ރާއްޖޭގައި ހުންނަ އިންޑިއާގެ ހައި ކޮމިޝަން ގޮއްވާލާނެ ކަމަށް ޓްވީޓު ކޮށްގެން ހައްޔަރު ކުރި މީހާގެ ތަހުގީގު އަދިވެސް ނުނިމޭ ކަމަށް ފުލުހުން ބުނެފި އެވެ.
އިންޑިއާ ހައި ކޮމިޝަން ގޮއްވާލަން އާރްޑީއެކްސް ބޭނުންވާ ކަމަށާއި އެކަން ވަރަށް އަވަހަށް ކުރާނެ ކަމަށް ބުނެ "ރޯޔަލް ހުސެން ތަކުރު" ނަމުގައި އޮތް ޓްވިޓާ އެކައުންޓަކުން ކުރި ޓްވީޓަކާ ގުޅިގެން މިދިޔަ މަހުގެ ތިން ވަނަ ދުވަހު ހައްޔަރު ކުރީ މުހައްމަދު އިނާދު، 42، އެވެ.
ފުލުހުންގެ މީޑިއާ އޮފިޝަލަކު "މިހާރު" އަށް ވިދާޅުވި ގޮތުގައި އިނާދު އަދިވެސް ހުރީ ބަންދުގަ އެވެ. އޭނާގެ ބަންދުގެ މުއްދަތު ހަމަވާނީ ބުރާސްފަތި ދުވަހު އެވެ. އޮފިޝަލު ވިދާޅުވި ގޮތުގައި އޭނާގެ މައްސަލައިގެ ތަހުގީގު އަދިވެސް ދަނީ ކުރިއަށެވެ.
އެ މައްސަލައިގައި ބަންދު އަޑުއެހުމުގައި އޭނާގެ ވަކީލު ވިދާޅުވެފައި ވަނީ އޭނާ ޓްވީޓެއް ކުރިއަސް ޖިނާއީ މިންގަނޑަށް ފެތޭނީ އެކަމެއް ކުރުމުގެ ނިޔަތުގައި ކުރި ނަމަ ކަމަށެވެ. އަދި އޭނާގެ މައްޗަށް އެއްވެސް ވަރެއްގެ ހެއްކެއް ހޯދިފައި ނުވާ ކަމަށާއި އޭނާ ދޫކޮށްލަން ޖެހޭ ކަމަށް ވިދާޅުވި އެވެ.
އިނާދު ބަންދުކޮށްފައި ވަނީ ހެކި ނައްތާލަން އުޅެފާނެތީ އާއި މުޖުތަމައުގެ ސަލާމަތާއި ރައްކާތެރިކަމަށް ޓަކަ އެވެ.
އިނާދަކީ އެންމެ ފަހުން ބޭއްވި މަޖިލިސް އިންތިހާބުގެ މައްޗަންގޮޅި ދެކުނު ދާއިރާގެ އެމްޑީޕީ ޕްރައިމަރީގައި ވާދަ ކުރުމަށް ހުށަހެޅި އެ ޕާޓީގެ މެމްބަރެކެވެ. މި މައްސަލައިގައި ފުލުހުން ހިންގާ ތަހުގީގުގެ މައްޗަށް ބިނާކޮށް އިނާދު އެމްޑީޕީން ވަކިކުރަން ވެސް އެ ޕާޓީން މިހާރު ވަނީ ނިންމައިފަ އެވެ.
"ރޯޔަލް ހުސެން ތަކުރު" ޓްވިޓާ އެކައުންޓުން މި ޓްވީޓު ކުރީ، އިންޑިއާގެ ޑެޕިއުޓީ ހައި ކޮމިޝަނަރާ ބެހޭގޮތުން ނޫހެއްގައި ޝާއިއު ކުރި ލިޔުމަކާ ގުޅިގެން ފިޔަވަޅު އަޅަން އިންޑިއާ ހައި ކޮމިޝަނުން އެދުމުން އެ މައްސަލަ ހޫނުވެފައި ވަނިކޮށެވެ.
އިނާދު ހައްޔަރުކޮށް ފުލުހުން ނެރުނު ބަޔާނުގައި ހަނދާންކޮށްދިނީ، ސޯޝަލް މީޑިއާ އާއި އެ ނޫން ވެސް ވަސީލަތްތައް ބޭނުންކޮށްގެން މީހުންނަށް އަނިޔާވެރިވުމަށާއި މުދަލާއި ތަކެއްޗަށް ގެއްލުން ދިނުމަށް ގޮވާލުމާއި އެފަދަ ކަންކަމަށް ހިތްވަރު ދިނުމަކީ ޖިނާއީ ކުށެއް ކަމެވެ. އަދި އެފަދަ އަމަލުތައް ހިންގާ މީހުންގެ މައްސަލަތައް ތަހުގީގުކޮށް އަޅަންޖެހޭ ފިޔަވަޅުތައް އަޅާނެ ކަމަށް ބުންޏެވެ.