އިންޑިއާއިން މޮރިޝަސްގެ ރަށެއްގައި ސިއްރުން އަސްކަރީ މަރުކަޒެއް އެބަ ހަދާ: އަލް ޖަޒީރާ

އިންޑިއާ ކަނޑުގައި ނުފޫޒު ގަދަކުރުމަށް އިންޑިއާ އިން ސިއްރިއްޔާތުގައި މޮރިޝަސްގެ ރަށެއްގައި މިލިޓަރީ ބޭސްއެއް ހަދަމުންދާ ކަމަށް އަލްޖަރީޒާ އިން ބުނެފި އެވެ.

"އަލް ޖަޒީރާ އިންވެސްޓިގޭޝަންސް" އިން ހާމަވި ގޮތުގައި އަސްކަރީ މަރުކަޒު ހަދަނީ މޮރިޝަސްގައި އެހެން ރަށްތަކާ ވަކިން އޮންނަ އަގަލޭގާގައި އެވެ. އެއީ މޮރިޝަސްގެ އެހެން ރަށްތަކާ ވަކިން އުތުރުގައި އޮންނަ ރަށެކެވެ. މަދު ބަޔަކު ދިރުއުޅޭ އެ ރަށުގައި ކުރަނީ މަސްވެރިކަމާއި ދަނޑުވެރިކަން ފަދަ މަސައްކަތެވެ. ރާއްޖޭގެ ރަށެއް ފަދައިން ރީތި ދޮންވެލި ގޮނޑުދޮށްތައް ރަށުގައި ހުއްޓަސް އެ ރަށަކީ މާ ބޮޑު ތަރައްގީއެއް ލިބިފައި ނުވާ ޓޫރިޒަމްގެ މަސައްކަތް ވެސް ނުހިންގާ ރަށެކެވެ.

ސެޓެލައިޓް ފޮޓޯތަކާއި މާލީ މުއާމަލާތްތައް ބެލުުމުގެ އިތުރުން އެހެން ގޮތްގޮތުން ހޯދާފައިވާ ހެކިތަކަށް ބިނާކޮށް އަލްޖަޒީރާގެ ޑޮކިއުމެންޓަރީގައި ބުނެފައި ވަނީ އިންޑިއާއިން އެ ރަށުގައި އަސްކަރީ މަރުކަޒެއް ތަރައްގީކުރަމުންދާ ކަމަށެވެ.

އަސްކަރީ ތަޖުރިބާ ހުރި ފަރާތްތަކާ ހަވާލާދީ އަލް ޖަޒީރާ އިން ބުނި ގޮތުގައި އަގަލޭގާގައި ތަރައްގީ ކުރަމުންދާ އެއާ ސްޓްރިޕް އިންޑިއާގެ މަތިންދާބޯޓުތައް ހިންގާ މެރިޓައިމް ޕެޓްރޯލު މިޝަންތަކަށް ބޭނުން ކުރާނެ އެވެ.

ސެޓެލައިޓް ފޮޓޯތަކުން އެނގޭ ގޮތުގައި އެ ރަށުގައި ބޮޑު ދެ ބަނދަރު ހެދުމުގެ މަސައްކަތް ކުރިއަށްދެ އެވެ. އަދި ތިން ކިލޯމީޓަރުގެ ދިގު ރަންވޭއެއް ހެދުމުގެ މަސައްކަތް ވެސް ކުރިއަށްދެ އެވެ. އެއީ ދުނިޔޭގެ އެންމެ ބޮޑެތި އެއާޕޯޓުތަކުގައި ހުންނަހާ ދިގު ރަންވޭއެކެވެ. އަދި ގިނަ އަދަދެއްގެ މަތިންދާބޯޓު ޕާކްކޮށްފައި ބެެހެއްޓޭ ވަރުގެ ބޮޑު އޭޕްރަން އެއްވެސް ވަނީ ހަދައިފަ އެވެ.

އަގަލޭގާގައި ކުރިން ހުރި ހަމައެކަނި ރަންވޭއަކީ 800 މީޓަރުގެ ރަންވޭއެކެވެ. އެ ރަންވޭއަށް ޖެއްސެނީ މޮރިޝަސް ކޯސްޓްގާޑުގެ ޕްރޮޕެލާ މަތިންދާބޯޓުތައް ފަދަ ކުޑަ ބޯޓުތަކަށެވެ. ނަމަވެސް ތިން ކިލޯމީޓަރުގެ ރަންވޭއެއްގައި އިންޑިއާގެ މެރިޓައިމް ޕެޓްރޯލަށް ބޭނުންކުރާ ޕީ-8އައި މަތިންދާބޯޓުތަކަށް ޖެއްސޭނެ ކަމަށް މާހިރުން ބުނެފައިވެ އެވެ.

ފާއިތުވި ދެ އަހަރުގެ ތެރޭގައި އެގަލޭގާ ތަރައްގީކުރަން އިންޑިއާއިން ގެނައި އެތައް ސަތޭކަ ކޮންސްޓްރަކްޝަން މަސައްކަތް ކުރާ މީހުން ވެސް އެ ރަށުގައި ދިރިއުޅެމުންދާ ކަމަށް އަލްޖަޒީރާއިން ބުނެފައިވެ އެވެ. އަދި އެ މީހުން ދަނީ ގިނަ އަދަދެއްގެ މީހުންނަށް މަޑުކުރެވޭނެހެން އެ ރަށުގައި އިމާރާތް ވެސް ކުރަމުން ކަމަށް ބުނެފައިވެ އެވެ.

މި މަޝްރޫއާ ހެދި އެ ރަށުގެ ބައެއް މީހުން ވަނީ ކަންބޮޑުވުން ފާޅުކޮށް ވާހަކަ ދައްކައިފަ އެވެ.

އެ ރަށުގައި އިންޑިއާ އިން މި މަސައްކަތް ކުރަމުން ދަނީ އިންޑިއާ ސަރުކާރާއި މޮރިޝަސް ސަރުކާރާ ދެމެދު 2015 ވަނަ އަހަރު ހެދި އެއްބަސްވުމެއްގެ ދަށުންނެވެ.

އެ އެއްބަސްވުމަކީ މޮރިޝަސްގެ މައި ރަށްރަށާއި ދުރުގައި އޮންނަ ރަށްތަކާ ގުޅުވާލެވޭނެ އުމްރާނީ ވަސީލަތްތައް ގާއިމްކުރުމާއި މިހާރު ހުރި ވަސީލަތްތައް ވަރުގަދަ ކުރުމަށް ހެދި އެއްބަސްވުމެކެވެ.

އަގަލޭގާގައި ކަނޑުގެ ސިފައިންގެ ބޭސްއެއް އަޅާ ވާހަކައަކީ 2018 ވަނަ އަހަރުން ފެށިގެން ދައްކަމުން ދިޔަ ވާހަކައެކެވެ. ނަމަވެސް، މޮރިޝަސް އަދި އިންޑިއާގެ ސަރުކާރުން ވަނީ އެ ވާހަކަތައް ދޮގުކޮށްފަ އެވެ.

މި އަހަރުގެ މެއި މަހު ވެސް މޮރިޝަސްގެ ބޮޑުވަޒީރު ޕްރަވިންދް ޖަގްނޯތު ވަނީ މިލިޓަރީ ބޭސްއެއް ހެދުމަށް އިންޑިއާއާ އެކު އެއްބަސްވުމެއް ނެތް ކަމަށް ޕާލިމަންޓުގައި ވިދާޅުވެފަ އެވެ.

އެ ރަށުގައި ހިންގާ މަޝްރޫއަކީ ހަމައެކަނި އެ ރަށުގައި ދިރިއުޅޭ މީހުންގެ ބޭނުމަށް އަދި ފައިދާއަށް ކުރާ ކަމެއްގެ ގޮތުގައި މޮރިޝަސްގެ ސަރުކާރުން ބުނެ އެވެ. ނަމަވެސް، އަގަލޭގާގައި ދިރިއުޅެނީ އެންމެ 300 އެއްހާ މީހުންނެވެ.

އޮސްޓްރޭލިއަން ނޭޝަނަލް ޔުނިވާސިޓީގެ ނޭޝަނަލް ސެކިއުރީޓީ ކޮލެޖުގައި އިންޑިއާ ކަނޑުގެ ޖިއޯޕޮލިޓިސް ދިރާސާކުރާ ސެމިއުލް ބޭޝްފީލްޑް އަލްޖަޒީރާއަށް ވިދާޅުވީ، ބައިނަލްއަގުވާމީ މައިދާނުގައި ނުފޫޒު ގަދަކުރަން އިންޑިއާގެ ކަނޑުގެ މުހިންމުކަން ގައުމުތަކަށް ބޮޑުވަމުންދާ ކަމަށެވެ.

އިންޑިއާއިން މިތަން ތަރައްގީ ކުރަމުންދާއިރު ޗައިނާއިން ވަނީ އެހެން ގައުމެއްގައި ގާއިމް ކުރި އެ ގައުމުގެ ފުރަތަމަ މިލިޓަރީ ބޭސް މޮރިޝަސްއާ މާ ދުރު ނޫން ޖިބޫޓީގައި ގާއިމްކޮށްފަ އެވެ.

ބޭޝްފީލްޑް ވެސް ވިދާޅުވީ، އަސްކަރީ ބޭނުމަށް ނޫން އެހެން ސަބަބަަކަށް އަގަލެގާ ތަރައްގީ ކުރާ ކަމަށް ގަބޫލު ކުރެވެން ނެތް ކަމަށެވެ. އަދި އެއީ އަސްކަރީ ބޭސްއެއް ހެދުމަށް އެންމެ ރަނގަޅު ސަރަހައްދު ކަމަށް އޭނާ ވިދާޅުވި އެވެ.

ނިއު ދިއްލީގެ އޮބްޒާވާ ރިސާޗް ފައުންޑޭޝަންގެ ތިންކް ޓޭންކްގެ އެސޯސިއޭޓް ފެލޯ އަބިޝެކް މިޝްރާ ވިދާޅުވީ، އިންޑިއާއިން މިގޮތަށް އަމަލު ކުރަނީ ޗައިނާއިން އެ ގައުމުގެ ނުފޫޒު މި ސަރަހައްދުގައި ގަދަކުރުމުގެ ގޮތުން މަސައްކަތްތަކެއް ކުރާތީ އެވެ.

ހުޅަނގު-ދެކުނު އިންޑިއާ ކަނޑާއި މޮޒަމްބީކް ޗެނަލްގައި އިންޑިއާގެ ސާވެއިލެންސް ވަރުގަދަ ކުރުމަށް އެ ގައުމުން އެ ސަރަހައްދުގައި އޮޕަރޭޓުކުރަން ބޭނުންވާ ކަމަށް ވެސް މިޝްރާ ވިދާޅުވި އެވެ.

އިންޑިއާ އިން ރާއްޖޭގައި ހެލިކޮޕްޓަރު ދުއްވުމަށް ކަމަށް ބުނެ ސިފައިން ބައިތިއްބާތީ ދިވެހިން ވެސް ކަންބޮޑުވުން ފާޅުކުރެ އެވެ. އޭގެ އިތުރުން އެގައުމުން ސިފައިންނާއެކު ޑޯނިއާ މަތިންދާބޯޓު ރާއްޖޭގައި އޮޕަރޭޓު ކުރުމާއި ރާއްޖޭގައި މުހިންމު ތަރައްގީގެ މަޝްރޫއުތައް ހިންގުން ފަދަ ކަންކަމަކީ އެ ގައުމުން ރާއްޖޭގެ ދާހިލީ ކަންކަމަށް ނުފޫޒު ފޯރުވަން ކުރާ ކަންކަން ކަމަށް ވަނީ ތުުހުމަތު ކުރެވިފަ އެވެ.

އެންމެ ބޮޑަށް ހޫނުވި އެއް މައްސަލަ އަކީ އުތުރުތިލިފަޅުގެ މައްސަލަ އެވެ. އިންޑިއާއިން ތަރައްގީކޮށްދޭން އެއްބަސްވެފައިވާ އެތަނުގައި ނޭވަލް ބޭސްއެއް އަޅަން އުޅޭ ކަމަށް ބައެއް އިދިކޮޅު ފަރާތްތަކުން ވަނީ ތުހުމަތުކޮށްފަ އެވެ. ނަމަވެސް، ދިވެހި ސަރުކާރުން ވަނީ އެ ވާހަކަތައް ދޮގުކޮށްފަ އެވެ.