ނަޝީދަށް ހަމަލާދޭން ތިން ފަހަރެއްގެ މަތިން މަސައްކަތް ކުރި: ޕޮލިސް

ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން މިދިޔަ މަހުގެ ހަ ވަނަ ދުވަހު ދިން ހަމަލާ އަކީ އެ މަނިކުފާނަށް ހަމަލާދޭން މަސައްކަތް ކުރި ތިން ވަނަ ފަހަރު ކަމަށް ކޮމިޝަނާ އޮފް ޕޮލިސް މުހައްމަދު ހަމީދު މިރޭ ވިދާޅުވެއްޖެ އެވެ.

ނަޝީދަށް ދިން ހަމަލައިގެ ތަހުގީގަށް ފާހަގަވި މުހިންމު ބައެއް މައުލޫމާތުތައް ދިނުމަށް ފުލުހުންނާއި ޕްރޮސެކިއުޓާ ޖެނަރަލްގެ އޮފީސް ގުޅިގެން ބާއްވާ ޕްރެސް ބްރީފިންގައި ހަމީދު ވިދާޅުވި ގޮތުގައި ނަޝީދު އަވަހާރަކޮށްލުމުގެ ތައްޔާރީތައް ވަމުން އައީ 2019 ވަނަ އަހަރުން ފެށިގެން ކަމަށެވެ. އަދި 2020 ވަނަ އަހަރުގެ ފަހުކޮޅު އެކަމުގެ އަމަލީ މަސައްކަތް ފެށިކަން ތަހުގީގަށް ފާހަގަކުރެވިފައިވާ ކަމަށާއި މިދިޔަ މަހުގެ ހަ ވަނަ ދުވަހުގެ ހަމަލާ އަކީ ނަޝީދަށް އަމާޒުކުރި ތިން ވަނަ ހަމަލާ ކަމަށް ހަމީދު ވިދާޅުވި އެވެ.

ޕްރެސް ބްރީފިންގައި އެސިސްޓެންޓް ކޮމިޝަނާ އޮފް ޕޮލިސް މުހައްމަދު ރިޔާޒު ވިދާޅުވި ގޮތުގައި ނަޝީދަށް ހަމަލާ އަމާޒުކުރީ އެމީހުންގެ ވިސްނުމުގައި ނަޝީދަކީ އިސްލާމްދީނާއި ކީރިތި ރަސޫލާއަށް ފާޅުގައި ފުރައްސާރަކޮށް ދީނުން ބޭރުވެފައިވާ މީހެއްގެ ގޮތުގައި ކަނޑައަޅާފައި އެ މަނިކުފާނުގެ ލޭ ހުއްދަވެފައިވާ ކަމަށް ނިންމައިގެން ކަމަށެވެ.

"އެކި ތަންތަނުގައި ރައީސް ނަޝީދު ރަސްމީ ވާޖިބު އަދާކުރުމުގެ ގޮތުން ކުރައްވާފައިވާ ކަންތަކާއި ދައްކަވާފައިވާ ވާހަކަފުޅުގެ ތެރެއިން އެމަނިކުފާނަކީ އިސްލާމްދީނަށް ފާޅުގައި ފުރައްސާރަކުރައްވާ މީހެއް ކަމަށާއި ދީނުން ބޭރުވެފައިވާ މީހެއް ކަމަށް ކަނޑައަޅައި މަރާލަން ޖެހިފައިވާ މީހެއްގެ ގޮތުގައި ދެކި އެ ކަމަށް މަގުފަހިކުރުމަށްޓަކައި ތަކުރާރުކޮށް މަސައްކަތްކުރަމުން އައިކަން ތަހުގީގަށް ފާހަގަކުރެވިފައިވޭ،" ރިޔާޒް ވިދާޅުވި އެވެ.

ރިޔާޒު ވިދާޅުވި ގޮތުގައި އެ ހަމަލާދިން މީހުންނަކީ އައިއެސްގެ ފިކުރަށް ތާއީދުކުރާ ރާއްޖޭގައި އައިއެސްގެ ފިކުރު ފެތުރުމަށް މަސައްކަތްކުރާ ބައެއް ކަމަށާއި އެމީހުން ދިވެހި ދައުލަތް ގަބޫލުނުކުރެ އެވެ. އަދި އެމީހުން ދެކެނީ ދިވެހި ބިމާއި ދައުލަތަކީ "ކުފުރެއް" ކަމަށެވެ.

ރިޔާޒު ވިދާޅުވީ ނަޝީދަށް ހަމަލާދިނުމަށް ބޮން ހަރުކުރި ސައިކަލަކީ 2019 ވަނަ އަހަރު ގަނެފައިވާ ސައިކަލެއް ކަމަށާއި އެމީހުން ވަނީ 2020 ވަނަ އަހަރު އެ ސައިކަލު މ. ޔާގޫތުގެ ކައިރީ ބަހައްޓައިގެން ވެސް ނަޝީދަށް ހަމަލާދޭން މަސައްކަތްކޮށްފައިކަން ތަހުގީގަށް ފާހަގަކުރެވިފައިވާ ކަމަށެވެ. އެގޮތުން ހަތަރު ދުވަހެއްގެ މަތިން އެތަނުގައި އައިއީޑީ ހަރުކޮށްފައިވާ ސައިކަލު ބަހައްޓައިގެން ގޮއްވާލަން މަސައްކަތްކުރި އެވެ.

"އެގޮތަށް ހަމަލާދޭން ވެސް މަސައްކަތްކުރީ އެ ހަމަލާ ޖާނުން ފިދާވެގެން ނަމަވެސް ދޭން ކަމަށް ތަހުގީގަށް އެނގިފައި ވަނީ."

ޔާގޫތުގެ ކައިރީ ސައިކަލު ބަހައްޓައިގެން ހަމަލާ ނުދެވުމުން އެތަނުން ސައިކަލު ނަގައި އައިއީޑީ ޑިސްޕޯސްކުރި ކަމަށް ވެސް ރިޔާޒު ވިދާޅުވި އެވެ. އެކަމަކު އޭގެ ފަހުން ދެވަނަ ފަހަރަށް ހަމަލާދޭން ނިންމީ ނަޝީދު ކަސްރަތަށް ނުކުންނަވާ ވަގުތު އެވެ. އެގޮތުން، މެރީބްރައުން ސަރަހައްދުގައި ހުންނަ ޕާކިން ޒޯނުގައި ސައިކަލު ބަހައްޓައިގެން ގޮއްވާލަން މަސައްކަތްކުރި އެވެ.

"އެތަނުގައި ހަމަލާ ކުރިއަށް ނުގެންދެވުނީ އެމީހުން ބޭނުންވާ ގޮތަށް އެތަނުގައި ހަމަލާ ކުރިއަށް ނުގެންދެވޭނެތީ. އެ މީހުންގެ ރޭވުން ބަދަލުކޮށް މަޖީދީމަގު ނީލޯފަރު ހިނގުމުގައި ހަމަލާދޭން ރޭވީ."

އެ މައްސަލައާ ގުޅިގެން އެންމެ ފުރަތަމަ ހައްޔަރުކުރި ހަތަރު މީހުންގެ ތެރޭގައި ހިމެނޭ ވ. ތިނަދޫ، ހިޔާ، އަދުހަމް އަހުމަދު ރަޝީދާއި މއ. ފޭރުގޭ މުޖާޒް އަހުމަދާއި ގއ. ކޮނޑޭ، ފޮޅޭމާ ތަހުމީން އަހުމަދު އަދި ލ. ގަން ދުންފިނިއުފާ އަހްމަދު ފާތިހުގެ މައްޗަށް ދައުވާކޮށްދިނުމަށް އެދި ޕީޖީ އޮފީހަށް ވަނީ ފޮނުވައިފަ އެވެ.

އެމީހުންގެ އިތުރުން އެ މައްސަލައިގައި ހައްޔަރުކޮށް ތަހުގީގުކުރަމުންދަނީ ނ. މަނަދޫ، ނޫރީގޭ އަލީ ހައިޝަމް، މ. އުދެހިގެ އިސްހާގު، ގއ. ވިލިނގިލި، ހުދުރުވާގޭ، ފަހުމީ އަލީ އަދި އއ. މާޅޮސް، އަސަރީގޭ މުހައްމަދު ނާޒިމް އާއި ހއ. މޮޅަދޫ، ބަހާރުގޭ އަބްދުﷲ އަލިމަނިކުގެ އިތުރުން ހއ. ހޯރަފުށީ، އަލަނާސިގެ މުހައްމަދު ތަސްލީމް އެވެ.

ތަހުގީގަށް މިހާތަނަށް ފާހަގަކުރެވުނު ގޮތުން އެ ހަމަލާގައި އެންމެ އިސްކޮށް ތިބީ ތަސްލީމް އާއި އިސްހާގު އަދި އަލީ ހައިޝަމް ކަމަށް ހަމީދު ވިދާޅުވެ އެވެ. އަދި ފަހުމީ އާއި ނާޒިމްއަކީ ވެސް މި ހަމަލާގައި އަމަލީ ގޮތުން ބައިވެރިވި މީހުންނެވެ. އަލިމަނިކަކީ ރާއްޖޭގައި ހަރުކަށި ފިކުރު ފެތުރުމުގައި އިސްކޮށް އުޅޭ މީހެއް ކަމަށާއި އޭނާ ވަނީ އަދުހަމު ފިލުވުމަށާއި މި ހަމަލާގެ ހެކި ނައްތާލުމަށް މަސައްކަތްކޮށްފައި ކަމަށް ހަމީދު ވިދާޅުވެ އެވެ.

ނަޝީދަށް ދިން ހަމަލާއަށް މިވީ ގާތްގަނޑަކަށް 90 ދުވަހުގެ ތެރޭގައި ކުރިއަށް ގެންދިޔަ ތަހުގީގުން ފާހަގަކުރެވުނު މައުލޫމާތު ހިއްސާކުރައްވަމުން ހަމީދު ވިދާޅުވީ އެ މައްސަލައިގައި ހައްޔަރުކުރި ތަސްލީމަކީ ނަޝީދު، އެއީ މުރުތައްދުވެފައިވާ މީހެއް ކަމަށް ކަނޑައަޅައި ނަޝީދު އެއީ މަރާލަން ޖެހޭ މީހެއް ކަމަށް ވަކާލާތުކޮށް، އެ ސެލްއަށް މީހުން ވެއްދުމުގެ މަސައްކަތްކޮށް، އޮޕަރޭޓްކުރާ ގޮތް ކިޔައިދެމުން އައި މީހެއް ކަމަށެވެ.

ރިޔާޒު ވިދާޅުވީ ހައެއް މެއިގައި ހަމަލާދޭން ބޮން ތައްޔާރުކުރީ މިދިޔަ އަހަރުގެ މާޗު މަހުގެ ތެރޭގައި ކަމަށެވެ. އެކަމަށް ސައިކަލު ތައްޔާރުކުރުމަށް މިދިޔަ އަހަރުގެ ތެރޭ، ހުޅުމާލޭގައި ހުންނަ ގަރާޖަކުން ސައިކަލު ވެސް ސާވިސްކުރި އެވެ. އެގޮތުން ހަމަލާދިނުމަށް ސައިކަލުގައި ބޮން ހަރުކުރީ ތިނެއް މެއިގައި ކަމަށާއި އެކަމުގެ ހެކި ވެސް ލިބިފައިވާ ކަމަށް ރިޔާޒު ވިދާޅުވި އެވެ. އަދި ހަމަލާދިން މީހުން މޭ ހަތަރު ވަނަ ދުވަހު ބައްދަލުކޮށް މަޝްވަރާކުރި ކަމަށް ވެސް އޭނާ ވިދާޅުވި އެވެ.

މި ހަމަލާއާ ގުޅޭ ގޮތުން ރައްޔިތުންގެ މަޖިލީހުގެ 241 ކޮމިޓީން ވެސް ބޮޑު އިންކުއަރީއެއް ތައްޔާރުކުރި އެވެ.