މާލޭ ސިޓީ ކައުންސިލުގެ މަސައްކަތްތައް ރައްޔިތުންނާ ވީހާވެސް ގާތުން ކުރިއަށް ގެންދިއުމުގެ ގޮތުން ކޮންމެ ބްލޮކަކަށް ވެރިއަކު ހަމަޖައްސަން ނިންމާފައިވާ ކަމަށް މާލޭ މޭޔަރު ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
ގަލޮޅުގެ ރައްޔިތުންނާ ރޭ ބައްދަލު ކުރައްވައި މުއިއްޒު ވިދާޅުވީ، މާލޭގެ ހުރިހާ ރައްޔިތުން ރަމްޒުވާނެ ގޮތަށް ކޮންމެ ބްލޮކަކަށް ވެރިއަކު އިންތިހާބުކޮށްގެން ކައުންސިލްގެ މަސައްކަތްތައް ކުރިއަށް ގެންދިއުމަށް ނިންމާފައިވާ ކަމަށެވެ.
"މިހާރު މިކަމަށް ހާއްސަކޮށް ވަކި އުސޫލެއް ކައުންސިލުން ފާސް ކޮށްފައިވާނެ،" މުއިއްޒު ވިދާޅުވި އެވެ. "ބްލޮކް ވެރިން ހޮވުމަށް އަންނަ ހަފްތާގައި އެކަމަށް އިއުލާނު ކުރާނަން. ބްލޮކްގެ ވެރިއަކަށް ހުންނާނެ މީހަކު އިންތިހާބު ކުރާނީ އެ ބްލޮކެއްގެ ރައްޔިތުން".
މުއިއްޒު ވިދާޅުވީ ބްލޮކްތަކުން ހޮވޭ ޓީމަކީ، ރައްޔިތުންނާ އެންމެ ގާތުން، ކައުންސިލާ އެކީގައި މަސައްކަތް ކުރާނެ ޓީމު ކަމަށެވެ.
ބްލޮކްގެ ވެރިން ހޮވުމުގެ އިތުރުން ކޮންމެ އަވަށަކަށް ބޯޑެއް އިންތިހާބު ކުރުމުގެ މަސައްކަތް ކުރަން ވެސް ނިންމާފައިވާ ކަމަށް މުއިއްޒު ވިދާޅުވި އެވެ. އަދި މި މަސައްކަތް ކުރާނީ ބްލޮކްގެ ވެރިން ހޮވުމަށްފަހު ކަމަށް ވިދާޅުވި އެވެ.
ސިޓީ ކައުންސިލުން ވަނީ މާލޭގެ ހުރިހާ އަވަށްތަކުގެ މީހުންނާ ވެސް ބައްދަލު ކުރަން ނިންމައިފަ އެވެ.