ޕްލޭނިން މިނިސްޓްރީގެ ސްޓޭޓް މިނިސްޓަރު އަދި އެމްޑީޕީގެ މާލެ ދާއިރާގެ މިހާރުގެ ރައީސް އަކްރަމް ކަމާލުއްދީނަށް އެ ޕާޓީގެ ދާއިރާތަކުގެ އިންތިހާބުގައި ވާދަނުކުރެވޭނެ ކަމަށް ނިންމި ނިންމުން އެމްޑީޕީން އަނބުރާ ގެންގޮސްފި އެވެ.
އެމްޑީޕީގެ މާލޭ ދާއިރާ އަށް އަނެއްކާ ވެސް ވާދަކުރެއްވުމަށް ފޯމު ހުށަހެޅުއްވި އަކްރަމަށް ފުރުސަތު ގެއްލިފައިވާ ކަމަށް އެ ޕާޓީން ނިންމީ އެމްއެމްޕީއާރުސީގެ ހިޔާނާތުގެ ތެރެއިން އޭނާއާ ގުޅުން ހުރި މައްސަލައެއް އެންޓި ކޮރަޕްޝަން ކޮމިޝަން (އޭސީސީ) އިން ބަލަމުންދާ ކަމަށް އެ ކޮމިޝަނުން އެމްޑީޕީ އަށް އަންގާފައި ވާތީ އެވެ.
އެކަމާ ގުޅިގެން އަކްރަމް ވަނީ އެ ޕާޓީ އަށް ޝަކުވާގެ ސިޓީއެއް ފޮނުއްވައި އެ ނިންމުން އަލުން މުރާޖައާ ކޮށްދިނުމަށް އެދިފަ އެވެ.
އަކްރަމް "މިހާރު" އަށް ވަނީ އޭނާ އަށް އިންތިހާބުގައި ބައިވެރިވެވޭނެކަން އިންތިހާބާ ބެހޭ ކޮމިޓީން މިއަދު ނިންމިކަން ކަށަވަރު ކޮށްދެއްވައިފަ އެވެ.
އެމްޑީޕީގެ ގައުމީ މަޖިލީހުން ފާސްކޮށްފައިވާ ގޮތުން އެ ޕާޓީގެ ދާއިރާތަކުގެ އިންތިހާބުގައި ބައިވެރި ނުވެވޭނީ، އެމްއެމްޕީއާރުސީގެ ހިޔާނާތާ ގުޅިގެން އޭސީސީން ތައްޔާރު ކޮށްފައިވާ ރިޕޯޓެއްގައި ފިޔަވަޅު އަޅައި ދިނުމަށް އެދި އެކިއެކި މުއައްސަސާތަކަށް ނަން ފޮނުވާފައިވާ މީހުންނަށެވެ. ފިޔަވަޅު އަޅަން ފޮނުވި ލިސްޓުގައި އަކުރަމްގެ ނަމެއް ނެތެވެ.
އަކްރަމްގެ އިތުރުން ޔޫތު މިނިސްޓަރު އަހުމަދު މަހުލޫފަށް ވެސް ވަނީ އެމްޑީޕީގެ އެތެރޭ އިންތިހާބުގައި ވާދަކުރުމުގެ ފުރުސަތު ގެއްލިފަ އެވެ. އޭނާއަށް ވެސް އެ ފުރުސަތު ގެއްލުނީ އެމްއެމްޕީއާރްސީގެ ހިޔާނާތުގެ މައްސަލައެއް ބެލުމަށް ޕްރޮސެކިއުޓާ ޖެނަރަލް އޮފީހަށް ފޮނުވާފައިވާތީ އެވެ.
މަހުލޫފް ވެސް ވަނީ އެ މައްސަލަ އަލުން މުރާޖާ ކޮށްދިނުމަށް އެދިފަ އެވެ.