލެއް ލިބޭނީ މާލެ-ހުޅުމާލެ ކަރަންޓު ވިއުގަ ގުޅާލުމުންނެވެ. އެހެން ހެދުމުން، ހުޅުމާލޭގައި ހުންނަ ސްޓެލްކޯގެ އިންޖީނުގެއިން އުފައްދާ ކަރަންޓުގެ މިންވަރަށް ބަލައި ބައެއް ޖަނަރޭޓަރުތައް ނިއްވާލެވޭނެ ކަމަށް ސްޓެލްކޯއާ ހަވާލަދީ އެ އޮތޯރިޓީން ބުންޏެވެ.
އެ މައްސަލައަށް ހައްލެއް ގެންނަން ސައުންޑް އެޓެނުއޭޝަން މެޓީރިއަލް ބޭނުންކޮށްގެެން، ވަގުތީ އިންޖީނުތައް ހުރި ސަރަހައްދު ހިޔާކުރުމުގެ މަސައްކަތް ކުރިއަށްދާކަމަށް ސްޓެލްކޯއިން ބުންޏެވެ.
އޮތޯރިޓީން ބުނީ ޖަނަރޭޓަރުތައް ބަހައްޓައި ހިންގުމުގެ އުސޫލަށް އަމަލުކުރާނަމަ އެފަދަ މައްސަލަތައް ދިމާވުމުގެ ފުރުސަތު ވަރަށް ކުޑަވާނެ ކަމަށެވެ. އަދި މަޝްރޫއުތަކަށް ޑިޒައިންތައް އެޕްރޫވްކޮށް ހުއްދަތައް ހޯދައިގެން ކުރިއަށްދިއުމަށް އެ ފަރާތުން އިލްތިމާސްކޮށްފައި ވެ އެވެ
