އާގިލްގެ މަރު: މިއަދުވެސް ހެކިބަހެއް ނުނެގުނު؛ މި އަހަރު ނިމުމުގެ ކުރިން މައްސަލަ ނިންމަނީ

އެމްއެމްއޭ ކައިރީގައި، އުމުރުން 19 އަހަރުގެ އިބްރާހިމް އާގިލް މަރާލި މައްސަލައިގެ ޝަރީއަތް ނިންމައި މި އަހަރު ނިމުމުގެ ކުރިން ހުކުމް ކުރައްވާނެ ކަމަށް އެ މައްސަލަ ބައްލަވާ ގާޒީ އަލީ އާދަމް ވިދާޅުވެއްޖެ އެވެ.

ގދ. ފަރެސްމާތޮޑާ، އާގިލް އަށް ތޫނު އެއްޗެހިން ހަމަލާދީ މަރާލީ އޮގަސްޓް 31، 2018 ގައި، އޭނާ ވ. ފެލިދޫން މާލެ އައި ލޯންޗަކުން އެއް ނަމްބަރު ފާލަން ސަރަހައްދަށް ފޭބިތަނާ އެތަނުގައި ތިބި ބަޔަކު އޭނާއަށް ވަޅިން ހަމަލާ ދީގެންނެވެ.

އެ މައްސަލާގައި، ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ދައުވާ ދައުލަތުން ކުރަނީ ލ. ފޮނަދޫ، ހިޔާ، ހަމްދޫން ހަމްޒަތާއި، އައްޑޫ ހިތަދޫ، ސްވޭހުހީނާގެ، އަލީ މިޖުވާދު މާލިކްގެ މައްޗަށެވެ. އަދި އެކަމަށް އެހީތެރިވިކަމުގެ ދައުވާ، ހއ. ދިއްދޫ، ސްނޯބޯޑް އިބްރާހިމް ވިޝާމްގެ މައްޗަށް ކުރެ އެވެ.

މިއަދުގެ އަޑުއެހުމަކީ ދައުލަތުގެ ސިއްރު ހެކިވެރިންގެ ހެކިބަސް ނަގަން ތާވަލު ކުރި އަޑުއެހުމެކެވެ. ނަމަވެސް، ކުރީގެ ދިފާއީ ވަކީލެއްގެ ބަދަލުގައި އެހެން ވަކީލަކު ހަމަޖައްސަން ދިން މުއްދަތުގައި ވަކީލަކު ހަމަޖައްސާފައިވާކަން ދައުލަތަށް އަންގާފައި ނުވާތީ ދައުލަތުގެ ސިއްރު ހެކިވެރިން މިއަދު ހާޒިރެއް ނުކުރެ އެވެ. އެހެންވެ، ޝަރީއަތުގެ ބައި ކުރިއަށްނުގެންދެވުނެވެ.

މީގެ ކުރިން ވެސް ހެކިބަސް ނަގަން އެކި ފަހަރު އަޑުއެހުންތައް ތާވަލުކުރި ނަމަވެސް، އެކި ސަބަބުތަކާ ހެދި އެކަން ކުރިއަށްގެންދެވޭ ގޮތް ވަނީ ނުވެފަ އެވެ. މިހާތަނަށް މައްސަލައިގައި ނެގިފައި ވަނީ ތިން ހެކިވެރިއެއްގެ ހެކިބަހެވެ. އެހެންވެ މިއަދު ދައުލަތުން ވަނީ މައްސަލަ ކުރިއަށްގެންދާނެ ގޮތުގެ ތާވަލެއް އެކުލަވާލުމަށް އެދިފަ އެވެ.

ހެކިބަސް ނެގުމުގެ ހަތަރު އަޑުއެހުމެއް މައްސަލަ ބައްލަވާ ގާޒީ އަލީ އާދަމް މިއަދު ތާވަލުކުރެއްވި އެވެ. އެއީ ސެޕްޓޭމްބަރު 20، އޮކްޓޯބަރު 3، އޮކްޓޯބަރު 17 އަދި ނޮވެމްބަރު 4 އަށެވެ. އަދި ހުލާސާ ބަޔާން 25 ނޮވެމްބަރުގައި އިއްވައި، 13 ޑިސެމްބަރު ހުކުމް ކުރާ ގޮތަށް ވެސް ތާވަލު ކުރި އެވެ.

މިގޮތަށް ތާވަލު އެކުލަވާލި ނަމަވެސް، ފަހުން ދިމާވާ ސަބަބަކާ ހެދި އަޑުއެހުމެއް ފަސްކުރަން ވެސް ޖެހިދާނެ ކަމަށް ގާޒީ ވިދާޅުވި އެވެ. އަދި ދިފާއީ ވަކީލުން ވެސް ވަނީ މިއަދު އެކުލަވާލި ތާވަލާއި އެހެން މައްސަލަތަކުގެ ތާވަލު ފުށުއަރާ ނަމަ ކޯޓަށް އަންގާނެ ކަމަށް ވިދާޅުވެފަ އެވެ.

މައްސަލަ ދިގުލައިގެންދާ ކަމުގެ ކަންބޮޑުވުންތައް ހުރުމުން ގާޒީ އަލީ އާދަމް ވިދާޅުވީ، މައްސަލަ ވީހާ ވެސް އަވަހަށް ނިންމަން މަސައްކަތް ކުރައްވާ ކަމަށެވެ. ބައެއް އަޑުއެހުންތައް ފަސް ކުރަން ޖެހިދާނެ ކަމަށް ވިދާޅުވި ނަމަވެސް، މި އަހަރު ނިމުމުގެ ކުރިން ހުކުމް ކުރެވޭތޯ މަސައްކަތް ކުރައްވާނެ ކަމަށް އޭނާ ވިދާޅުވި އެވެ.

މައްސަލަ ދިގުލައިގެންދާތީ ވިޝާމްގެ ބަންދަށް ލުޔެއް ދޭން އޭނާގެ ވަކީލު މިއަދު އެދިވަޑައިގަތެވެ. ވިޝާމްގެ ތިން ދަރިން ތިބޭ ކަމަށާއި، އާއިލާގެ އިސް ބެލެނެވެރިއާ އަކީ އޭނާ ކަމަށް ވަކީލު ވިދާޅުވި އެވެ. އޭނާ ބަންދުކޮށްފައި ހުރުމުން އާމްދަނީގެ ދަތިކަން ދިމާވެ، އާއިލާ އުޅެނީ ހާލުގައި ކަމަށް ވެސް ވިދާޅުވި އެވެ. ވާހަކަ ދައްކަން ވިޝާމަށް ދިން ފުރުސަތުގައި އޭނާ ވެސް ވަނީ ކިތަންމެ ބޮޑު ޝަރުތެއް ކޮށްފައި ނަމަވެސް ބަންދަށް ލުޔެއް ދޭން އެދިފަ އެވެ.

ނަމަވެސް، ގާޒީ އާދަމް ވިދާޅުވީ މައްސަލައިގެ ބާވަތައް ބަލައި ބަންދަށް ލުޔެއް ދޭންޖެހޭނެ ކަމަށް ދެކެވަޑައިނުގަންނަވާ ކަމަށެވެ. ތުހުމަތު ކުރެވޭ ކުށަކީ ޖިނާއީ ބޮޑު ކުށެއްކަން ފާހަގަކުރައްވައި އޭނާ ވިދާޅުވީ ވިޝާމް ދޫށްލައިފި ނަމަ މުޖުތަމައުގެ ސަލާމަތަށް ނުރައްކަލެއް އޮވެދާނެ ކަމަށެވެ.

އާގިލް މަރާލިތާ ދެ މަސް ފަހުން މާލޭގައި އޮޓޯ ގަރާޖު ކައިރީގައި އުމުރުން 14 އަހަރުގެ އިސްމާއިލް ޝައްފާން މަރާލި އެވެ. ފުލުހުން ބުނެފައި ވަނީ މި ދެ މީހުން ވެސް މަރާލީ މާލޭގައި ހިންގި ސިލްސިލާ ގޭންގު މާރާމާރީތަކެއްގައި ބަދަލު ހިފުމުގެ ގޮތުން ކަމަށެވެ.